8
Hpaji rawng ai wa chyu sha arung arai a lachyum hpe teng teng chye lu nga ai. Hpaji byeng-ya gaw shi hpe mani shangun nna n ju ai myi hte yu ai nsam hpe jahkoi kau ya nga ai.
Hkawhkam wa hkang ai hte maren galaw u; Karai Kasang hpe tin shapun re ai ga sadi hpa mung hkum jaw et. Dai hkawhkam wa gaw shi sharawng awng ai amu hpa mung galaw lu nga ai, dai majaw shi a man kaw nna pru mat wa u; dai zawn re ai hkrit tsang shara hta hkum nga nga et. Hkawhkam wa gaw daru magam ahkang aya hte galaw ai rai nna shi galaw ai amu hpe kadai mung dakat lu ai n rai. Shi a hkang da ai ga hpe nang madat nga dingsa, nang shim lum nga ndai; hpaji rawng ai wa chyawm gaw dai hpe gara hku galaw na hte galoi aten galaw na chye ginhka nga ai. Lam magup hpe galaw na matu jaw hkrak ai ahkying aten hte mai ang lam nga nga ai, rai ti mung, anhte mahtang kachyi mi sha she chye nga ga a hka! Anhte kadai mung hpa byin wa na lam n chye ga ai; anhte hpe tsun dan na masha kadai mung n nga nga ai. Kadai mung tinang hkum hpe n si shangun lu ai n rai; tinang a si nhtoi hpe htawt sit kau lu ai n rai. Si hkrung si htan gaw hpyen majan kaw na hprawng lawt lu ai n rai, kadai mung n hkru ai amu a shingdu e makoi nga lu ai n rai.
Ndai mungkan ga hta byin nga ai amu ni a lam ngai myit sumru yu yang, masha nkau mi daru magam n-gun rawng nna nkau mi mahtang shanhte a npu hta nni nkri hkrum sha nga ai mungkan rai nga ai hpe ngai mu se ai. 10 Rai sa, n hkru ai masha ni shanhte a lup sung hku ni hta lup makoi da hkrum nga ma ai hpe ngai mu ni ai; rai ti mung, lup wa de na bai nhtang wa ai masha ni gaw n hkru ai amu galaw shapraw ai shanhte a mare hta sha shanhte hpe shakawn ma ai. Dai mung kaman lila rai nga ai.
11 Masha gaw ru hka amu ni hpe hpa majaw aloi loi sha shut hpyit nga a ta? Hpa majaw nga yang, Ru hka amu hpe alawan ari jaw ai n rai. 12 Yubak kap ai wa gaw ru hka amu latsa lang shut hpyit ti mung naw hkrung nga ai. Oh rai sa, shanhte ning nga tsun ai ga hpe ngai chye nngai: ?Karai Kasang a ga hpe madat mara ai rai yang, lam magup jaw hkrak wa na ra ai, 13 rai ti mung, dai chyawm gaw tara n lang ai wa a matu ngamu ngamai lam rai na ra ai n rai. Shanhte a asak hkrun lam gaw shingnip zawn rai nga ai; Karai Kasang a ga hpe shanhte n madat nga ma ai majaw asak naw kaji yang shanhte si mat na mara ai.? 14 Rai ti mung, dai gaw lachyum n pru ai ga rai nga ai. Mungkan ga hta hpa byin ai hpe yu yu u; kalang lang ding hpring ai masha ni gaw tara n lang ai ni a ari hpe hkam la chye nga ai; tara n lang ai masha ni mung ding hpring ai ni a shagrau sha-a ai kumhpa hkam la chye nga ai. Dai mung kaman lila rai nga ai ngu, ngai tsun nngai.
15 Dai rai nna, anhte gaw anhte hkum nan kabu gara ang nga ga ai ngu nna ngai myit hkawn nngai, hpa majaw nga yang, anhte gaw ndai asak hkrun lam hta lu lu sha sha rai nna anhte hkum nan kabu pyaw nga ga ai. Ndai mungkan ga hta Karai Kasang anhte hpe jaw da sai asak hkrung nga ai laman magam amu anhte galaw ra ai zawn yawm dik ndai amu hpe anhte galaw lu nga ai.
16 Ngai gaw hpaji chye ai wa tai wa lu hkra shakut ai hte ndai mungkan ga hta hpa byin wa nga ai hpe sharin la ai aten shagu, shani shana n lu yup ai hpe ngai dum chye nngai. 17 Karai Kasang hpa galaw ai hpe galoi mung n chye na lu nga ai. Nang kade wa shakut shaja ai rai tim nang galoi mung mu tam shapraw lu na n rai. Hpaji rawng ai ni gaw chye na mai nga ai, rai ti mung shanhte chye ma ai n rai.