EZEKELA LAIKA
(EZEKIEL)
Ga Nhpaw
Myihtoi Ezekela gaw Yerusalem hkrat sum mat ai 586 B.C. shawng daw hte hpang daw na prat ladaw aten laman, Babelon mung e bawng dung hkrum let nga nga ai. Shi a myihtoi ga gaw Babelon mung e bawng dung ai ni hte Yerusalem amyu masha ni hpe sha-ang nna tsun ai ga rai nga ai. Ezekela Laika hta ahkyak madung daw kru nga nga ai. Dai ni gaw, 1) Karai Kasang gaw Ezekela hpe myihtoi amu gun na matu shaga la ai lam. 2) Amyu masha ni a ntsa Karai Kasang a tara jeyang ai lam hte seng nna mung, du sa wa na Yerusalem a hkrat sum lam hte hten za lam ni hte seng nna sadi jaw ai lam ni. 3) Madu a amyu masha ni hpe dip gamyet sha nna lam woi shadam nga ai kaga masha amyu baw ni a ntsa e shi a tara jeyang na hte seng nna tsun ai mungga ni. 4) Yerusalem hkrat sum mat ai hpang Israela a matu shalan shabran ai ga hte dan hkung wa na du na ra ai aten a ga sadi. 5) Goga hpe ninghkap ai myihtoi ga. 6) Bai gaw gap na Nawku Htingnu hte mungdan hte seng ai Ezekela a sumla hkrang, ni rai nga ai.
Ezekela gaw kam sham myit kaba nna myit jasat kung hpan ai wa rai nga ai. Shi a kraw kata na mu mada ai lam law law gaw myit shingran hku shadan dan ai hte shi a mungga law law hpe mung dan leng ai masat kumla shamu shamawt ai hku nna shaleng da nga ai. Ezekela gaw myit wenyi a kata lam ningnan bai gram lajang la ra ai hte tinang galaw shut ai yubak mara a matu, marai hkum shagu hta lit nga nga ai hpe grau lachyum shaleng da nga ai. Shi gaw amyu baw a asak hkrun lam ningnan hpe bai gram lajang la na matu shi myit mada ai hpe mung htawn tsun wu ai. Shi gaw hkinjawng hku nna mung, myihtoi hku nna mung, Nawku Htingnu kata na amu hte chyoi pra ai amu a ra kadawn ai lam hta lak san myit lawm ai wa rai nga ai.
1
EZEKELA SHAWNG MU AI KARAI KASANG A SHINGRAN (1:1-7:27)
Ya sumshi ning ngu na shata mali a manga ya shani e, Babelon mung na Hkebara hka nu makau hta bawng dung ai Yuda masha ni hte Buzi a kasha ngai hkinjawng Ezekela ni nga nga yang, sumsing lamu hpaw malang wa nna Karai Kasang a shingran hpe ngai mu nngai. (Dai gaw Hkawhkam Yehoiahkin bawng rim hkrum mat wa ai manga ning na ai hpang byin wa ai lam rai nga ai.) Ref 1:2: 2Hk 24:10-16; 2Hl 36:9-10. Dai Babelon mung Hkebara hka nu hka kau e, Madu ngai hpe tsun ai ga na ai hte shi a daru magam n-gun atsam hpe ngai hkam sha ni ai.
Ngai sharawt mada yu ai shaloi, dingdung maga de na bung sa wa ai nbung laru hpe mu nngai. Htat ai sumwi kata kaw na gala ai myihprap wan gaw gala nga nna sumsing lamu grup grup hkan htoi gala ai hte myihprap wan gala ai shara mi hta magri mang zawn htoi tu kabrim ai arai lama mi mung nga nga ai. Dai nbung laru a ka-ang hta shinggyim masha hkrang hte bung ai dusat amyu mali nga nga ai hpe ngai mu nngai, Ref 1:5: Shr 4:6. rai ti mung, shanhte langai hte langai hta myi man mali li, singkaw mali li tu nga ai. Shanhte a lagaw ni malang nga ai, shanhte a lahkru ni gaw dumsu usu lahkru zawn rai nga ai. Shanhte gaw arut shatsawm tawn ai magri mang zawn htoi kabrim nga ai. Dai sha n-ga, shanhte a myi man man mali hte singkaw mali hta jan nna masha lata mali hpra tu nga ma ai, singkaw shagu a npu hta lata langai hpra tu nga ai. Dusat amyu mali a singkaw lahkawng hkawng hpe hpyan shapraw da ma ai; dai dusat mali ni gaw shanhte a singkaw matu ni shada da hkra nhtawm, man mali bung ai hkrang shapraw ma ai. Shanhte shamu hkawm wa ai shaloi, shanhte a hkum ni hpe n kayin ra ai sha, man ang ang de hkawm wa ma ai.
