28
Shing rai anhte ashim sha hkarang kawng de du ai shaloi she, zunlawng dai Melite ngu ai zunlawng rai nga ai hpe anhte chye ga ai. Dai zunlawng na buga masha ni anhte hpe grai wa hku hkau matsan dum ma ai. Marang htu nna kashung nga ai majaw, shanhte wan wut nna anhte yawng hpe hkalum la mi ai. Pawlu gaw hpun dingshan nhtan langai mi magawn la nna wan mang hta bang nga yang puhtum langai mi wan kahtet ai na jang pru wa nna shi a lata hta kawa noi nga ai. Zunlawng na buga masha ni Pawlu lata hta kawa noi nga ai lapu hpe mu ma yang, ?Gaja wa nan, ndai masha wa gaw masha sat ai wa langai mi rai teng sam ai. Panglai hta n si n mat asak lawt lu ti mung teng man ai tara gaw shi hpe asak hkrung nga na ahkang n jaw da wu hka!,? nga nna shada da tsun shajang ma ai. Rai ti mung Pawlu gaw dai lapu hpe wan mang de ari bang kau nna hpa tsin-yam mung n hkrum ai anga nga ai. Shanhte gaw shi hkum bum wa na ra ai, shing n rai shi jahkring sha hta kadawng si na ra ai, nga nna la yu nga ma ai. Rai ti mung shanhte na na wa la yu nga ma yang, shi hta hpa mung n byin wa ai hpe mu jang shanhte myit bai galai nna ndai wa gaw, ?Hpara langai mi she rai nga ai,? nga nna bai tsun ma ai.
Ya dai shara hte nau wa n tsan ai shara hta zunlawng up ai Popli agyi kaba wa madu ai lamu ga ni nga shajang nga ai. Dai wa gaw anhte hpe matsan dum ai hte hkap hkalum la nna masum ya tup anhte shi a manam tai ga ai. Popli a kawa gaw, hkali hte kan hkyeng ana byin nna yup ra hta taw nga ai. Pawlu gaw dai wa kaw shang nna akyu hpyi ai hte shi a ntsa e lata mara ya nna, shi hpe shamai ya wu ai. Shing rai byin ai majaw zunlawng na kaga machyi ai masha ni yawng Pawlu hpang sa ma ai rai nna shamai shatsai ai lu la ma ai. 10 Shanhte gaw anhte hpe kumhpaw kumhpa law law jaw ma ai. Anhte pru wa na rai jang, hkrun lam a matu ra ai made li hta bang ya dat ma ai.
11 Shata masum lai jang dai zunlawng e n shung ta shalai nna nga nga ai, Alexandru mare na (Hpara marun yan nau) ngu nna shamying ai sanghpaw li hta anhte shang nna jawn pru mat wa ga ai. 12 Anhte gaw Surakusa mare de du nna dai yang e masum ya hkring nga ga ai. 13 Dai kaw nna kawai jawn wa yang, anhte Regi mare de du ga ai. Hpang shani dingda nbung bung wa ai rai nna ni ni ngu ai shani hta Potioli mare de du ga ai. 14 Dai mare kaw kam sham ai hpu nau nkau mi hte hkrum nna shanhte hte rau sanit ya hkring nga na hpyi ma ai majaw anhte hkring nga ga ai. Dai hpang Roma mare de du ga ai. 15 Roma mare na kam sham ai hpu nau ni gaw anhte sa wa ai lam shiga na shajang nna hkap tau la na matu, Api gat hte manam jarawp masum du hkra sa ma ai. Pawlu shanhte hpe mu jang, shi Karai Kasang hpe shakawn kungdawn nna myit n-gun grai lu la nga ai.
