16
1 Yuda mung na Karai Kasang a masha ni hpe karum la na matu alu gumhpraw lahkawn na lam nanhte ka san dat ai hte seng nna, Galati mung na Hpung ni hpe ngai htet da ai hte maren, nanhte galaw mu.Ref 16:1: Kas 24:17; Rom 15:26; 2Ko 8:4.
2 Ngai sa du ai shaloi alu gumhpraw kaga mi n lahkawn ra u ga, Laban shani shagu nanhte langai hte langai gaw tinang a ngamu ngamai ai made hta na alu gumhpraw ni hpe garan mahkawng da nga mala.
3 Ngai sa du ai shaloi, htet shana shachyen dat ya ai laika ka nna, nanhte lata san da ai ni hpe dai alu gumhpraw Yerusalem de sa sa na, ngai shagun dat na mawe ai.
4 Lama wa nye a matu akyu rawng na zawn rai nna ngai sa ra ang wa ai rai yang gaw, shanhte ngai hte rau hkan nang sa lu ai.
5 Makedoni mung hku ga sa wa nhtawm, ngai nanhte kaw sa du na ring ngai; hpa majaw nga yang, ngai Makedoni mung hku ga shang sa wa ra nngai.Ref 16:5: Kas 19:21; 2Ko 1:16.
6 Nanhte hte rau tawng marang mi-kashung ta htum hkra pyi rai rai nga lu na nhten ngu sawn nngai. Dai hpang gara de rai tim, ngai hkrun lam bai matut hkawm sa wa na matu nanhte ngai hpe karum dat lu na myit dai ngu nna myit mada nngai.
7 Ngai gaw nanhte kaw lai hprang sa wa let jahkring mi sha hkring ai hku n di mayu nngai. Karai Kasang ahkang jaw a yang gaw, ngai nanhte hte rau tawng marang mi nga lu na, myit mada nga nngai.
8 Pentekoti poi shani du hkra, Ehpesu Mare e ngai naw anga nga na nngai.
9 Hpa majaw nga yang, dai mare hta ngai hpe ninghkap ai hpyen ni law law nga nga ma ai; rai ti mung, akyu rawng nna kaba la ai magam bungli gun hpai na ahkaw ahkang kaja mung nga nga ai.Ref 16:9: Kas 14:27; 19:9; 2Ko 2:12; Kol 4:3.
10 Lama wa Timohti nanhte kaw du sa wa dam a yang gaw, shi hta hkrit tsang ai lam n nga ai sha nanhte hte rau nga nga lu u ga, shi hpe kabu gara hkap tau hkalum la mu; hpa majaw nga yang, shi gaw ngai hte maren dai Madu a magam bungli gun hpai nga ai wa rai nga ai.Ref 16:10: 1Ko 4:17; Kas 19:22.
11 Kadai mung shi hpe n gawn n sawn n di u ga, shi a hkrun lam hpe angwi apyaw sha matut hkawm sa wa lu u ga, nanhte shi hpe karum madi shadaw dat lu na rai myit dai; shing rai Hkristan hpu nau ni hte rau, ngai hpang de bai du sa wa na ra ai, ngu nna ngai myit mada ala nga nngai.
12 Ya, hpu nau Apolo a lam hte seng nna tsun ga nga yang, kaga hpu nau ni hte rau shi nanhte hpang de sa chyai hkawm na matu, ngai shi hpe ya sha ya sha n-gun jaw shadut jahkat we ai, rai ti mung ya aten hta sa na shi kachyi mi pyi myit n hkut wu ai. Mai ang ai aten du yang, shi sa na ra ai.
13 A maja nga mu, dai makam masham hta ngang ngang kang kang tsap nga mu, nden marai rawng nga mu, n-gun lapyin ja nga mu.
14 Nanhte galaw ai amu yawng mayawng hpe tsaw ra myit hte galaw nga mu.
15 Nanhte gaw Stehpan hte shi a nta masha ni a lam chye nga myit dai; shanhte gaw Ahkaia mung na shawng nnan Hkristan tai wa ai ni rai nga ma ai hte Karai Kasang a masha ni hpe galaw daw na matu, shanhte dai ap nawng da sai ni rai nga ma ai.Ref 16:15: Rom 16:5; 2Ko 8:4; Heb 6:10.
16 Hpu nau ni e, shing re ai ni a woi awn ai lam hpe mung, shanhte hte rau shingdep shingtau nna amu bungli galaw daw jau nga ai ni a woi awn ai hpe mung, hkap la hkan sa na matu, nanhte hpe ngai hpyi nem dat made ai.
17 Stehpan, Hportunatu hte Ahkaiku ni du sa ma ai majaw, ngai kabu gara nngai. Shanhte gaw nanhte a malai ngai hpe galaw daw ma ai.
18 Shanhte gaw nanhte a myit hpe shangwi shapyaw ai zawn, nye a myit hpe mung shangwi shapyaw ya mi ai. Shing re ai masha ni gaw, masat masa galaw ai lam hkam la ging nga ma ai.
19 Asi mung na Hpung ni gaw nanhte hpe shakram dat ma ai. Akula yan Priska hte shan a nta e jawm hkrum nna nawku ai hpung masha ni mung, Hkristan tsaw ra myit hte nanhte hpe grai wa shakram dat ma ai.Ref 16:19: Rom 16:5,15; Hpl 2:2.
20 Ndai shara hta nga ai Hkristan hpu nau ni yawng mayawng shakram dat ma ai.
Nanhte shada da shinggyim nau na hku nna pup shakram hkat nga mu.
21 Pawlu kaw na shakram dat ai ga, ngu nna nye a lata hte nan ndai hpe ka dat nngai.
22 Marai langai ngai dai Madu hpe n tsaw n ra a yang gaw, shi hta dagam dala hkrum u ga!
Maranahta-Dai Madu du ru ga!Ref 16:22: Gal 1:8; Ehp 6:24.
23 Madu Yesu a chyeju gaw nanhte hte rau anga nga u ga.
24 Nye a tsaw ra ai myit gaw, Hkristu Yesu hta e nanhte yawng hte rau anga nga u ga law.