5
1 Lana mi na aten hta, Hkawhkam Belshaza gaw du magam hkying mi hpe hkik hkam ai lusha poi kaba de sa na matu saw shaga dat wu ai; shanhte gaw rau sha sabyi ntsin jawm lu nga ma ai.
2 Shanhte sabyi lu nga ma yang, Belshaza gaw shi a kawa Nebuhkadneza Yerusalem Nawku Htingnu kaw na la wa ai aja gawm, gumhpraw gawm hte ban ni la wa na matu hkang dat wu ai. Hkawhkam wa gaw dai ni hpe la wa shangun wu ai rai nna shi mung, shi a du magam ni, shi a madu jan ni hte shi a lashi num ni dai hta na la lu lu ma ai.
3 Aja gawm ni hte ban ni du wa ai hte rau, shanhte gaw dai hta na sabyi ntsin lu shajang nga ma ai;
4 aja, gumhpraw, magri mang, hpri, hpun hte nlung ni hte galaw ai karai ni hpe shakawn kungdawn nga ma ai.
5 Masha langai mi a lata akajawng sha dan pru wa nhtawm pyengdin ni hta grau htoi kabrim nga ai hkawhkam htingnu na engade chya da ai shakum hta ka hpang wa nga ai. Hkawhkam wa gaw laika ka nga ai lata hpe mu dat wu ai.
6 Shi gaw myi man hten mat nhtawm grai hkrit kajawng mat ai hte lahput mung gari ashun nga wu ai.
7 Shi gaw gumhpan hpan ai ni, hpyi lamum sara ni hte jan shata shagan yu ai ni hpe jashawn la na matu marai langai ngai hpe jahtau tsun wu ai. Shanhte du shang wa ai shaloi, hkawhkam wa gaw shanhte hpe, ?Ya ndai ka da ai lam hte de a lachyum htai dan lu ai wa kadai hpe mung shaba pu nsam rawng ai hkawhkam wa a palawng galu hpun lu nna shi a du grup grup hta shagrau sha-a ai ja kachyi gali lu nhtawm ndai mungdan hta masum ngu na daru magam n-gun rawng htum ai wa tai lu na rai nga ai,? ngu nna tsun wu ai.
8 Hkawhkam wa a hpaji jaw masha ni shawng de sit sa wa ma ai, rai ti mung, kadai mung dai laika hpe n chye hti nga ai; de a lachyum hkawhkam wa hpe n htai dan lu ma ai.
9 Hkawhkam Belshaza myit ru myit yak hkrum mat ai hte myi man grau hten mat wa wu ai; shi a du magam ni hpa gan galaw na n chye myit mat ma ai.
10 Hkawhkam wa hte shi a du magam ni tsun garu nga ai nsen hpe hkawhkam jan a kanu na ai shaloi, lusha gawk de shang wa wu ai. Shi gaw, ?Madu hkawhkam gaw prat dingsa ahkrung nga u ga law! Grai wa hkum ung ang nga et, myi man grai wa hkum hten et.
11 Chyoi pra ai karai ni a wenyi rawng ai wa langai mi na a mungdan hta nga nga ai. Na nwa hkawhkam galaw nga yang, ndai masha wa gaw karai ni a hpaji hte bung ai mai kaja ai nyan, machye machyang hpaji hte hpaji byeng-ya madun dan nga ai. Na nwa Hkawhkam Nebuhkadneza chyawm gaw shi hpe gumhpan hpan ai ni, mandan lakle sara ni, hpyi lamum sara ni hte jan shata shagan yu ai sara ni a hpa-awn shatai da nga ai.
12 Shi gaw laklai ai atsam marai hte hpaji rawng ai wa rai nna, yup mang lachyum htai ya ai lam hta kung kyang ai, gumwai ga ni hpe chye hpyan ai hte makoi magap da ai amu ni hpe lachyum chye shapraw nga ai majaw Belteshaza ngu nna hkawhkam wa shamying ya ai dai Daniela gaw ndai lachyum yawng mayawng nang hpe tsun dan na ra ai,? ngu nna tsun wu ai.
13 Daniela gaw hkawhkam wa a man de kalang lata jashawn la hkrum ai hte hkawhkam wa gaw shi hpe, ?Nang gaw nye wa hkawhkam wa e Yuda mung kaw nna ndai ga de woi wa ai Yuda bawng masha Daniela rai nga a ni?
14 Nang hta chyoi pra ai karai ni a wenyi rawng nna chye chyang ai nyan hte hpaji byeng-ya kung kyang nga ndai hpe ngai na se ai.
15 Ya ndai ka da ai ga hpe hti nna dai ga a lachyum ngai hpe htai dan na matu hpaji jaw ni hte mandan bau ai ni hpe jashawn la ti mung, de a lachyum shanhte n mu tam lu ma ai.
