DANIELA LAIKA
(DANIEL)
Ga Nhpaw
Daniela Laika gaw Yuda masha ni tara maigan hkawhkam wa a zingri zingrat ai hte dip gamyet sha ai nni nkri hpe ja ja hkam sha nga ai aten hta ka da ai laika rai nga ai. Laika ka sara wa gaw maumwi ni hte shingran ni hpe lang nna Karai Kasang gaw gumshem magam ni hpe jahkrat kau nna Karai Kasang a amyu masha ni hpe daru magam hpung shingkang bai jaw ya na ra ai myit mada lam hte shi a aten na amyu masha ni hpe n-gun atsam jaw ya nga ai.
Ndai laika hta lam madung lahkawng rawng nga ai: 1) Daniela hte shi a bawng dung manang nkau mi Karai Kasang hpe kam sham ai hte shi a ga madat mara nna shanhte a gumlau hpyen ni a ntsa e awng padang hkam la lu ai hte seng ai maumwi ni rai nga ai. Dai maumwi ni gaw Babelon hte Persi hkawseng ni up hkang nga ai aten hta pru wa ai lam rai nga ai. 2) Ndai hta hkawseng mungdan law law ni awng dang rawt lung wa nna bai hkrat sum mat na hpe kumla hkrang hku nna Daniela mu ai shingran shayan ni hte htawng madun nga ai. Babelon mung kaw na hkawt, dip gamyet sha ai tara maigan ni a hkrat sum lam hte Karai Kasang a amyu masha ni a awng padang hkam la lu na lam ni hpe tau tsun da nga ai.
1
DANIELA HTE SHI MANANG NI A MAUMWI (1:1-6:28)
1 Yuda Hkawhkam Yehoiakim hkaw dung ai masum ning e, Babelon Hkawhkam Nebuhkadneza gaw Yerusalem mare hpe htim gasat nna dai mare hpe wang tawn wu ai. Ref 1:1: 2Hk 24:1; 2Hl 36:5-7.
2 Madu gaw Hkawhkam Yehoiakim hpe rim la shangun nna, Nawku Htingnu na sut rai nkau mi hpe mazing la shangun wu ai. Shi hte rau bawng masha nkau mi hpe Babelon mung na shi a karai ni a htingnu de woi wa nhtawm lu mazing la ai sut rai ni hpe htingnu sut gawk ni hta tawn da wu ai. Ref 1:2-4: 2Hk 20:17-18; 24:10-16; 2Hl 36:10; Esa 39:7-8.
3 Hkawhkam wa gaw shi a du salang rai nga ai Ashpena hpe bawng dung hkrum nga ai Israela ni hta na hkawhkam dinghku masha ni hte arawng lu ai du magam ni kaw na shabrang nkau mi hpe lata shaw la na matu hkang dat wu ai.
4 Shanhte gaw ahpraw tsawm ai hte hpaji byeng-ya chye chyang nna atsawm sha kung kyang ai hte chye chyang maka kumla pru nhtawm hkum hkrang ra rawng ai lam hpa mung n nga ai ni rai ma ai. Shanhte gaw hkawhkam wang hta daw jau na matu atsam marai rawng ai ni rai ma ai. Ashpena mung shanhte hpe Babelon ga chye hti, chye ka wa lu hkra sharin ya nga ai.
5 Hkawhkam wa mung hkawhkam wang na masha ni sha ai lusha hte sabyi ntsin hte maren, shanhte hpe shani shagu jaw sha na hkang da wu ai. Dai zawn bau maka la ai masum ning na jang, shanhte gaw hkawhkam wa a man de dan pru na rai ma ai.
6 Dai ni hta na lata la hkrum ai ni gaw Daniela, Hanania, Mishaela hte Azaria hte rai ma ai. Dai ni yawng gaw Yuda amyu bawsang kaw na hkrai rai ma ai.
7 Du salang hpa-awn wa mung shanhte hpe Belteshaza, Shadrak, Meshak hte Abednego ngu nna mying nnan jaw wu ai.
8 Daniela gaw hkawhkam wang na lusha sha ai hte sabyi ntsin lu ai hku nna shi a hkum hpe htung hte maren n san n seng n tai hkrup na matu myit daw dan da nga ai, dai rai nna shi gaw Ashpena hpe karum hpyi ai hte,
9 Karai Kasang gaw Ashpena hpe Daniela a ntsa matsan dum la shangun nga ai.
10 Kaning mi rai tim, Ashpena chyawm gaw hkawhkam wa hpe hkrit wu ai majaw Daniela hpe, ?Hkawhkam wa daw dan da nu ai hte maren, nang lu sha lu na rai ndai; kaga shabrang ni zawn nang n hkam kaja ai zawn rai yang, shi ngai hpe sat kau mai nga ai,? ngu nna tsun wu ai.
11 Dai rai nna, Daniela gaw shi hte shi a manang marai masum hpe yu lajang na matu Ashpena e san tawn da ya ai sin langa hpang de sa wa wu ai.
12 Shi gaw, ?Anhte hpe shi ya tup chyam yu mi, anhte dai laman sha na namlaw namlap hte lu na ntsin sha jaw mi.
13 Dai hpang, hkawhkam wang na malu masha sha ai shabrang ni hte anhte hpe shadawn yu nna anhte kaning san nga ga ai gaw nang daw dan ai hta sha madung nga sai,? ngu nna tsun wu ai.
14 Shi mung shanhte hpe nhtoi shi ya tup chyam shangun na myit hkrum ya wu ai.
15 Ya ndat da ai aten du jang, shanhte gaw hkawhkam malu masha sha ai ni yawng hta grau nna hkam kaja ai hte n-gun ja nga ma ai.
16 Dai rai nna, dai aten kaw nna sin langa wa mung hkawhkam wa hkang da ai lusha jaw na malai shanhte hpe namlaw namlap matut sha shangun wu ai.
17 Karai Kasang gaw ndai shabrang mali hte hpe laili laika hta chye chyang kung kyang ai nyan hpaji hte sumru hpaji jaw ya wu ai. Dai sha n-ga, shi gaw Daniela hpe yup mang shingran amyu myu chye htai lu ai kung kyang ai nyan mung jaw ya wu ai.
18 Masum ning a jahtum aten du jang, Ashpena gaw shabrang ni yawng hpe Nebuhkadneza hpang de woi sa wu ai.
19 Hkawhkam wa shanhte yawng hte ga shaga yu wu yang, Daniela, Hanania, Mishaela hte Azria hte gaw kaga ni hta jan nna shi hpe myit shang sha shangun nga ma ai. Dai rai nna, shanhte gaw hkawhkam wang na masha ni tai wa masai.
20 Ndai marai mali gaw hkawhkam wa san ai kaning re ai ga san hpe mung, manghkang hpe mung shi a mungdan ting hta nga ai lakle sara ni hte mandan bau ai kadai hta mung htam shi grau nna chye nga ai.
21 Persi hkawseng Kuru gaw Babelon mung hpe gasat dang la ai aten du hkra Daniela gaw hkawhkam wang e nga nga ai.