3
1 Ning nga nna tsun ai gaw anhte a lam anhte gumrawng tsun ai zawn nga nga
a ni? Masha nkau mi zawn anhte a lam
madi shadaw ai laika ni nanhte hpe
jaw na ra a ni? Shing n rai, nanhte
kaw na madi shadaw laika hpyi gun na
ra a ni?Ref 3:1: 2Ko 5:12; 10:8,12; Kas 18:27.
2 Nanhte hkum nan masha shagu e hti nna chye lu ai anhte a myit masin
hta ka tawn da ai laika hkum nan rai
nga myit dai.
3 Dai laika hpe Hkristu shi nan ka nhtawm, anhte hte shagun dat ai gaw dan leng nga
ai. Dai laika hpe tsi hte n ka ai sha
hkrung nga ai Karai Kasang a wenyi hte,
bai lungpa ni hta n re ai sha shinggyim
masha ni a kraw lawang ni hta ka da nga
ai.Ref 3:3: Yer 31:33; 1Ko 3:5; Heb 8:10.
4 Anhte ning ngu tsun lu ai gaw, anhte gaw Hkristu a marang e Karai Kasang hta myit
mu myit hkut ai lam lu la ga ai majaw
rai nga ai.
5 Anhte gaw ndai amu hpe galaw lu ga ai ngu nna tsun lu na anhte hta hpa atsam
marai mung n rawng ga ai. Anhte lu ai
atsam mahtang gaw Karai Kasang kaw na
rai nga ai.
6 Anhte gaw ga shaka ningnan a matu amu gun hpai lu u ga, anhte hpe atsam marai
jaw ai gaw Karai Kasang shi nan rai nga ai.
Dai ga shaka ningnan gaw ka da ai tara
hta rawng ai n re ai sha, Wenyi kaw na
rai nga ai. Hpa majaw nga yang laika
hkum hte ka da ai tara gaw asak hpe si
shangun nga ai; dai Wenyi chyawm gaw
asak jahkrung ya nga ai.Ref 3:6: Yhn 6:63;
Gal 3:10; Ehp 3:7; Kol 1:25; Heb 6:6,8.
7 Lungpa hta ka da ai jep ai tara hpe jaw ai shaloi, Karai Kasang a hpung shingkang
htoi kabrim dan pru nga ai. Dai hpung
shingkang a htoi ahkung ai gaw Mawshe a
myi man kaw na yat yat hkoi mat wa magang
nga ai. Rai ti mung nachying wa naw htoi
kabrim nga ai majaw Israela amyu masha ni
shi a myi man hpe n azi yu lu ma ai. Si
hkrung si htan hpe byin shangun ai jep ai
tara hpe dai zawn re ai hpung shingkang
hte jaw ya ai rai yang gaw,Ref 3:7:
Pru 34:1; 28:29-30; Trj 10:1; Rom 7:10.
8 dai wenyi a bungli galaw shamu shamawt ai hte seng ai hpung shingkang gaw grau
nna dan hkung na n rai ni?
9 Yubak mara a ari jaw na matu daw dan ya ai lam hte seng ai magam amu gaw hpung
shingkang hte hpring tsup nga ai rai
yang gaw, hkye hkrang la ai lam jaw ya
ai hte seng ai magam amu gaw gade wa
grau nna hpung shingkang dan hkung na
rai hka!
10 Ya grau nna dan hkung ai hpung shingkang a majaw, shawng de kalang mi grai dan
hkung lai wa sai hpung shingkang gaw
hkoi mat wa sai ngu nna anhte tsun
lu ga ai.
11 Jahkring mi sha grin nga chye ai magam amu pyi hpung shingkang rawng nga ai rai
yang gaw agrin nga ai magam amu hta e
gade wa grau nna hpung shingkang rawng
nga na n rai hka!
12 Anhte gaw ning re ai myit mada ai lam lu ga ai majaw, anhte nden ja ga ai.
13 Anhte gaw Mawshe zawn n rai ga ai. Shi gaw shi a myi man kaw na htoi
kabrim ai hpung shingkang hkoi mat
wa sai hpe Israela masha ni n mu lu
mu ga, shi a myi man hpe man magap
hte magap htinggrum da wu ai.
14 Israela amyu masha ni a myit masin ni gaw kaja wa pat shinggang da nga
malu ai. Dai ni du hkra pyi gaw ga
shaka dingsa laika ni hpe hti ai ten
shagu shanhte a myit masin ni hpe man
magap dai hte naw magap htinggrum nga
malu ai. Masha langai mi gaw Hkristu
hta asak hkrung ai shaloi she dai man
magap hpe gun kau lu nga ai.
15 Dai ni du hkra pyi shanhte gaw Mawshe a tara hpe hti ai ten shagu hta dai
man magap gaw shanhte a myit mang ai lam
ni hpe naw magap htinggrum nga malu ai.
16 Rai ti mung dai magap hpe gun kau lu ai. Chyum Laika hta Mawshe a lam tsun da ai hte maren, shi gaw Madu hpang de kayin ai shaloi shi a man magap hpe gun kau ya hkrum nga ai. Ref 3:16: Rom 11:23,26.
17 Ya ?Madu? ngu ai gaw dai Wenyi hpe ngu ai rai nga ai. Madu a Wenyi shanu ai
shara hta shanglawt ahkang mung nga nga
ai.
18 Dai rai nna anhte yawng gaw man magap hpaw kau sai myi man ni hte dai Madu
a hpung shingkang a shingna hpe bai
nhtang htawng madun nga ga ai. Dai
hpung shingkang nan wenyi ngu ai Madu
kaw na du sa nna Madu hte grau grau
bung jat wa ai hpung shingkang maga
de anhte hpe galai shai wa shangun mi
ai.