3
Shomc Wayungx kuex Romzyac Tvkhic nuex Shvmmax rueq Khiz tueq
1 Yehowa rueq ngaz muex vganc romzyac tvkhic nuex Shomc Wayungx Yoshua kuex Yehowa raungkamx waz khaungkac nuex jvp yaq kuex tvkhic phuex. Yoshua hep nuex piq muex mvrax nyvnc tvkoc Satan jvp yaq.Ref 3:1 Ezra 5:2; Tvkh 12:10
2 Yehowa raungkamx waz rueq Satan muex, “Satan lex, Yehowa rueq mnoz muex mphox kuq kv-phux! Yerusalem lungwawx yaq Yehowa rueq mnoz muex mphox kuq kv-phux. Vruex miq waz kuex wvrkez wawc vtsenz wvrhtaq ikhoc yaungx yaq,” ngoz tueq jungx tueq.Ref 3:2 Yud 9
3 Yoshua kuex rv-nyet rvshet khvy svmx vtueq kvyuq jvp yaq.
4 Raungkamx waz rueq piq raungmungx wawc vkvjaz tay jix hez muex, “Vruex miq waz rueq svmx yaq rv-nyet rvshet khoz vkhvy kuex put kuq gay shuinz,” ngoz tueq jungx tueq. Kvruex yimaq piq rueq Yoshua muex, “Ngaz rueq mmvrax kuex lvmz gay ruiux mnoz rueq svmc juing khvy vnyalx kuex kuq phaungx,” ngoz tueq jungx tueq.
5 Piq rueq Yoshua khux nuex vsawc khux phuk kuex tvbuz kuy tvkoc vkvjaz tay jix hez muex nvr tueq. Tsuinghez rueq muinz nvr tueq rulc rv-ngvlc shuimx tueq, kvruex yimaq tsuinghez rueq piq muex khoz vkhvy vnyalx kuex tvsvmc tueq, Yehowa raungkamx waz muinz kvruex yuq jvp yaq.
6 Kvruex yimaq raungkamx waz rueq Yoshua muex,
7 Tvphaungc Tvsuip Yehowa rueq jungx tueq kvjaz kuex jungphvnx kuq tueq: “Ngaz rueq mnoz muex yauk shuimc kuq phaungx kuex shuimx kaz vtueq ngvy tvrac htenc kuex phvnx ruiux yuq, ngvy Shomc Yuimx nuiyc kvruex wangx htenc kuex tvhttoarc vtueq shunshvlx lvp shuiux. Ngaz rueq ngvy khaungkac nuex httax yaq raungkamx bix rueq vjux thoz yaq bomc kuex tay kuq shaungx ikhoc, mnoz rueq vjux thoz shuiux bomc htenc muinz tay kuq phaungx.
8 Kvkhoc rvtueq Shomc Wayungx Yoshua lex, tay shuiuz; piq kungjix shomc waz bix lex, tay shuinz; nuimshiq kuex max kox tvkoc vhvlx tvtsuingc mal yaungx vtuinx: ngaz rueq ngvy nvrc waz, Vphak Vnoz ngoz tueq gvlc rvhumc yaq waz kuex tvkhic phaungx!Ref 3:8 Yer 23:5; 33:15; Zech 6:12
9 Vsamx phawc mvshix httax yaq lung poshiz kuex Yoshua max nuex ngaz rueq taq tauk. Kvruex lung htauk kvyuq luik wuiyq tvkop vtueq, raungnuiyq shiz nuex dvyx vruex mungtan wawc mvrax kuex lvmz gay shuex rvtueq.
10 Kvruex raungnuiyq httuiuc wvnc tuex nuex, nuimshiq vshiz maq vshiz kuex nuimshiq svpiq sunc htenc nuiyc phuiuq muiuq jungx htenc tvroz nuex kemz ruiux, vkoz vkez nomic maq kvwungx httaz lot tvkoc miqmac yuimx phic wuinz htenc kuex gvl wuez shuinx,” ngoz tueq jungx tueq.Ref 3:10 Mik 4:4