1 ?Dai Madu nanhte a Karai Kasang hpe tsaw ra let, shi a tara ni yawng hpe tut nawng madat mara hkan sa na rai myit dai. 2 Dai Madu hte rau nanhte hkrum kadup ai mahkrum madup lam a majaw nanhte sharin la lu manit dai shi a lam hpe dai ni adum nga mu. Dai gaw nanhte a kashu kasha ni n rai, dai mahkrum madup lu la sai nanhte she rai nga ai. Shi a galu kaba ai daru magam n-gun hte chyalai n-gun hte hpring ai shi a mauhpa magam amu ni hpe nanhte mu manit dai. 3 Egutu hkawhkam wa hte shi a mungdan ting hta shi hpa galaw nu ai hpe nanhte mu manit dai. Ref 11:3: Pru 7:8-12:13. 4 Egutu hpyen luksuk ni shanhte a gumra ni, hpyen leng ni hte nanhte hpe hkan shachyut nang ma yang, shanhte hpe Nawng Hkyeng hka hta shalup bang kau nna tsep kawp shatsai kau ai hpe nanhte mu manit dai. Ref 11:4: Pru 14:28. 5 Ndai shara de nanhte garai n du myit yang nanhte a matu nam mali hkan e dai Madu galaw dan sai amu ni hpe chye nga myit dai. 6 Rubin a amyu bawsang hta na Eliaba a kasha Dahtan yan Abiram yan hpe shi hpa galaw kau nu ai hpe myit dum nga myit dai. Shing rai aga gaw ga mahka wa nna, shan hte shan a dinghku masha ni, sum ni, shan a mayam ni hte yam nga ni yawng hpe masha shagu mu mada lu ai shara e, mayu kau nga ai. 7 Rai sa, dai Madu galaw dan nu ai ndai mauhpa amu kaba yawng hpe mu sai ni rai nga myit dai.

8 ?Dai ni, nanhte hpe ngai jaw mase ai tara ni yawng hpe madat mara hkan sa nga mu. Shaloi nanhte hka rap lu nhtawm nanhte shang hkyen ai mungdan hpe madu la lu na rai myit dai. Ref 11:8: Bhk 16:31-32. 9 Dai Madu gaw nanhte a nji nwa ni hte shanhte a matu mara ni hpe jaw na ngu nna ga sadi jaw da sai, dai sut su ngamu ngamai nna ga sau hte hpring nhtawm ningru ningja ai mungdan hta aten na na nanhte shanu nga lu na rai myit dai. 10 Dai nanhte shang madu la hkyen ai mungdan gaw shawng e nanhte nga lai wa yu sai Egutu mung hte bung ai n rai. Dai yang e nanhte nli gat nhtawm hkai sun ni hta asi asat hka hpai jaw ra myit ti mung, 11 nanhte shang madu la hkyen nga ai mungdan chyawm gaw bum lang hkaraw nhkap sawng ai hte marang htu nna hka law law lu ai mungdan rai nga ai. 12 Dai Madu nanhte a Karai Kasang gaw dai mungdan hpe bau sin nna shaning tup dai hpe ayu nga ai. 13 ?Dai rai nna dai ni ngai nanhte hpe jaw ya sai hkang da ai ga ni hpe madat mara hkan sa let dai Madu nanhte a Karai Kasang hpe tsaw ra nna myit masin mahkra hte shi hpe daw jau nga mu. 14 Nanhte hkan galaw myit yang gaw nanhte a matu nsi naisi, sabyi ntsin hte tsanlun sau re ai ni hpe shu la lu hkra mung, nanhte a yam nga hpung ni a matu tsingdu tsingman ni hpe mung mahpawng hpaw marang, hpang shadoi htu marang shi jahtu ya na ra ai. 15 Nanhte gaw nanhte sha mayu ai lusha hkum sumhpa yawng hpe lu la na marin dai. 16 Nanhte gaw kaga karai ni hpe nawku daw jau na nga, dai Madu kaw na lam hkum yit mat nga myit. 17 Dai hpe nanhte galaw myit dai rai yang, dai Madu gaw nanhte hpe masin pawt nna nanhte a lamu ga hpe nai mam n tu mat u ga nga, ja ja hkun hkraw mat hkra marang n jahtu ya na rai wu ai. Shi nanhte hpe jaw ai mungdan gaw kaja nga tim pyi kade n na yang nanhte gaw dai mung e si mat na rai myit dai. Ref 11:13-17: Jaw 26:3-5; Trj 7:12-16; 28:1-14.

