12
1 Gumrawng ai lam gaw akyu n nga ai rai ti mung dai Madu kaw na shingran ni
hte madun dan ai lam ni hte seng nna
ngai gumrawng ai ga naw tsun nga nngai.
2 Hkristan la langai mi gaw lai wa sai shi mali ning ten hta tsaw dik ai
sumsing lamu de woi shapoi lung mat
wa hkrum wu ai ngai chye nngai. (Dai
zawn shapoi hkrum ai gaw hkum hkrang
hte rai kun? shing n rai hkum hkrang
n lawm ai kun? ngai n chye nngai,
Karai Kasang sha chye nga ai.)
3 Ngai bai kahtap tsun n ga, dai masha wa hpe Paradisu de shapoi mat wa ai
hpe ngai chye nngai. (Bai dai gaw
kaja wa byin ai rai kun? shing n rai,
yupmang shingran sha rai kun? Karai
Kasang sha chye ai.)
4 Shi gaw dai yang e, shinggyim masha a ga hkum ni hte n mai tsun ai, masha
a n-gup hte tsun na ahkang n nga ai
ga ni hpe na la wu ai.
5 Dai rai nna dai wa a lam ngai gumrawng na nngai, rai ti mung ngai hkum nan
gade gawng kya nga ai lam ni hta kaga
nye a lam ngai n gumrawng na nngai.
6 Ngai gumrawng mayu yang mung, angawk angak ngai tai na nngai n rai; hpa
majaw nga yang, ngai gaw teng man ai
sha tsun na rai nga ai. Rai ti mung
ngai n gumrawng na nngai, hpa majaw
nga yang, kadai wa mung ngai galaw ai
lam hte tsun ai ga hpe mu lu na lu ai
majaw ngai hpe chye ai hta jan nna
ngai hpe htang kaba ai lam n byin
shangun mayu nngai.
7 Ngai mu lu ai jahtum chyalai mau hpa shingran a majaw ngai hta myit kaba
gumrawng ai lam n nga u ga, nye a hkum
shan hta ju machyi ai lam langai mi
hkam sha nga nngai. Dai machyi ai lam
gaw Satan wa e shangun dat ai kasa wa
zawn ngai hpe abyen nna nye a gumrawng
ai kawng hpe daw kau ya nga ai.
8 Dai machyi ai hpe yeng seng kau ya na matu ngai gaw dai Madu kaw masum lang
tup akyu hpyi ni ai.
9 Rai ti mung Karai Kasang gaw, ?Nye a chyeju gaw na a matu ram ging nga ai,
hpa majaw nga yang, nang gawng kya ai
shaloi nye a n-gun atsam gaw ja dik rai
nga ai,? nga nna ngai hpe mahtai jaw
ni ai. Dai re ai majaw Hkristu a n-gun
atsam gaw ngai hpe makawp maga nna
shingbyi shangun nga ai lam myit hta
hkam sha lu n ga, nye a gawng kya ai
lam a majaw ngai kabu gumrawng n ma
rai nga nngai.
10 Dai rai nna ngai gaw Hkristu a jaw e hkam ai gawng kya ai lam ni jahpoi
asawng ai, kyin dut ai. zingri zingrat
hkrum ai, hte yak hkak ai lam ni a
majaw kabu myit dik nga nngai, hpa
majaw nga yang ngai gawng kya ai
shaloi ngai n-gun atsam rawng nga
nngai.
11 Ngai gaw angawk ai wa zawn rai nga nngai. Nanhte mahtang ngai hpe dai zawn rai
shangun manit dai. Nanhte ni mahtang
ngai hpe tau madi shadaw ai lam madun
ang ai ni rai nga myit dai. Hpa majaw
nga yang, ngai gaw hpa n re ai wa rai
nga yang pyi gaw, nanhte a laksan ahkyak
shatai ai ?Kasa ni? hta gara hku nna
mung n grit nga nngai.
