9
1 Ngai gaw shanglawt lu ai wa langai mi n rai nga a ni? Kasa langai mi mung
rai nga nngai n rai ni? Anhte a Madu
Yesu hpe mu yu ni ai n rai ni? Nanhte
mung, ngai Madu a matu gun hpai ai
magam bungli kaw na pru wa ai apu asi
ni n rai nga myit ni?
2 Kaga masha ni ngai hpe kasa langai mi hku nna n hkap la hkra rai tim, nanhte
hkap la myit dai n rai ni? Hpa majaw
nga yang, Hkristu hte langai sha tai
nna asak hkrung nga ai nanhte nan ngai
kasa langai mi teng nga ai lam a sakse
masat dazik rai nga myit dai.
3 Ngai hpe mara shagun dinglun ai ni hpe ngai gara hku tsun htang ai ga
gaw da ndai rai nga ai.
4 Ngai galaw ai amu a matu ngai hta, sha lu na, lu lu na ahkang n nga a ni?
5 Kasa kaga ni, Madu a kanau ni hte Petru re ai ni a kasi hkan ai hku
nna, ngai hkawm sa ai shaloi kam
sham ai madu jan woi hkawm na ahkang
n lu a ni?
6 Ngai hte Barnaba an chyu sha lu na sha na, a matu amu galaw lu na rai
nga a ni?
7 Kadai hpyen la wa mi tinang a jarik hte majan amu gun a ta? Kadai sun
galaw sha ai wa, tinang a sun kaw na
sabyi si n di sha ai nga ga a ni?
Kadai sagu rem ai wa tinang a sagu
kaw na chyu n shup lu ai nga ga a
ni?
8 Ndai shani shagu byin ai ga shadawn ni tsun dan ai hte sha ngai tsun mayu
ai lam hpe shadawn shadang n jahtum
mayu nngai, jep ai tara hta mung ndai
lam tsun nga ai n rai ni?
9 ?Mam kabye ai nga a n-gup hpe ka dagraw ya lu na n rai,? nga nna
Mawshe a tara hta ka da nga ai. Ning
nga tsun ai hta, Karai Kasang gaw
usu ni hpe chyu sha tsang nna tsun
nga ai kun?
10 Anhte a matu teng teng tsun nga ai n rai ni? Kaja wa anhte a matu ka
da ai rai nga ai. Hkauna galau ai
wa hte nsi naisi dan shinggyin la
ai wa gaw, tinang lu la ang ai nsi
naisi hkambum hpe myit mada let
galaw nga ma ai.
11 Anhte gaw nanhte hta e Wenyi nli gat hkai da nhtawm, nanhte hta na dinghta
hte seng ai arung arai akyu ara ni
hpe anhte hkam la ga yang, anhte a
matu ladu lai ai lam rai nga a ni?Ref 9:11: Rom 15:27; Gal 6:6.
12 Sara kaga ni nanhte kaw na lu la na myit mada na ahkang lu ma yang gaw,
anhte grau nna lu ang ga ai n rai ni?
Rai ti mung dai ahkaw ahkang hpe n la ga ai. Ahkaw ahkang la na malai,
Hkristu a lam Kabu Gara Shiga hpe
shingdang da ai dingbai dingna n
byin u ga, yak hkak ai lam shagu
hpe anhte hkrum katut shakut sharang
nga ga ai.
13 Nawku Htingnu kata hta chyoi pra ai bungli gun hpai ai ni gaw, Nawku
Htingnu kaw na sha hpa lu la ma ai
hpe mung, tawn hkungri hta hkungga
nawng ai ni gaw, hkungga kaw na
hkambum lu ma ai hpe mung, nanhte
teng teng chye nga myit dai.Ref 9:13: Jaw 6:16,26; Trj 10:9; 18:1.
14 Dai hte maren, dai Kabu Gara Shiga hkaw dan ai ni gaw, dai Kabu Gara
Shiga hta kan bau lu na, nga nna
dai Madu hkang da nga sai.Ref 9:14:
Mat 10:10; Luk 10:7; Gal 6:6.
15 Rai ti mung ngai gaw dai ahkaw ahkang ni langai mi hpe mung n lang nngai.
Dai zawn re ai ahkaw ahkang ni hpe
nye a matu hpyi na ngu nna ndai lam
ka nngai n rai. Shing rai hpyi na
malai, ngai shawng si mat na gaw grau
mai nga ai. Nye a gumrawng hpa lam
hpe kaman lila ga laban byin shangun
ai baw kadai hpe mung ahkang jaw na
n rai.
