19
1 Ya Apolo Korinhtu mare e nga nga yang, Pawlu gaw dai mungdaw a hkin-gau mayan
lahta daw kaw nna kata maga hku ga sa wa
ai hpang Ehpesu mare de du ai. Dai mare
kaw shi sape nkau mi hpe hkrum ai rai nna,
2 Shanhte hpe, ?Nanhte kam sham ai ni tai wa sai rai yang, Chyoi pra ai Wenyi gaw
lu la manit ni?,? ngu nna san mu ai;
?Shanhte gaw, Chyoi pra ai Wenyi nga ai pyi anhte n na yu ga ai,? ngu nna htan
ma ai.
3 Bai Pawlu gaw, ?Rai sa dai rai yang gaw hpa baw hkalup ngu ai hkam la myit
ta?,? ngu nna san mu ai. ?Yawhan a hkalup,?
ngu shanhte htan ma ai.
4 Shaloi Pawlu gaw, ?Yawhan a hkalup lam gaw yubak mara kaw na myit malai lu ai ni
a matu jaw ai she rai nna, shi a hpang e sa
ai Yesu ngu ai wa hpe mahtang kam sham ra
ai,? ngu nna Israela masha ni hpe tsun mu
ai.Ref 19:4: Mat 3:11; Yhn 1:15,27,30.
5 Shanhte dai ga na jang Madu Yesu a mying hta hkalup hkam la ma ai.
6 Ya Pawlu shanhte a ntsa e lata mara ya jang Chyoi pra ai Wenyi shanhte a ntsa e
du nna shanhte laklai ai ga, myu kaga shaga
nna Karai Kasang a mungga hpe mung tsun
shana ma ai.
7 Shanhte yawng lasha marai shi lahkawng rai nga ma ai.
8 Dai hpang Pawlu gaw tara jawng de shang nna, shata masum tup nden ja ai hte Karai Kasang a
Mungdan lam chye na hkap la mu ga, shanhte
hte tsun hkai hkat nga nna, woi awn da wu
ai.
9 Rai ti mung nkau mi gaw myit ja nna n kam n sham ma ai rai nna, shawa masha
ni a man e dai Madu a lam hpe n kaja ai
ga ni hte tsun jahpoi asawng ma ai. Dai
rai nna Pawlu gaw shanhte kaw na pru nna,
sape ni hpe kaga jahka la nhtawm Turanu
ngu ai wa a hpaji jawng gawk kaba hta shani
shagu tsun bawng sharin shaga hkat nga
ai.
10 Shing rai ni ning tup tsun bawng sharin shaga nga ai rai nna, Asi mung ting hta nga
ai Yuda masha ni hte Grik amyu masha ni
nlang Madu a mungga na la lu ma ai.
11 Karai Kasang mung Pawlu hku nna shawoi n byin yu ai laklai ai lamik kumla ni
hpe madun dan nga ai.
12 Masha ni gaw, Pawlu lang ai hpajet hte lawng sap zawn re ai ni hpe pyi machyi
ai ni hpang de la wa jang, shanhte a
ana ahkya ni hpe shamai ya mu ai hte,
shung ai n hkru ai nat ni mung pru mat
wa ma ai.
13 Dai shaloi nat hkyawt shaden kau let kawan hkawm nga ai Yuda masha nkau mi
mung Madu Yesu a mying nsang hte n hkru
ai nat ni hpe shaden kau lu na matu
shakut nga ma ai. Shanhte gaw n hkru
ai nat ni hpe, ?Pawlu hkaw tsun ai
Yesu a mying nsang hte ngai nanhte hpe
shapraw made ai,? nga nna n hkru ai
nat ni hpe tsun mu ai.
14 Skewa ngu ai Yuda Hkinjawng Agyi Kaba langai mi a shadang sha sanit hte mung
shing rai galaw nga ma ai.
15 Rai ti mung dai n hkru ai nat gaw shanhte hpe, ?Yesu hpe ngai chye nngai, Pawlu
a lam hpe mung ngai chye da we ai, nanhte
mahtang kadai ni rai nga myit ta?,? ngu
nna tsun mu ai.
16 Dai n hkru ai nat shung ai wa mung shanhte a ntsa e gumjawt gamyet nna, aja awa kamu
anut ai hte dang manga kau mu ai. Dai rai
nna shanhte gaw ahpye alam rai bu hpun
palawng ni ashep ashin rai nna nta kaw na
hprawng pru mat wa ma ai.
17 Dai lam hpe Ehpesu mare na Yuda masha ni hte tara maigan masha ni nlang chye ma
yang, shanhte yawng hkrit mat shajang
nna, Madu Yesu a mying nsang hpe shagrau
sha-a shajang ma ai.
18 Kam sham sai ni hta na law law mung sa nna tinang galaw shut ai lam ni hpe
tawngban tsun dan ma ai.
19 Lakle mandan bau sha ai ni law law mung, shanhte a laika ni hpe la sa nna masha
yawng a man e nat kau mu ai. Dai laika
ni a manu sawn yu yang gumhpraw dengga
mun manga ging malu ai.
20 Shing rai Karai Kasang a hpung shingkang hte dai Madu a mungga gaw chyam bra wa
nna n-gun atsam rawng galu kaba maden
jat wa nga ai.
21 Ndai lam ni byin ngut ai hpang Pawlu gaw, Makedoni mung hte Ahkaia mung kaw nna
Yerusalem mare de sa wa na matu myit daw
dan wu ai. Shi gaw, ?Dai mare de ngai sa
nhtawm, Roma mare de mung ngai du yu na
nngai,? nga nna tsun ai.
