PETRU A SHAGUN DAT AI LAIKA LANGAI
(1 PETER)
1
1 Yesu Hkristu a kasa, ngai Petru gaw, Wa Karai Kasang a moi na chye chyang ai a majaw, dai Wenyi a shachyoi shapra ai hta, madat mara nna, Yesu Hkristu a asai hte lapri ai chyeju hkam la lu na,
2 Puntu, Galati, Kapadoki, Asi hte Behtuni mung hkan e bra mat ai ni hte rau, lata la ai shingbyi nga ai ni hpe, ga shana dat nngai: chyeju hte ngwipyaw ai gaw nanhte hta law htam wa malit ga law.
Hkrung Nga Ai Myit Mada Lam
3 Anhte a Madu Yesu Hkristu a Kawa Karai Kasang gaw a nga u ga: si mat ai ni kaw na Yesu Hkristu a bai hkrung rawt wa ai a marang e, ahkrung nga ai myit mada shara hte,
4 n run n hten ai, awu asin n re ai, n wai n mat ai sali wunli hpe hkam la lu na matu, shi a galu kaba ai chyeju majaw, shi anhte hpe bai shangai mi ai:
5 hpang jahtum ai nhtoi e dan pru u ga, nga nna lajang da sai hkye hkrang la ai chyeju hpe hkam la lu na hte, kamsham ai myit marang e, Karai Kasang a n-gun lagaw hte makawp maga hkrum nga ai, nanhte a matu mara, dai sali wunli gaw, sumsing lamu hta e kyem da nga ai.
6 Nanhte a jet ai kamsham myit gaw, wan hta e chyam yu ai hkrum nhtawm, hten mat chye ai aja hta grau hpu ai rai nna, Yesu Hkristu a dan pru ai nhtoi hta e, dai gaw, shakawn kungdawn ai, hpung shingkang hte arawng sadang rawng ai arai tai wa u ga,
7 ya chyahkring chyahkra e gunglau amyu myu hte nanhte yawn hkyen hkrum nga myit timung, dai hkye hkrang la ai lam a gawp e, nanhte grai kabu gara nga lu myit dai.
8 Dai Yesu hpe nanhte n mu yu timung, tsawra nga manit dai; shi hpe garai n mada mu mu timung, shi hpe kamsham nga ai a gawp e, n dang tsun hkra dan hkung ai kabu gara ai hte nanhte kabu gara nga myit dai rai nna,
9 myit masin hpe hkye hkrang la lu ai, ngu ai, kamsham ai a akyu hpe hkam la lu manu ai.
10 Dai nanhte kaw dep lu ai akyu ara lam hpe, myihtoi ga htawn tsun ai myihtoi ni mung, dai hkye hkrang la ai lam hpe azin ayang tam nna sawk yu manu ai:
11 Hkristu gaw nni nkri hkrum na hte dai hpang e hpung shingkang lu la na, nga nna shanhte hta e rawng nga ai Hkristu a Wenyi gaw, shawng e sakse hkam nga ai shaloi, gara aprat hte kaning re ai aten hta me, dai hte byin na ra ai kun, shanhte sawk yu nga ma ai.
12 Kaning rai nme law, ndai shanhte daw ai amu hte gaw, tinang a matu n re ai sha, nanhte a matu rai nga ai hte, sumsing lamu de na shangun dat ai Chyoi pra ai Wenyi a ahkang hte, kabu gara ai shiga, nanhte hpe hkaw dan ai ni, ya nanhte hpe gawn dan lu na amu rai nga ai gaw, shanhte hpe mung madun dan manu ai: dai amu hte hta lamu kasa ni mung, azi yu mayu nga ma ai.
Chyoi Pra Nga U
13 Dai re ai majaw, nanhte a myit kraw lawang a nshang hta shingkyit kyit nna, htauli htaula hta grin nga let, Yesu Hkristu dan pru wa ai shaloi e, nanhte hpang de la sa na ra ai chyeju hpe, myit mada nga mu.
14 Nanhte mung madat mara ai ma zawn rai nga let, nanhte garai n chye ai aten na shawng na myit marin kau ai hte hpe ya n hkan dagraw ai sha;
15 nanhte hpe shaga la ai wa gaw chyoi pra nga ai hte maren, nanhte mung arawn alai shagu hta chyoi pra nga mu:
16 kaning rai nme law, Ngai chyoi pra nga nngai majaw, nanhte mung chyoi pra nga myit ga, nga nna ka da nu ai.
17 Dai hta kaga, myi man n tau yu ai sha, langai hte langai a amu hte maren dawdan nga ai Kawa hpe nan, nanhte hpyi shaga myit yang gaw, nanhte manam tai hkawm nga ai aten hte yang, hkrit kamyin ai hte hkan shatup nga mu.
18 Kaning rai nme law, ji wa ni kaw nna hkan dagraw nga ai nanhte a n se ai arawn alai hta na, hten mat chye ai aja gumhpraw hte nanhte hpe galai hkrang la lu na n rai;
19 ana n kap ai, ra n rawng ai Hkristu ngu ai sagu kasha a hpu la ai asai hte sha, galai hkrang la lu na myit dai;
20 ginding aga garai n lat kaw nna, shi hpe chye tau wu timung, si ai ni kaw na shi hpe hkrung sharawt la wu ai hte, shi hpe hpung shingkang jaw ai Karai Kasang hpe,
21 shi a marang e kamsham ai ni, nanhte a matu mara, ndai hpang jahtum ai aten e dan hkung pru wa sai: shing rai, nanhte a makam masham hte myit mada shara gaw, Karai Kasang hta jung nga na ra ai.
22 Dai dingman ai ga hpe madat mara nga let, nanhte kahpu kanau ni hpe gaja wa teng teng, tsawra lu ai du hkra, nanhte a myit masin hpe san seng kau lu myit dai majaw, nanhte a myit ting hte shada da tsawra nga mu;
23 nanhte gaw hten mat chye ai nli hta na n rai, hten mat n chye ai, Karai Kasang ahkrung nga ai hte anga nga ai mungga nli hta, bai shangai wa lu manit dai.
24 Kaning rai nme law,
“Ashan yawng gaw tsingdu zawn rai nga ai,
Dai ni a hpung shingkang ting,
tsingdu a apu zawn rai nga ai;
Dai tsingdu gaw nywi mat wa ai rai nna,
Apu ni mung, run hkrat mat wa ma ai.
25 Dai Madu a matsun chyawm gaw,
prat mi hte prat mi anga nga ai.”
Dai gaw, nanhte hpe hkaw tsun dan ai kabu gara ai matsun rai nga ai.