7
Sanx Waz Shic
1 Mnoz kuex pinhtumc vwangc juing yunx nyuiuz khoc nauz!
M-yaz nuex yapaungc vpaungc shec kuex svp hvlc rvtueq.
M-wex phawc htenc kuex
vyac wuiyq tvhungx jix waz yauk mal ikhoc rvtoq.
2 Kvyuq pantuimz vshiz httax yaq,
kvyuq vhomc waq svpiq tix mkaq muinz mvrc yaq.
Kvyuq nyensaz tsvmz phungc vshiz
httax yaq, tvpuk puic htenc rueq tvroz tuimz rvyaq.
3 Mpuix pauk nueyc kuex khiyix vpop sanueyc ikhoc muinz,
juk sanueyc ikhoc muinz rvtueq.
4 Mduingx kuex jawz wac lunghtung ikhoc rvtueq.
Mmuik nueyc kuex Heshbon
ghaqyungx palx kaluix hep wawc yuix jumx htenc ikhoc rvtueq.
Mkhuiz kuex Damasku ghaq nuex
muiz yaq Lebanon lunghtung ikhoc vlungwawc svy juing rvtueq.
5 Mkhux kuex johvlc Karmel Kankhux ikhoc rvtueq.
Mkhux vway shec kuex phesuimz
suimz hvlc khvymvnz ikhoc httax yaq;
kvruex svp rvp rueq hokhvmx waz doc muinz lenlauk gay lot yaq.
6 Mnoz kuex pinhtumc svp hvlc nyuiuz rvtoq;
pinhtumc vroc svy juing shvmx vrvmx maq mvrc vtuiux.
7 Mnoz kuex pam pulx jungx ikhoc svp rvp hvlc vtueq,
mkhuiuq kuex pam thuey tuz rulc rv-ngvlc yaq.
8 Ngaz rueq pam pulx jungx nuex
duiz vtueq vthuey htenc kuex puinz shaungx.
Mkhuiuq kuex svpiq thuey tuz
ikhoc mnoz rueq shup hex vshuiux thuiuzthuic kuex
apple thuey homc ikhoc,
9 kvmaq mnuix kuex ruimc hvlc
svpiq tix ikhoc ngoz tueq tvmaung vshaungx.
Yunx Nyuiuz Shic
Kvkhoc ngoz ruiux kvruex svpiq tix kuex ngaz rueq lungwawx vshaungx waz,
nuix bar nuiyc wacRef 7:9 Mvnnuex vlayc wvyvmc nuex nuix bar nuiyc wac; Hebre maq kvtsoalx jix waz nuix bar. htenc kuex lvy wvnc vtueq vgvnz mungx nuex mnyuip wvnc kueq.
10 Ngaz rueq lungwawx vshaungx
waz rueq ngaz kuex guimz yaq,
piq rueq ngaz kuex rvwvl yaq.
11 Ngaz rueq lungwawx vphaungx
waz lex, kaz loq, tvnx nuex kaz ix, kez htenc kvyuq wvrx yuip ix.
12 Naungnueyc kuex raungnvp samaq
kvtenc vtueq svpiq ruiuz htenc kemz yaq kemz muq,
vpuic puic yaq puic muq,
pomegranat jungx htenc puic yaq puic muq muinz lawc shix.
Kvruex yuq ngvy lungwawc
thuinz kuex mnoz muex lekuq phaungx.
13 MandrakRef 30:14 mandrak: Vruex pulx thuey kuex saq ruiux yuq hungc httaz hvlc phvnx thuey rvtueq. thuey homc tumc kuex mnoz rueq shec vshuiux,
naungnueyc kaluix hep nuex ruimc hvlc pulx thuey phvnx ruip httax yaq.
Lungwawc vphaungx waz lex, ngaz rueq mnoz tvkoc
pulx thuey vkez vnyalx phvnx ruip tvjomx taq tauk.