22
Dai Madu gaw ngai hpe ga shaga wu ai. Shi gaw, ?Si chye ai masha wa e, nang gaw masha sat ai ni hte hpring nga ai mare hpe tara jeyang na matu jin jin rai nga n ni? Dai mare hta galaw kau sai matsat shabat amu ni mahkra hpe asan sha madun dan u. Tsaw Htum ai dai Madu ngai tsun ai mungga, dai mare hpe tsun u: Nang gaw na a amyu masha ni law law hpe sai jahkaw kau nit dai, hpara sumla ni hpe nawku ai hku nna na hkum hpe awu asin di kau nit dai majaw na a aten du wa ra ai. Nang gaw masha sat ai amu ni hte mara kap nga ndai, nang galaw ai hpara sumla ni hte awu asin hkrum nga ndai; dai rai nna na a nhtoi gaw du wa ra ai, na a aten htum mat nit dai! Shing re ai lam ni a majaw ngai nang hpe masha amyu baw ni hta mani hpa shatai kau na nngai, mungdan yawng mung nang hpe asawng asang di kau na mara ai. Nang tara n lang ai a majaw nang hte ni ai, tsan ai mungdan ni yawng nang hpe asawng asang di nga ma ai. Israela ningbaw ni yawng hte gaw shanhte a n-gun atsam hpe kam hpa ai hte masha sat amu hpe shut nga ma ai. Dai mare hta shanu nga ai ni kadai mung tinang a kanu kawa ni hpe shagrau hkungga nga ma ai n rai. Nang gaw tsasam masha ni hpe mawp sha nna gaida gaina ni hte jahkrai nmai ni hpe zai hku nna dip sha nga ndai. Ref 22:7: Pru 20:12; Trj 5:16. Nang gaw dai chyoi pra ai shara ni hpe n hkungga nga ndai; Bansa Nhtoi hpe awu asin di nga ndai. Ref 22:8: Jaw 19:30; 26:2. Na a amyu masha ni hta na nkau mi gaw sat kau hkrum na matu kaga masha ni a lam ni hpe masu magaw ga tsun nga ai. Amyu masha nkau mi gaw hpara sumla ni hpe nawng jau ai shagu hkungga shan ni hpe sha nga ma ai. Nkau mi gaw shanhte a ngang gayut ai amu ni hta tut nawng myit dik dum nga ma ai. 10 Nkau mi gaw kawa a madu jan hte rau yup nna, nse nsa re ai amu hta gayut katu ai numsha ni gaw shanhte a num hking sa nga ai aten hta pyi, lasha ni hte kanawn nga ma ai. Ref 22:10-11: Jaw 18:7-20. 11 Nkau mi gaw numshaw lashaw ai amu ni hpe shut hpyit nna, kaga ni gaw shanhte a kanam ni hpe mung, kajan ni hpe mung lau la nna roi rip nga ma ai. 12 Amyu masha nkau mi gaw gumhpraw a jaw e masha sat ma ai. Nkau mi gaw shanhte a kahpu kanau Israela masha ni hpe gumhpraw amyat tam sha nna, sut su wa na matu shanhte hpe mawp sha nga ma ai. Shanhte gaw ngai hpe mung malap kau manu ai.? Dai Tsaw Htum ai Madu tsun nu ai. Ref 22:12: Pru 23:8; Trj 16:19; Pru 22:25; Jaw 25:36-37; Trj 23:19.
13 ?Ngai gaw na a damya amu ni hte masha sat ai amu ni hta nye a lata du na ra ai. 14 Ngai nang hte amu shangut ai shaloi, nang hta nsen marai mung, na a lata sharawt lu na n-gun atsam mung naw ngam na ra ai ngu, nang myit nawn da wu ni? Dai Madu ngai tsun ni ai hte maren, nye a mungga hpe ngai shatup na nngai. 15 Ngai gaw na a amyu masha ni hpe mungdan shagu hte masha amyu baw shagu hpang de shabra kau nna na a n hkru n shawp ai amu ni hpe jahtum kau ya na nngai. 16 Dai rai nna, kaga masha amyu baw ni nang hpe n kaw n law di na mara ai; rai ti mung Ngai gaw dai Madu rai nga nngai hpe nang chye na rin dai.?