16 Ya chyawm gaw, ndai ga makoi a lachyum ni hte makoi magap ai amu ni a lachyum hpe nang sawk tam lu nga ndai gaw ngai na se ai. Dai rai nna, ndai ka da ai laika hpe nang hti lu ai rai yang, de a lachyum hpa rai nga ai gaw ngai hpe tsun dan e, shaloi nang gaw shaba pu nsam rawng ai hkawhkam palawng galu lu hpun nna na a du hta ja kachyi lu gali ai hte ndai mungdan hta masum ngu na daru magam n-gun rawng ai wa tai na rai ndai,? ngu nna tsun wu ai.
17 Daniela gaw, ?Na a kumhpa ni gaw na a matu she rai nga u ga; shing n rai marai langai ngai hpe jaw u. Dai ka da sai laika ga gaw nang madu hkawhkam wa a matu ngai hti nna, de a lachyum tsun dan na de ai.
18 ?Tsaw Htum ai Karai Kasang gaw na a nwa Nebuhkadneza hpe hkawhkam kaba shatai nna hpung rawng ai sari sadang hte daru magam hpung dagu jaw ya nu ai.
19 Shi gaw nachying galu kaba nga ai rai nna masha amyu baw ni yawng, amyu bawsang ni hte kaga ga amyu myu shaga ai ni yawng hte gaw shi hpe hkrit gari nga ma ai. Shi gaw marai langai ngai hpe sat kau mayu yang, shi galaw nga ai; marai langai ngai hpe jahkrung mayu yang, jahkrung da nga ai. Shagrau sha-a mayu yang, shi shagrau sha-a nna, shagrit kau mayu ai wa hpe shagrit kau nga ai.
20 Rai ti mung shi mahtang gumrawng gumtawng ai hte du ja nna mazut gumshem nga ai majaw shi a hkawhkam tingnyang kaw na hkrat mat ai hkrum ai hte shi hpe shagrau sha-a ai mung n nga mat nga ai.
21 Shi a myit masin gaw dusat langai zawn tai mat nna, shinggyim uhpung hta na shapraw kau ai hkrum nga ai. Shi gaw nam na lawze shazai ni hte rau nga nna, dumsu usu zawn tsingdu sha let numri hkrat ai gangbang shara hkan yup nga ai. Hpang jahtum e, shi gaw Tsaw Htum ai Karai Kasang shi lata la sai kadai hpe rai ti mung masha mungdan ni yawng hpe up hkang na ahkang jaw lu nga ai hpe shi yin la nga ai.
22 ?Rai ti mung, shi a shadang sha rai nga ai nang chyawm gaw dai lam yawng mayawng hpe chye nga ti mung, nang nan shagrit shanem nga ndai n rai.
23 Nang gaw sumsing lamu Madu hpe ninghkap nhtawm shi a Nawku Htingnu na la wa ai gawm ni hte wan ni hpe la jashawn nga ndai. Nang mung, na a du magam ni mung, na a madu jan ni hte na a lashi num ni mung dai ni hta sabyi ntsin lu nhtawm, ja, gumhpraw, magri mang, hpri, hpun hte nlung ni hte galaw nna, myi n mu, na n na, hpa hpe mung n chye ai karai ni hpe shakawn kungdawn myit dai. Nang mahtang na a asak sumri sumdam hte nang galaw ai lam magup hpe yu hkang nga ai Karai Kasang hpe shagrau sha-a nga ndai n rai.
24 Dai re ai majaw Karai Kasang gaw ndai ga ni hpe lata hte ka shangun dat wu ai.
25 ?Ndai hku ka da nga ai: ?Hti hkum, hti hkum, shen dingdaw, ga karan mat ai.?
26 Ndai gaw de a lachyum rai nga ai: Hti hkum, Karai Kasang gaw na a mungdan shani nhtoi hpe hti yu nna jahtum kau nu ai;
27 Shen dingdaw ai: Nang hpe joi hta shen yu yang, namnak nau wa tsang mat nit dai;
28 Ga karan mat ai: Na a mungdan gaw ga karan mat nna Medi hte Persi masha ni a lata de ap kau nu ai.?
29 Belshaza gaw Daniela hpe shaba pu nsam rawng ai hkawhkam wa a palawng galu jahpun ya na matu mung, shi a du hta shagrau sha-a ai ja kachyi noi ya na matu mung shi a shangun ma ni hpe dai shaloi jang hkang dat wu ai. Shi gaw Daniela hpe mungdan hta masum ngu na daru magam aya lu ai shara hta tawn da wu ai.
30 Babelon Hkawhkam Belshaza chyawm gaw dai shana jang sat kau ai hkrum nna,
31 Medi masha Dari gaw shi a asak kru shi lahkawng ning hta hkawhkam daru magam aya hkam la nga wu ai.