6
1 Nanhte shada da amu rawng myit yang gaw, Karai Kasang a masha ni a daw dan hparan ya ai hpe hkam la na malai hpa majaw maigan tara agyi ni kaw sa gwi myit ta?
2 Karai Kasang a masha ni gaw mungkan ga hpe tara dara na mara ai hpe nanhte n chye nga myit ni? Mungkan ga hpe tara dara na rai nga ai nanhte gaw, amu kaji kajaw hpe sha mung n jeyang daw dan lu myit ni?
3 Anhte gaw lamu kasa ni hpe tara jeyang daw dan lu na rai ga ai lam nanhte n chye nga myit ni? Dai rai nna dinghta lam ni hpe grau nna jeyang daw dan ging nga ga ai n rai ni?
4 Shing re ai amu lam pru wa ai shaloi Hpung hte hpa n seng ai, Hpung hta ahkang aya n lu ai ni hpe jeyang daw dan shangun na rai myit ni?
5 Nanhte kaya myit ga she ndai lam ngai tsun nngai! Hkristan hpu nau shada amu rawng ai shaloi nanhte a kata hta tara jeyang daw dan ya lu ai hpaji byeng-ya rawng ai wa langai mi pyi n nga sani?
6 Shing rai galaw na malai, Hkristan hpu nau langai mi gaw shada da shawk hkat na matu tara rung de sa nna n kam n sham ai ni hpe amu jeyang shangun nga a hka!
7 Ndai zawn shada da shawk hkat ai lam gaw Hkristan madang hkrat sum hpoi mat ai lam majing rai nga malit dai. Shada hka dung na malai n tara ai hku galaw ai hpe hkam mana kau ai gaw grau n mai a ni?
8 Nanhte chyawm gaw shing rai hkam mana na malai nanhte Hkristan hpu nau ni shada map lu map sha myit dai!
9 N hkru n kaja ai ni gaw Karai Kasang a mungdan a sali wunli n hkam la lu na re ai, nanhte n chye nga myit ni? Lam hkum dam myit; hpye ai amu galaw ai ni, gawkngu sumla nawku ai ni, num shaw ai ni, la shada tam ai ni,
10 lagu lagut galaw ai ni, nammak lawhpa ai ni, chyaru ya shang ai ni, shatan nhkan ai ni, kashun kashe rai jahkrit shagyeng sha ai ni, Karai Kasang a mungdan a sali wunli hpe hkam la lu na ma ai n rai.
11 Nanhte nkau mi gaw shing rai chyalu ni rai nga myit dai, rai ti mung nanhte gaw anhte a Madu Yesu Hkristu a amying nsang hte mung, anhte a Karai Kasang a Wenyi hte mung, kashin kamun jasan jaseng kau nna, Karai Kasang kaw ap nawng kau ai ni, Karai Kasang a man e ding hpring ai ni, ngu ai hpe hkam la ai ni tai wa manit dai.
12 Nanhte hta na marai langai ngai, ?Ngai gaw hpa hpe rai ti mung galaw na ahkang lu nngai,? nga nna tsun na re. Nanhte tsun ai hte maren teng nga ai, rai ti mung, yawng mayawng hte wa akyu byin ai n rai. Ngai gaw yawng mayawng galaw na ahkang lu nngai ngu nna ngai tsun lu nngai, rai ti mung ngai galaw ai hpa baw hpe mung ngai hpe de a mayam shatai shangun na nngai n rai.Ref 6:12: 1Ko 10:23.
13 ?Lusha gaw kan a matu, kan gaw lusha a matu rai nga ai,? nga nna nanhte tsun na myit dai. Dai gaw teng nga ai, rai ti mung Karai Kasang gaw dai yan hpe rau sha jahten kau na ru ai. Dai hkum hkrang chyawm gaw hpye ai amu a matu n re ai sha, dai Madu hpe daw jau na matu rai nga ai. Karai Kasang mung hkum hkrang a ra kadawn nga ai lam ni hpe jaw ya nga ai.
14 Karai Kasang gaw dai Madu hpe si ai kaw na hkrung sharawt wu ai rai nna, anhte hpe mung shi a n-gun atsam hte hkrung sharawt na mi ai.
15 Nanhte a hkum hkrang ni gaw Hkristu a daw shan ni rai nga ai hpe, nanhte n chye nga myit ni? Dai rai yang gaw, Hkristu a daw shan langai mi hpe la nna shawa num a daw shan langai mi shatai na rai nga a ni? Dai hku n mai byin ai.
16 Shawa num hte shi a hkum hkrang gumhpawn kau ai wa gaw, dai shawa num hte hkum hkrang langai sha rai mat sai hpe nanhte n chye nga myit ni? Chyum Laika hta, ?Shan lahkawng gaw hkum shan langai sha tai na mara ai,? nga nna tsun da nga ai.Ref 6:16: Nin 2:24; Mat 19:5; Ehp 5:31.
17 Rai ti mung dai Madu hte pu sin matut ai hku manoi nga ai wa gaw, wenyi lam hku nna Madu hte hkum shan langai sha rai nga ai.
18 Hpye ai amu hpe koi gam nga mu: masha e tawt lai ai yubak mara yawng mayawng gaw tinang hkum hkrang a mai kaja ai lam hpe n hkra ya lu nga ai; rai ti mung hpye ai amu hta mara kap ai wa gaw, shi a hkum hkrang hpe nan shut hpyit da wu ai.
19 Nanhte a hkum hkrang gaw, nanhte hta rawng nga ai Karai Kasang jaw ya ai dai Chyoi pra ai Wenyi a htingnu rai nga ai hpe, nanhte n chye myit ni? Nanhte gaw nanhte a hkum hpe up madu lu myit dai n rai, Karai Kasang chyu sha madu rai nga ai.Ref 6:19: 1Ko 3:16; 2Ko 6:16.
20 Madu gaw nanhte hpe jahpu manu daw nna mari da sai ni rai nga myit dai; dai re ai majaw, nanhte a hkum hkrang hpe Karai Kasang a hpung shingkang dan hkung na matu jai lang nga mu.