12 Ngai gaw kasa langai mi rai nga ai lam sakse madun na matu law la ai lamik
kumla ni hte mauhpa amu ni hpe nanhte
a ka-ang e myit galu kaba hte galaw dan
lai wa ni ai.
13 Nanhte kaw na karum gumhpraw n la ai hta lai nna, ngai nanhte hpe kaga buga
hpung ni hte madang yawm ai hku galaw
lai wa yu ni ai kun? Ndai zawn n tara
ai hku galaw hkrup ai hpe chyeju hte
mara naw dat kau ya mi.
14 Ya ngai nanhte kaw masum lang ngu na sa du kawan na jin jin rai nga ni ai
rai nna, ngai nanhte hpe kaga mi n
htet shatsang na ni ai. Hpa majaw nga
yang, ngai ra ai gaw ja gumhpraw hpe
n rai, nanhte hpe sha ngai ra nga nngai.
Kaja wa nga yang, kashu kasha ni gaw
kanu kawa ni a matu sutgan mahkawng da
na n ang ai, kanu kawa ni mahtang she
shanhte a kashu kasha ni a matu
mahkawng da na ang nga ai.
15 Ngai gaw nanhte hpe karum na matu nga jang, ngai lu malu yawng mayawng hte
nye a hkum hkrang hpe pyi kabu gara
jai lang kau na ra sharawng na nngai.
Ngai nanhte hpe grai tsaw ra ai majaw,
nanhte ngai hpe loi sha tsaw ra na
rai ni?
16 Dai majaw ngai gaw nanhte hpe lit shali ai wa n re ai lam nanhte myit hkrum yin
la na myit dai; rai ti mung ngai gaw
zai hte nanhte hpe masu hkalem ai hku
mahkam hkam la ai nga nna marai langai
ngai tsun na ra ai.
17 Ngai gara hku wa masu hkalem sha lai wa ni ta? Nanhte hpang de ngai shangun
dat ai kasa ni hta na kadai wa hku nna
nanhte a arung arai hpe ahkaw ahkang
la sen di sha nga nngai kun?
18 Ngai gaw Titu hpe nanhte hpang de sa na matu hpyi lajin nna shangun dat nngai.
Kaga Hkristan hpu nau langai mi mung
shi hte rau hkan nang sa ai. Titu gaw
nanhte a ntsa e ahkaw ahkang la nna sen
di sha ai ngu na kun? Shi hte ngai gaw
maw mawn ai myit mang lam langai sha hta
hpawm hkrum nna lam masa langai hta sha
hkan sa galaw ai ni n rai ga ni?
19 Anhte gaw nanhte a man hta tut nawng e tinang hkum hpe mara n lu ai ngu nna
makawp maga tsun shakut ai ni re ngu
htang myit dai nhten? Dai hku n rai law!
Hkristu tsun shangun mayu ai hte maren
Karai Kasang a man e anhte tsun nga ga
ai. Dai hta n ga, tsaw ra ai ni e, anhte
galaw ai lam ni yawng gaw nanhte hpe
karum na matu she galaw ga ai.
20 Nanhte hpang de ngai du yang, ngai ra ai, mu mayu ai hku nanhte n rai nga
la na hpe mung, nanhte mung nanhte
ra ai, mu mayu ai hku ngai hta n rai
nga na hpe mung ngai tsang nga nngai.
Bai ngai gaw nanhte hta ga li ga law
ai lam, manawn masham ai lam, pawt
sindawng ai lam, tinang akyu tam ai
lam, shada da jahpoi asawng ai lam,
kadum kahte ai ga, grang ai ga hte
kabring kabrawng n ru n ra re ai lam
ni sa mu na hpe tsang nngai.
21 Nanhte hpang de ngai bai du ai shaloi Karai Kasang gaw ngai hpe nanhte a man
e shagrit kau ai hkrum shangun na hpe
ngai tsang nngai. Ya du hkra pyi myit
malai n lu ai sha arawn alai hten nna
ngang kayut ai hte nse nsa lam hkan
nga ai ni law law a majaw, ngai hkrap
myi prwi pru na hpe tsang nga nngai.