22 Dai rai nna shi gaw shi a nrum ntau tai ai Timohti yan Erastu hpe, Makedoni mung
de shawng shangun dat ai laman shi hkum
nan gaw Asi mung e tawng marang mi naw
hkring nga ai.
23 Ya dai hte yang, Madu a Lam a majaw Ehpesu mare e kabring kabrawng
re ai lam grai sawng ai hku byin wa ai.
24 Hpa rai nga yang Demetri ngu ai gumhpraw janghkam langai mi gaw Artemi hpara num
sumla kaji ni hpe galaw shachyaw dut ai
hte amu galaw manang ni hpe grai woi shalu
jasu da mu ai.
25 Dai rai nna shi gaw janghkam manang ni hte dai baw amu galaw sha ai kaga ni yawng hpe
shaga jahpawng la nna, ?Ndai baw amu hte
sha anhte nga mai nga ga ai gaw nanhte nan
chye nga myit dai.
26 Rai ti mung ya ndai Pawlu ngu ai wa gaw Ehpesu mare e sha n rai sa, ganoi Asi
mung ting ngu na wa masha lata hte galaw
ai karai ni gaw Karai Kasang n re nga nna
masha law law hpe gunglau ai hte myit
shayit kau ya manu ai gaw, nanhte nan mu
lu na lu nga myit dai.
27 Anhte a bungli mying hten mat na hpe tsang ra ai hta n ga, galu
kaba ai Hpara shayi Artemi a nawku htingnu
gaw hpa lachyum n pru mat nna Asi mung
ting hte mungkan ting hpara shayi Artemi
a galu kaba ai hpung shingkang hpoi mat na
hpe mung myit tsang shara rai nga ai,?
ngu nna tsun mu ai.
28 Shawa masha ni dai ga na jang, shanhte masin pawt bu shajang nna ?Ehpesu masha ni a
Artemi she galu kaba ai law!? nga nna
marawn nga ma ai.
29 Dai marawn garu kasu kabrawng re ai lam mare ting chyam bra wa ai hte shawa masha
ni mung Pawlu a manang Makedoni masha Geu
yan Aristarku hpe rim dun la nna mare ting
a shawa poi wang nta de htim bang wa ma
ai.
30 Pawlu gaw shi nan dai shawa hpawng de shang sa nna shanhte hte hkrum katut mayu da nu
ai, rai ti mung kam sham ai ni shi hpe hkum
shadang mu ai.
31 Pawlu a jinghku rai nga ai dai ginwang du nkau mi mung, shi hpe poi wang de n shang na
matu masha shangun nna tsun htet dat mu ai.
32 Dai laman, dai shawa hpawng ting gaw kashuk kashak rai nna nkau mi myu mi kaga ni baw mi
nga nna marawn jahtau nga ma ai. Hpa majaw
nga yang, shanhte law malawng gaw, shanhte
hpa a majaw sa hpawng nga ai ngu ai pyi
n chye ma ai.
33 Ya Yuda masha ni Alexandru hpe shawng de pru sa shangun mu ai rai nna, masha nkau
mi gaw ndai byin ai lam hte seng ai wa rai
sam ai ngu myit la ma ai, Alexandru mung
shawa hpawng hpe asim sha nga na matu shi a
lata galang dingsi nna ga tsun hparan ningdang
kau na shakut wu ai.
34 Rai ti mung shi Yuda masha langai mi rai nga ai hpe shanhte chye jang, yawng hte ting,
?Ehpesu masha ni a Artemi she galu kaba
ai law,? nga nna lang lata hkying hkum
lahkawng daram na hkra marawn bu ma ai.
35 Jahtum e mare chyare wa mare masha ni hpe jasim kau ngut jang, ?Ehpesu masha ni e,
Ehpesu mare gaw galu kaba ai hpara shayi
Artemi a nawku htingnu hte sumsing lamu
de na hkrat wa ai nlung sumla e bau sin ai
mare rai nga ai hpe masha shagu chye nga ai.
36 Dai lam ni hpe kadai mung n ningdang lu nga ai majaw, nanhte atsin sha nga mai ai hte
hpa lam hta mung myit shadang nna n mai
galaw myit dai.
37 Nanhte gaw ndai ni hpe nang de woi wa ai gaw, shanhte nawku htingnu hpe hpya sha ai mung
n rai, anhte a hpara shayi hpe jahpoi ya ai
mung n rai ma ai.
38 Demetri hte shi janghkam manang ni marai langai ngai hte mungga lama ma rawng yang
gaw, tara rung hpaw ai nhtoi ni nga ai hte
mungdu ni mung nga ma ai; dai kaw mara
shagun nna tara dara hkat lu nga ai.
39 Rai ti mung nanhte hta kaga tang madun na ra sharawng ai lam lawm nga ai rai yang
mung, mungchying sha ni a tara shang ai
zuphpawng hta hparan na rai nga ai.
40 Hpa majaw nga yang, dai ni kabring kabrawng re ai lam gaw anhte a majaw byin ai re ngu
nna mara shagun na tsang shara nga ai. Ndai
zawn kabring kabrawng rai na lam hpa n nga
ai. Kabring kabrawng byin shangun ai lam a
npawt hte seng nna ngang kang ai mara hpa
n madun lu na ga ai,? ngu tsun mu ai.
41 Shing ngu nna, dai shawa hpawng hpe shabra kau wu ai.