2
Ngaz kuex Sharon warc tvnx nuex kemz yaq yaruix pulx puic,
kuz tvnx nuex kemz yaq yaruix pulx puic dvyx rvtauk.
Sanx Waz Shic
Ngaz rueq lungwawc vshaungx
yunx nyuiuz kuex yalxjuik rulx phungc nuex shuiuq rumz
mungx nuex yaruix pulx puic jungx ikhoc rvtueq.
Yunx Nyuiuz Shic
Ngaz rueq lungwawc hvlc sanx waz kuex, vganc miqwaz rulx rulc tv-ngvlc lawc ruiux yuq,
piq kuex pulx rox wawc pulx jungx htenc mungx nuex kemz yaq apple jungx ikhoc rvtueq.
Ngaz kuex piq luimc khung nuex
httaz tvkoc raungc raq vshaungx,
kvruex thuey saq ruiux ruimc hvlc rvtueq.
Sanx waz rueq piq phuiuz svy
moalx tvhungx yaq kvyuq ngaz kuex shvlx wvnc vtueq,
ngvy htauk nuex lungwawc thuinz maq puingc wvnc phuex.
Ngaz kuex lungwawc thuinz
ningkhvnc nuex rvyuiuq wak httaz vtaungx,
Piq rueq svpiq thuey shanx htenc
maq hunglaungc tvmvrc kuq koq,
apple thuey htenc maq hunglaungc tvlvp kuq koq!
Piq yauk phvrx kox kuex ngvy khux khung nuex taq ruiux,
piq yauk keq kox maq ngaz kuex got yaq.
Yerusalem shvlx rulx lex, nvnueyc rvlungwawc lvmx kuex,
tuingshaung miq ngoz tueq bomkhvmc kuq kuit;
lvwvnz hvlc khiyix muingc kuex jungx vtueq kvtuemc wuez kuinz.
Yunx Nyuiuz Shic
Ngaz rueq lungwawx vshaungx
waz tvruingc kuex ngaz rueq tay tauk.
Piq rueq kuz vkanx htenc yanz yuz
wvnc vtueq ngaz kox nuex kaz yaq.
Ngaz rueq lungwawx vshaungx waz kuex khiyix ikhoc muinz,
juk pung ikhoc rvtueq.
Piq kuex khoalx tuk hep nuex jvp yaq.
Katvnc puc maq lawc vtueq
khoalx puc maq ngaz kuex siz lawc yaq.
10 Ngaz rueq lungwawx vshaungx waz rueq ngaz muex jungx phuex.
Sanx Waz Shic
Lungwawc vphaungx yunx nyuiuz lex, kaz loq;
ngaz rueq lungwawc hvlc nyuiuz lex, ngaz rulc vdvmz kaz ix.
11 Raunglawc yac vhtumx kay wuez; raungx muinz yunx muq shex;
12 yaruix rumz htenc nuex pulx puic htenc puic wuez yaq.
Vruex jauz kuex wushawx thuic jauz shex;
wuik vnax htenc nuex muinz hituiuc htenc thuiz yaq.
13 Phuiuq muiuq thuey muinx phaungx yaq shex;
svpiq thuey puic thuingc homc htenc raungguil rulc lomx yaq.
Lungwawc vphaungx yunx nyuiuz lex, kaz loq;
ngaz rueq lungwawc hvlc nyuiuz lex, ngaz rulc vdvmz kaz ix.
14 Mnoz kuex lungshuk lunghvl nuex
kvhttuiyq yaq hituiuc ikhoc rvtoq.
Vlungwawc svy juing mhtvlx kuex
tvkhic koq, piauc hvlc mthuic mbomc kuex tay roc.
 
15 Svpiq ruiuz htenc tvbac yaq shoalx
htenc nuiyc shoalx sahez htenc kuex lvp shuiuz,
naungnueyc svpiq ruiuz htenc muinz vpuic shex rvwuez yaq.
Yunx Nyuiuz Shic
16 Ngaz rueq lungwawx vshaungx
waz kuex ngaz muex, ngaz muinz piq muex rvtauk.
Piq rueq yaruix pulx puic roz nuex khelbuenx htenc muex tv-phauk yaq.
17 Ngaz rueq lungwawx vphaungx
waz lex, raungnvp raungwuic max httuiuc raungnyauk max
lawz wvnc nuex kvroz vtueq, Bethera kankhux nuex httax yaq,
khiyix nuiyc juk pung ikhoc yaungx kuiuz.Ref 2:17 Bethera kanx htenc; rvmuq ngoz ruiux gvrc hvlc kanx htenc.