25
Moba Num Ni Israela La Ni Hpe Lau La Ai Lam
1 Ya Israela gaw Shitim shara e nga nga ai; shaloi shanhte gaw Moba num ni hte shut hpyit ai lam galaw ma ai:
2 dai num ni gaw shanhte a hpara ni hpe hkungga nawng ai poi de Israela masha ni hpe shaga mu ai rai nna, shanhte gaw dai sha lawm ai hte, Moba hpara ni a man e nawku ma ai.
3 Shing rai Israela gaw Bala-Peora hte makyit mahkai re ai rai nna, Yehowa Israela hpe masin pawt bu nga ai.
4 Shaloi Yehowa gaw, “Yehowa a pawt bu ai masin hpe Israela hta na shabai kau lu hkra, Israela du nlang hte hpe shaga la nna, jan mai ai shara Yehowa a man e noi jen kau u,” ngu nna Mawshe hpe tsun wu ai.
5 Mawshe chyawm gaw, “Israela tara agyi ni hpe, Bala-Peora hte makyit mahkai ai ni hta na, langai hte langai tinang hte seng ai ni hpe sat kau mu,” ngu nna hkang dat mu ai.
6 Dai shaloi, Israela masha langai mi gaw Mawshe hte shawa sum a chyinghka makau e hkrap nga ai Israela shawa hpung nlang hte a man e, Midian numsha langai mi hpe, shi a kahpu kanau ni kaw woi shawn wu ai.
7 Dai hpe Arun a kashu Eleaza a kasha Hpineha mu jang, shawa hpung na rawt nhtawm, ri la lang let,
8 dai Israela masha hpe shi a sum nhku de hkan nna, dai Israela la wa hpe hkrang nna num jan a kan baw hkra galun htinggrang kau wu ai. Shing di ai a majaw Israela kashu kasha ni hta na dai ana zinli sim mat ai.
9 Shaloi na ana zinli hte si ai ni gaw mun lahkawng e hkying mali rai nga ma ai.
10 Shaloi Yehowa Mawshe hpe tsun wu ai gaw,
11 “Nye a manawn masham myit hte Israela kashu kasha ni hpe ngai n jahtum kau hkra, hkinjawng Arun a kashu Eleaza kasha Hpineha gaw, shanhte hta ngai hpang maga myit kaba ai majaw, nye a pawt bu ai masin hpe Israela kashu kasha ni hta na shabai kau ni ai.
12 Dai re ai majaw nang tsun lu na gaw, ‘Yu mu, nye a ngwipyaw ga shaka ngai shi hpe jaw we ai:
13 shi a Karai Kasang hpang maga shi myit kaba ai hte, Israela kashu kasha ni a matu htingrai htingrat nu ai majaw, shi hte shi a shu mashi shu masha ni gaw, dai ga shaka ngu ai, htani htana hkinjawng aya hte seng ai ga shaka lu la na manu ai,” ngu wu ai.
14 Ya, Midian numsha hte shut nna sat kau hkrum ai Israela la wa a amying gaw, Simun amyu hta na lakung langai mi a du agyi Salu a kasha Zimri rai nga ai.
15 Sat kau hkrum ai Midian numsha a amying gaw, Midian amyu hta na lakung langai mi a agyi, Zura ngu ai wa a shayi sha Hkozbi rai nga ai.
16 Shaloi Yehowa Mawshe hpe,
17 “Midian masha ni hpe shatsang nna sat kau mu:
18 kaning rai nme law, shanhte gaw, Peora hpara a lam hte mung, Peora hpara a majaw ana zinli du ai shani e sat kau hkrum ai shanhte a kajan kasha, Midian du agyi a shayi sha Hkozbi a lam hte mung, nanhte hpe gung lau nna hkalem kau ai hte shatsang kau manit dai,” ngu nna tsun wu ai.