5
1 Nawku Htingnu de sa wa yang, sadi sahka rai nga u. Dai de sa nna sharin hkam la ai gaw kaja ai hte n kaja ai hpe n chye nna angawk ai ni a nawng jau ai shagu hkungga ni hta grau kaja nga ai.
2 Nang garai n shaga yang, shawng myit yu u. Karai Kasang hpe tin shapun ga sadi hkum jaw et. Shi gaw sumsing lamu e nga nga nna, nang mahtang ginding aga ntsa e nga nga ndai, dai re ai majaw nang shaga ang ai hta jan nna hkum shaga et.
3 Grau nna nang myit yu magang, n kaja ai yup mang ni grau mu magang rai nga ai. Grau nna ga tsun shalaw magang, angawk ai lam grau tsun mayu magang rai nga ai.
4 Dai rai nna, Karai Kasang hpe ga sadi jaw ai shaloi, dai hpe lawan lu ai daram lawan nna shatup u. Shi gaw angawk ai wa hpe akyu jashawn ai n rai. Galaw na ngu ga sadi tawn ai amu hpe galaw u.
5 Ga sadi tawn nna dai hpe n hkan shatup na hta ga sadi hpa mung n jaw ai gaw grau nna kaja nga ai.
6 Na n-gup gaw na hkum hpe hkum shut shangun nga et; ngai shut ni ai nga nna Karai Kasang a hkinjawng wa a man e tsun na hkum shapraw et. Karai Kasang hpe hpa majaw masin pawt shangun nga n ta? Nang galaw ai amu hpa majaw shi hpe jahten kau shangun nga n ni?
7 Nang yup mang kade mi mu ti mung, nang galaw ai amu kade mi akyu n rawng ti mung, nang kade mi ga shaga ti mung, nang gaw Karai Kasang hpe naw hkrit hkungga lu na rai ndai.
8 Up hkang ai ni gaw matsan mayan ni hpe dip gamyet zingri zingrat ai hte teng man rap ra ai tara hpe ningdang kau nna shanhte a ahkaw ahkang ni hpe shanut kau ai hpe nang mu yang hkum yu mau et. Du shagu gaw shi a ntsa na wa a makawp maga la ai hkrum nga ai. Shan lahkawng mung grau tsaw ai du ni a makawp maga la ai naw hkrum nga ai.
9 Hkawhkam wa du hkra pyi hkauna hta shamyet shanat nga ai.
10 Nang gumhpraw marin ndai rai yang, galoi mung myit dik lu na ndai n rai; sut su na matu marit nga ai rai yang, nang ra ai arai yawng mayawng galoi mung lu la na ndai n rai; dai mung kaman lila rai nga ai.
11 Nang sut su wa magang, nang jaw sha na n-gup grau law magang rai nga ai. Nang hkam la lu ai arai yawng mayawng gaw machye machyang hpaji rai nga ai.
12 Amu galaw ai wa gaw kaji sha mi sha lu ti mung, law law lu sha ti mung shi yup pyaw nga ai. Sut su ai wa chyawm gaw shi kade mi lu ti mung shi hpe myit ru shangun nga ai.
13 Ndai mungkan ga hta hkrit hpa amu langai naw nga nga ai hpe ngai mu se ai. Masha gaw aten ladaw langai a matu shanhte a gumhpraw hpe mahkawng da ma ai; dai hpe shanhte ra kadawn jang,
14 dai ni yawng n shawp ai lam hta ginlut mat nna shanhte a kashu kasha ni hpe ngam da ya na sut pyi htum mat chye nga ai.
15 Anhte gaw ndai mungkan ga de kaman hte shang wa ga ai zawn kaman hte ndai mungkan ga kaw na pru wa ga ai. Anhte a magam bungli yawng byin tai tim pyi gaw anhte a lata hta hpa mung lang wa lu nga ga ai n rai. Ref 5:15: Yob 1:21; Shk 49:17; 1Tm 6:7.
16 Dai gaw n jaw nga a hka! Shanhte sa wa ma ai hte maren bai pru mat wa ma ai. Nbung lu rim hkra shakut ai anhte galaw shakut ai gaw hpa baw akyu hkam la lu na rai ta?
17 Anhte gaw nsin kata e nga nga ga ai rai nna yawn hkyen ai, myit ru myit tsang ai, masin pawt ai hte machyi makaw hkrai hkrum sha nga ga ai.
18 Yu u, Karai Kasang shi hpe jaw da sai aprat kadun mi laman, shi galaw da sai amu hta, lu let, sha let, kabu gara rai ngamu ngamai hkra galaw lu ai wa kadai mung mai kaja htum ai lam rai nga ai hpe ngai mu tam da se ai. Dai gaw masha a gam maka rai nga ai.
19 Karai Kasang gaw anhte hpe sut gan hte sut rai jaw nga ai, dai hta anhte hpe kabu gara shangun ai rai yang anhte gaw chyeju dum ang ai hte anhte galaw sai amu magam a ngamu ngamai ai hta kabu gara lu na rai ga ai; dai gaw Karai Kasang kaw na kumhpa rai nga ai.
20 Karai Kasang anhte hpe kabu gara nga na ahkang jaw da nga sai majaw, asak aprat kade mi kadun ti mung dai hpe anhte nau wa myit ru na ga ai n rai.