10 Dai hkrung nga ai dusat shagu hta kaga ga re ai myi man amyu mali rawng nga ai. Dai ni gaw man maga de masha a myi man, hkra maga de hkanghkyi myi man, pai maga de usu myi man hte shingdu maga de galang myi man ni rai ma ai. Ref 1:10: Eze 10:14; Shr 4:7. 11 Dai dusat amyu shagu a singkaw lahkawng sharawt da ma ai, langai hte langai a singkaw matu shada da hkra hkat ma ai; shanhte a kaga singkaw lahkawng hpra hpe gaw tinang a hkum ni hta gumba bang da nga ma ai. 12 Dai dusat shagu gaw man mali de myi man yawng ma ai, shaloi dai hpung gaw shanhte hkawm mayu ai shara de hkum n kayin la ra ai sha hkawm sa lu ma ai.
13 Dai dusat ni a lapran e agrung nga ai wan shanan zawn re ai arai lama mi tut e shamu hkawm nga ai. Dai wan shanan gaw grung wa nna myihprap wan gala ya nga ai. Ref 1:13: Shr 4:5. 14 Dai dusat ni gaw shanhte hkum hpe myi hprap wan gala ai daram lawan ai hku shawng de, hpang de akajawng sha kagat sa ma ai.
15 Ngai gaw dai dusat mali hpe mada yu nga yang, shanhte langai hte langai hta maga mi de langai ngai rawng nna ga de hkra nga ai leng dingsen mali hpe ngai mu nngai. Ref 1:15-21: Eze 10:9-13. 16 Dai leng dingsen mali hte gaw maren bung nga ai; langai hte langai gaw manu dan nlung zawn htoi tu nga ai, dingsen kata e dingsen chyai ai zawn bang da nga ai, 17 shaloi, dai leng dingsen ni gaw kaning re ai man mali de mung hkawm lu nga ai. 18 Leng hkawp ni gaw myi ni hte hpring nga ai. Ref 1:18: Shr 4:8. 19 Dai dusat ni hkawm sa ai aten shagu, leng dingsen ni mung shanhte hte rau chyai nang nga ai, dai dusat ni ga ntsa kaw nna rawt lung wa ai yang, leng dingsen ni mung hkan nang nga ai. 20 Dai dusat ni gaw leng dingsen ni hpe hkang da mu ai majaw, dusat ni shanhte ra ai de hkawm sa shagu, leng dingsen ni mung tup hkrak hkan nang nga ma ai. 21 Dai rai nna, dai dusat ni hkawm ai shing n rai hkring sa ai aten hte ntsa de rawt lung wa ai aten shagu hta dai leng dingsen ni mung tup hkrak hkan nang nga ma ai.
22 Dai dusat ni a baw ntsa e pat zawn kabrim gala nga ai lamu madin lama mi nga nga ai. Ref 1:22: Shr 4:6. 23 Dai lamu madin npu e dusat ni tsap nga ma ai, shanhte langai hte langai a singkaw lahkawng hpe shada da ang ang kahpyan da nhtawm shanhte a hkum ni hpe ngam ai singkaw lahkawng hpra hpra hte ka-up da ma ai. 24 Shanhte pyen hkawm wa ai shaloi, dai singkaw a ngoi wu ai nsen gaw panglai hka wu kadu ai nsen zawn mung, hpyen luksuk kaba jahtau garu ai nsen zawn mung, Chyahtum Chyalai N-gun Rawng Ai Karai Kasang a nsen zawn nga nna wu kadu ai nsen hpe ngai na nngai; shanhte gaw pyen ai kaw na hkring ai shaloi, shanhte a singkaw ni hpe gumba bang da nga ma ai. Ref 1:24: Shr 1:4-15; 19:6. 25 Rai ti mung, shanhte a baw ntsa lamu madin a ntsa kaw na wu kadu ai nsen gaw naw ngoi nga ai.
26 Dai lamu madin a ntsa e nila lung seng hte galaw da ai tingnyang zawn re ai lama mi mung naw nga nga ai; dai tingnyang a ntsa e masha zawn san ai wa langai mi dung nga ai. Ref 1:26: Eze 10:1; Shr 4:2-3. 27 Dai wan shinglet a ka-ang e, magri mang zawn htoi kabrim ai hkrang nga nga ai rai nna, dai gaw htoi kabrim ai nhtoi hte yawng a ntsa e htoi tu nga ai; Ref 1:27: Eze 8:2. 28 dai yawng a ntsa e htoi tu ai nsam gaw n-goi latum a nsam ni rai nga ai. Dai gaw dai Madu a hpung shingkang dan hkung ai nsam hpe shapraw dan ai shi a htoi kabrim ai shara rai nga ai.
Dai lam hpe ngai mu ai shaloi, ngai gaw ga ntsa e myi man dagup da nngai. Dai hpang nsen langai hpe ngai na nngai.
Dai lam hpe ngai mu ai shaloi, ngai gaw ga ntsa e myi man dagup da nngai. Dai hpang ngai gaw nsen langai na nngai.