6
1 ?Ndai ni gaw nanhte hpe sharin achyin ya na matu, dai Madu nanhte a Karai Kasang ngai hpe hkang da ai tara ni yawng rai nga ai. Nanhte shang madu la hkyen nga ai mungdan hta dai ni hpe hkan sa madat mara lu na rai myit dai.
2 Ngai nanhte hpe jaw ya nga ai mungdan hta nanhte hte nanhte a matu mara ni hkrung nga ai prat dingsa, dai Madu nanhte a Karai Kasang hpe shagrau sha-a lu myit ga, shi hkang da ai tara ni yawng hpe hkan sa madat mara nga mu. Shaloi dai mungdan hta prat dingsa shanu nga lu na rai myit dai.
3 Israela amyu masha ni e, dai hkang da ai ga ni hpe madat mara nna hkan galaw nga mu! Dai Madu anhte a kaji kawa ni a Karai Kasang a ga sadi nga ai hte maren, nanhte yawng ngamu ngamai wa nna n-gun rawng ai amyu kaba tai wa nhtawm ga sau hte hpring nna ningru ningja sut su ngamai ai mungdan hta nga lu na rai myit dai.
4 ?Israela e, ndai ga hpe adum nga mu! Dai Madu anhte a Karai Kasang chyu sha Madu rai nga ai. Ref 6:4: Mrk 12:29.
5 Dai Madu na a Karai Kasang hpe na a myit kraw lawang mahkra hte, na a asak mahkra hte na a n-gun lagaw mahkra hte tsaw ra nga u. Ref 6:5: Mat 22:37; Mrk 12:30; Luk 10:27.
6 Dai ni ngai nang hpe jaw ya nga ai ndai hkang da ai ga ni hpe galoi mung hkum malap kau et. Ref 6:6-9: Trj 11:18-20.
7 Na a kasha ni hpe dai ga sharin ya u. Nta e nga yang mung, hkawm sa nga yang mung, hkring sa nga yang mung, magam bungli galaw nga yang mung, ga dai hpe atsun nga na rai ndai.
8 Ga dai hpe na a lahpum hta gyit shakap da nna na a kahtan hta shadum ai masat kumla langai zawn hkang da na rai ndai.
9 Ga dai hpe na a nta chyinghka hkadun ni hte mare chyinghka ni hta ka da lu na rai ndai.
10 ?Dai Madu na a Karai Kasang gaw na nji nwa Abraham, Isak hte Yaku ni hpe ga sadi jaw da sai hte maren, nang n de da ai dai sut gan hte hkum ai mare kaba ni Ref 6:10: Nin 12:7; 26:3; 28:13.
11 nang n tam bang ai gun rai ni hte hpring chyat nga ai nta ni, nang n tawk htu ai hka htung ni, nang n hkai tawn ai sabyi sun, tsanlun sun ni, shi nang hpe jaw na rin dai. Dai Madu nang hpe dai mungdan de woi shang wa nna nang sha mayu ai yawng hkam la lu ai shaloi,
12 mayam tai nga ai Egutu mung kaw na nang hpe hkrang shaw wa ai dai Madu hpe n malap kau myit ga, sadi nga mu.
13 Dai Madu nanhte a Karai Kasang hpe shagrau sha-a nna shi hpe chyu sha nawku nhtawm shi a mying ningsang hta sha nanhte a ga sadi ni hpe tawn da lu na rai myit dai.
14 Kaga karai shaje ni hpe mung, nanhte a grup yin e nga ai masha amyu ni a hpara shaje kaning re ai hpe mung nawku lu na myit dai n rai.
15 Kaga karai shaje ni hpe nanhte nawku myit dai rai yang, nanhte hte rau anga nga ai dai Madu nanhte a Karai Kasang gaw shingjawng kashun ai hpe n hkam sharang lu ai majaw dai Madu a masin kahtet ai gaw wan zawn chyi nna, nanhte hpe atsai awai shamyit kau na rai wu ai.
16 ?Masa shara e nanhte galaw myit dai zawn dai Madu nanhte a Karai Kasang hpe chyam dinglik lu na myit dai n rai. Ref 6:16: Pru 17:1-7; Mat 4:7; Luk 4:12.
17 Nanhte hpe jaw ya sai shi a hkang da ai tara ni yawng hpe nanhte teng teng hkan sa madat mara na rai myit dai.
18 Dai Madu tsun ai hku galaw ai gaw jaw hkrak ai hte mai kaja nga ai rai nna dai lam yawng nanhte hta ngamu ngamai wa na ra ai. Dai Madu gaw nanhte a kaji kawa ni hpe ga sadi jaw da sai namhpun kaja ai mung hpe nanhte madu la lu na rai myit dai.
19 Shi a ga sadi hte maren nanhte a gumlau hpyen ni hpe shaden kau lu na rai myit dai.
20 ?Nanhte a kashu kasha ni gaw du na ra ai aten ni hta nanhte hpe, ?Ndai tara ni yawng hpe hkan sa madat mara na matu dai Madu anhte a Karai Kasang anhte hpe hpa majaw hkang da a ni?,? nga nna san na mara ai.
21 Shaloi shanhte hpe, ?Anhte gaw Egutu mung na hkawhkam wa a mayam ni rai nga ga yang, dai Madu gaw shi a galu kaba ai daru magam n-gun hte anhte hpe hkye mawai la mi ai.
22 Egutu masha ni hpe mung, shanhte a hkawhkam wa hte shi a du salang ni hpe mung mauhpa lamik kumla ni hte hkrit hpa amu ni hpe shi galaw dan nu ai hpe anhte a myi hte chyaw mu lu saga ai.
23 Anhte a kaji kawa ni hpe shi jaw na ngu nna ga sadi tawn da nu ai hte maren, ndai shara de anhte hpe woi wa nhtawm ndai mungdan anhte hpe jaw ya na nga, Egutu mung kaw na anhte hpe shalawt la mani ai.
24 Dai hpang ndai tara ni yawng hpe hkan sa madat mara nhtawm shi hpe shagrau sha-a na matu dai Madu anhte a Karai Kasang hkang da mi ai hte maren anhte hkan sa ga ai rai yang chyawm gaw anhte a amyu hpe shi tut nawng bau sin ya ai hte ngamu ngamai shangun na ra ai.
25 Karai Kasang anhte hpe hkang da sai hte maren, anhte gaw lam magup hta sadi sahka hte hkan sa ga ai rai yang gaw anhte hta shi awng sharawng na rai wu ai,? ngu nna tsun dan na rai ndai.