18 ?Ndai hkang da ai ga ni hpe adum nga let, manu shadan nhtawm shagrau nga mu. Nanhte a lata lahpum ni hta dai ni hpe hkawn da nna, kahtan ni hta masat langai zawn sumraw da na rai myit dai. Ref 11:18-20: Trj 6:6-9. 19 Nanhte a kashu kasha ni hpe ga dai ni sharin achyin ya mu; nanhte nta e nga nga yang mung, hkawm sa nga yang mung, hkring sa ai hte magam bungli galaw nga yang mung ga dai hpe atsun nga lu na rai myit dai. 20 Ga dai hpe nanhte a nta chyinghka hkadun ni hte mare chyinghka ni hta ka da na rai myit dai. 21 Dai hpang, nanhte a nji nwa ni hpe jaw na nga, dai Madu nanhte a Karai Kasang a ga sadi jaw da ai mungdan hta nanhte hte nanhte a kashu kasha ni aten galu nga nga lu na rai myit dai. Nanhte mung dai yang e, ginding aga ntsa sumsing lamu grin nga dingsa shanu nga lu na rai myit dai.

22 ?Ngai nanhte hpe jaw mase ai tara ni yawng hpe sadi sahka hte madat mara hkan sa nga mu; dai Madu nanhte a Karai Kasang hpe tsaw ra let shi hkang da ai lam magup hte hpe galaw nna shi hta sadi dung nga mu. 23 Dai hpang nanhte rawt lung wa myit yang, dai amyu nlang hte hpe shi shaden shapraw kau nna nanhte hta grau galu kaba ai hte daru magam n-gun grau rawng ai amyu baw ni up nga ai mungdan hpe madu la lu na rai myit dai. 24 Nanhte kabye du ai lamu ga ni yawng gaw nanhte a matu rai nga malit dai. Nanhte a lamu ga gaw dingda maga nam mali kaw nna dingdung maga Lebanon bum ni de du hkra mung, sinpraw maga Uhprat hka nu kaw nna sinna maga Ka-ang Panglai du hkra jat maden mat wa na rai nga myit dai. 25 Dai Madu nanhte a Karai Kasang gaw nanhte du hkawm ai shara shagu hta masha amyu ni hpe hkrit gari shangun na rai wu ai; shi ga sadi tawn da sai hte maren, kadai mung nanhte hpe hkap shingdang lu na ma ai n rai. Ref 11:24-25: Ysh 1:3-5.

26 ?Dai ni, nanhte a lapran e shaman chyeju lam hte dagam dala lam lata la na matu ngai jaw ya nga nngai; 27 dai ni ngai nanhte hpe jaw ya nga ai, dai Madu nanhte a Karai Kasang a hkang da ai ga hpe nanhte madat mara myit yang gaw shaman chyeju lam rai nga ai; 28 rai ti mung nanhte gaw dai hkang da ai ga ni hpe n madat n mara ai sha, lam yit mat nna shawng de nanhte galoi mung n naw n ku yu ai karai shaje ni hpe nawku myit yang chyawm gaw dagam dala ai lam rai na ra ai. 29 Dai Madu gaw nanhte madu la na mungdan de woi shang wa myit dai shaloi, shaman chyeju hpe Gerizim bum kaw nna, dagam dala ai lam hpe Ebala bum kaw nna, nanhte tsun shana na rai myit dai. Ref 11:29: Trj 27:11-14; Ysh 8:33-35. 30 (Dai Bum yan gaw Yawdan hka a sinna maga, Yawdan Kadit hta shanu nga ai Hkanan masha ni a lamu ga hte Gilgala mare makau na More mare na chyoi pra ai hpun ni tu ai shara hte grai wa n tsan ai hta rai nga ai. ) 31-32 Dai Madu nanhte a Karai Kasang jaw ya nga ai mungdan hpe madu la na matu, Yawdan hka rap na nanhte ri ri sha rai nga manit dai. Nanhte gaw dai mung hpe la nna dai yang e shanu nga myit yang, dai ni ngai nanhte hpe jaw ya nga ai tara ni yawng hpe teng teng hkan sa madat mara lu na rai myit dai.