17 Dai Madu gaw ngai hpe, 18 ?Si chye ai masha wa e, Israela masha ni gaw nye a matu hpa akyu n rawng ma ai. Shanhte gaw gumhpraw hpe wan htung hta shabyawng la ngut ai hpang ngam taw nga ai magri hkyeng, ajang, hpri hte machyu hkyi ni zawn rai ma ai. 19 Dai re ai majaw, shanhte gaw dai ni zawn akyu n rawng nga ma ai nga nna ya, tsaw Htum ai Madu ngai nan shanhte hpe tsun nga nngai. Ngai gaw shanhte yawng hpe Yerusalem hta zup hpawng da na nngai. 20 Dai hte maren, gumhpraw, magri hkyeng, hpri, machyu hte ajang ni hpe shabyawng na matu jen ya ai wan htung hta bang da nga ai. Wan gaw nhprang arai hpe shabyawng kau ai zawn nye a masin kahtet ai hte n-yun bu ai gaw shanhte hpe shabyawng kau na nngai. 21 Rai sa, ngai gaw shanhte hpe Yerusalem hta shinggyin da nna shanhte a npu e wan shagrung nhtawm nye a masin kahtet ai hte shanhte hpe shabyawng na we ai. 22 Gumhpraw gaw wan htung hta byawng mat ai zawn, shanhte gaw Yerusalem hta shabyawng kau ai hkrum na mara ai. Shanhte gaw dai Madu a masin kahtet ai lam hpe hkam sha nga ai lam, chye wa na mara ai.?
23 Dai Madu gaw ngai hpe bai ga shaga wu ai. 24 Shi gaw, ?Si chye ai masha wa e, Israela mungdan gaw n san n seng nga ai majaw, dai mungdan hpe nye a sindawng kahtet ai hte ari jaw nga nngai ngu, shanhte hpe htawn tsun u. 25 Dai ningbaw ni gaw shabam nna ashan ni hpe amya sat kau ai hkanghkyi ni zawn rai ma ai. Shanhte gaw amyu masha ni hpe sat shamyit kau nhtawm gumhpraw hte sut gan mahkra hpe dang lu ai daram hta la ma ai, shanhte galaw ai masha sat amu ni a majaw, gaida law law shabyin shangun ma ai. 26 Hkinjawng ni mung nye a tara hpe run kau nna, chyoi pra ai arai hpe n gawn n sawn di ma ai. Shanhte gaw chyoi pra ai hte n chyoi n pra ai hpe n ginhka ma ai. Shanhte gaw san seng ai hte n san n seng ai baw ni a shai nga ai lam hpe n sharin ya nga ma ai; Bansa Nhtoi hpe mung hpa zawn n nawn nga ma ai. Dai lam ni a majaw, Israela amyu masha ni gaw ngai hpe hkrit hkungga nga ma ai n rai. Ref 22:26: Jaw 10:10. 27 Asuya mung du ni mung ashan ni gyam sat nna ashep ashin di gang amya sha ai chyahkyawn ni hte bung nga ma ai. Shanhte gaw sut su wa na matu masha sat ai amu hte shut hpyit nga ma ai. 28 Shakum hpe namhtun hpraw hte chya da ai masha ni zawn, myihtoi ni mung ndai yubak mara ni hpe magap da nga ma ai. Shanhte gaw n teng ai shingran ni hpe mu nna, masu ai myihtoi ga ni tsun ma ai. Dai Madu ngai nan shanhte hpe n tsun ti mung, Tsaw Htum ai dai Madu gaw ning nga nga ai nga nna shanhte tsun shabra ma ai. 29 Sut su ai ni gaw maw lu maw sha ai hte hpya lu hpya sha nga ma ai. Shanhte gaw matsan mayan hkrum hkra nga ai ni hpe pagawn mi di nna, maigan manam ni hpe zai hku adip arip di ma ai. 30 Nye a masin kahtet ai gaw dai mung hpe jahten kau na matu hkyen nga ai shaloi, ngai gaw bunghku gaw gap lu na masha langai ngai, daw agrawp mat sai bunghku shara ni hta tsap lu ai masha langai ngai hte mungdan hpe makawp maga lu ai masha langai ngai hpe tam yu nngai, rai ti mung ngai gaw kadai hpe mung n mu nngai. 31 Dai re ai majaw, ngai gaw nye a masin kahtet ai hpe shanhte a ntsa e ru bun dat nna, shanhte galaw dan sai arawn alai hte maren, shanhte hpe wan zawn shamyit kau na we ai.? Tsaw Htum ai dai Madu tsun nu ai.