16 Ndai Kabu Gara Shiga hpe ngai hkaw dan ai a majaw, nye a matu gumrawng
shara n nga ai. Hpa majaw nga yang,
ngai gaw Karai Kasang hkang da ai
hte maren ngai n hkaw dan ai gaw n
nga lu nngai. Ngai dai Kabu Gara
Shiga hpe n hkaw dan a yang gaw
hkrithpa dingnye lu na nngai.
17 Lama rai nna ndai amu hpe nye a myit hte ngai lata la nna galaw ai rai
yang gaw, shabrai gumhpraw lu na hpe
myit mada ala nga lu nngai, rai ti
mung ngai ndai amu hpe Karai Kasang
e kam da ai hte ap da sai amu rai nna,
galaw ra ai lit langai mi hku she ngai
galaw nngai.
18 Dai rai yang, ngai gaw hpa baw shabrai wa hkam sha lu na rai nga a ta? Dai gaw
manu jahpu n hpyi ai sha Kabu Gara Shiga
hpe hkaw tsun lu ai hte nye a ahkaw ahkang
hpe n jai lang ai sha dai Kabu Gara shiga
amu hpe gun hpai lu ai amyat rai nga ai.
19 Shing rai ngai gaw, kade a mayam mung n rai nngai; rai ti mung, masha law lu
ai made law hkra Hkristu hpang de woi
lum la lu hkra, ngai gaw nye a hkum
hpe masha nga manga a mayam shatai
we ai.
20 Ngai gaw Yuda amyu masha ni kaw magam gun nga ai shaloi, shanhte hpe woi lum
la lu hkra Yuda masha langai mi zawn
ngai tai nngai; ngai hkum nan Mawshe
a tara npu e n nga ti mung tara npu
na ni hpe lum la lu hkra, tara npu na
ni kaw magam gun nga ai shaloi, tara
npu na wa zawn ngai tai nngai.
21 Dai hte maren, tara maigan ni kaw magam gun ai shaloi, shanhte hpe Hkristu hpang
de lum la lu hkra, Yuda tara hpe n hkan
ai sha tara maigan masha langai mi zawn
ngai tai nngai. Ning ngu yang, ngai gaw
Karai Kasang a tara n hkan n sa ai wa re
ngu mayu ai n rai, kaja wa ngai gaw
Hkristu a tara npu e nga ai wa rai nga
nngai.
22 Ngai gaw Karai Kasang hpe kam sham ai hta n-gun n ja ai ni a kata de du mat
wa ai shaloi, shanhte hpe lum la lu
hkra, makam masham n-gun n ja ai wa
zawn ngai tai nga nngai. Dai rai nna,
nkau mi hpe byin mai ai lam langai
ngai hte hkye hkrang la lu hkra, ngai
gaw masha amyu myu hta, amyu myu hku
nga nngai.
23 Dai Kabu Gara Shiga a marang e, shaman chyeju ni hpe nanhte hte rau hkam la
lu n ga, ndai lam yawng mayawng
hpe ngai hkan galaw nngai.
24 Gat shingjawng ai shara e yawng mayawng gat ma ti mung, marai langai wa chyu
sha dang ai kumhpa lu la nga ai hpe
nanhte kaja wa chye nga myit dai. Dai
rai nna, nanhte dang ai kumhpa lu la
hkra gat shingjawng nga mu.
25 Shingjawng poi shang na matu shaman ai ginsup ninghkrin shagu gaw, ja ai
hkan sa tara ni hpe hkan sa shatup
ma ai. Dai masha ni shing rai galaw
ai gaw hten mat chye ai nampan
shanghkawng janmau lu la na matu rai
nga ai. Anhte chyawm gaw htani htana
n hten n mat chye ai janmau lu la na
matu shakut sharang ga ai.Ref 9:25: Ehp 6:12; 2Tm 2:5; 4:8; 1Pe 1:4; Shr 2:10.
26 Dai majaw ngai gaw gat shadu na masat da ai mahkret bandung du
hkra, ading sha gat nngai. Ngai
gaw tinang a htwi ai lata hpe
kaman nbung hpe n htwi lahpawt
kau ai htwi sha ai wa hte bung
nngai.
27 Ngai gaw masha kaga hpe shingjawng poi hta lawm na matu saw shaga ngut
ai hpang, tinang hkum nan madang n
dep ai majaw, lata kau ai n hkrum
u ga, nye a hkum hpe ra ai hte maren
jai lang lu na matu tsep kawp up
hkang kau lu hkra htwi ahkak shaja
la we ai.