16 Ya anhte Roma mare de du jang, Pawlu gaw shi hpe sin ai hpyen ma ni hte rau kaga hkrai rai nga na, ahkang lu la wu ai. 17 Masum ya nhtoi lai ai hpang, Pawlu gaw, dai buga na Yuda agyi salang ni hpe shaga jahpawng la wu ai. Shanhte du sa hpawng nga ma yang, shi gaw shanhte hpe, ?Nye a hpu nau Israela amyu masha ni e, ngai gaw, nye a amyu hpe mung, ji wa ni a htung hking hpe mung, nhtan shai ai amu hpa mung n galaw yu nngai, rai ti mung Yuda amyu masha ni Yerusalem mare kaw ngai hpe rim la nhtawm Roma masha ni a lata de bawng masha langai mi hku ap kau ai ngai hkrum nngai. 18 Roma du ni ngai hpe jep san ngut jang si ging ai mara ngai hta n mu ma ai majaw ngai hpe raw dat mayu ma ai. 19 Rai ti mung Yuda amyu masha ni dai hpe n hkraw ma ai majaw, ngai kaning n chye di nna Kehta kaw du na hpyi we ai. Shing rai galaw ai rai ti mung nye a amyu masha ni a ntsa e mara shagun na lam nga ai majaw n rai.Ref 28:19: Kas 25:11. 20 Dai re ai majaw nanhte hte hkrum lu na hte tsun shaga lu na ahkang ngai hpyi la ai rai nga ai. Kaja wa tsun ga nga yang ngai dai zawn hpri sumri ni hte gyit hkang sharen da hkrum ai lam gaw Israela amyu masha ni myit mada ala nga ai wa a majaw nan rai nga ai,? ngu nna tsun mu ai.
21 Shaloi shanhte gaw, ?Na a lam Yuda mung na laika mung anhte n lu ga ai; dai de na anhte a Yuda amyu masha hpu nau ni kadai mung na a lam n kaja ai shiga n sa tsun ma ai. 22 Rai ti mung, ndai nang lawm ai hka bra hpung hpe shara shagu hta masha ni n ra sharawng nna tsun ninghkap nga ma ai hpe anhte chye ga ai majaw, nang myit ai hku mung anhte na mayu ga ai,? ngu nna htan mu ai.
23 Shing rai, shanhte gaw shi hte hkrum chyai na nhtoi madat da nhtawm, dai nhtoi du jang shi manam nga ai shara de masha law law wa sa hpawng nga ma ai. Pawlu gaw, jahpawt kaw nna shana de du hkra Karai Kasang a mungdan hte seng ai shi a mungga hpe Mawshe a tara hte myihtoi ni a ga hku hkan nna Yesu hpe shanhte chye na kam sham wa hkra hkaw tsun sakse hkam shakut nga ai. 24 Masha nkau mi gaw Pawlu a hkaw tsun ai ga a majaw kam sham wa ma ai, nkau mi chyawm gaw n kam n sham ma ai. 25 Shing rai shanhte shada da myit n hkrum mat nga ma ai majaw, Pawlu gaw, shanhte hpe ?Chyoi pra ai Wenyi, myihtoi a n-gup hte nanhte a nji nwa ni hpe tsun ai ga gaw teng la malit dai! 26 Dai gaw,
?Amyu dai hpe sa tsun dan su:
Nanhte na lana e n chye na na myit dai;
nanhte yu layu e n mu na myit dai,
27 hpa majaw nga yang, ndai amyu gaw myit mak nga nna,
shanhte a na lahpang nga ai hte
shanhte a myi pat da nga ma lu ai.
Lama wa shanhte a myi mu lu nna,
shanhte a na na lu ai hte,
shanhte a myit hta chye na ai rai yang gaw,
shanhte ngai hpang de kayin wa na ma ai rai nna,
ngai mung shanhte hpe shamai shatsai ya na ma we ai,? nga nna Karai Kasang tsun ai,? ngu mu ai.
28 Hpungdim hku nna Pawlu gaw, ?Dai re ai majaw Karai Kasang a hkye hkrang la ai mungga hpe maigan amyu ni hpang de jaw dat nu ai rai nna shanhte mahtang madat mara hta la na mara ai gaw nanhte nan chye nga mu law!,? ngu mu ai. 29 (Shing ngu nna Pawlu tsun mu ai hpang shanhte shada da aja awa ndang kalang hkat ai hte pru mat wa ma ai) i 28:29: Ndai daw kaji 29 hpe manuscripts nkau mi hta bang shalawm da ma ai. Ndai hpe dai ni na prat ningnan gale da ai Chyum Laika ni hta n bang shalawm ma ai. Hpa majaw nga yang ndai gaw Kas 25 bai kahtap ka ai sha re ngu nna lahkawng lang n bang na hku myit hkrum da ma ai.
30 Dai kaw nna Pawlu gaw ni ning tup shi shap rawng ai nta hta nga nga let, shi kaw sa masa ni hpe hkap la nna, 31 Karai Kasang a mungdan lam hkaw dan ai hte Madu Yesu Hkristu hte seng ai lam n dut n dang nden ja ai myit hte hkaw tsun sharin shaga nga ai.