23
Dawid rueq Bomc Tvsuip
1 Jese saz Dawid kuex hokhvmx yaungc tvkoc Yaku Tishox rueq thvlc tvy rvhumc tueq. Piq kuex Tishox rueq tvyungx luz vtueq Israel tvkoc svp hvlc shic vngoyc maq tvkuiux kemz shec tueq waz rvtueq. Vruex kuex Dawid piq rueq tvsuip shex bomc poz htenc rvtueq:
2 Yehowa siyac rueq ngaz maq raz tueq tvjungc phuex;
vpiq bomjungc kuex ngvy tvlix nuex httax yaq.
3 Israel Tishox rueq kvjaz jungx tueq;
Israel muex tvkhup wungx kuy jix waz rueq vkhoc jungx tueq;
“Tvrac vlvmz maq guimz lawc ruiux,
Tishox kvjaz kuex phvnx vtueq guimz lawc jix hokhvmx kuex,
4 phuemx rueq buingc muq raungnvp nuex dung yaq shalx,
raungyunc httuemz yix wuiljuit wuiljaungx httuingx ruix phex yaq shalx ikhoc rvtueq.”
5 Bunx kaz muq juing vrungx vraz lvmz, kvlayc kay vguez bomkhvmc ngoz yaq
pattup pat-sac bomkhvrc ngaz rulc tvhungx ningkhvnc nuex,
Tishox rueq isuiuz isaz htenc muex ruimruimx kuq shuex.
Kvruex kuex ngaz rueq raungc raq vshaungx lvmz lotlaz rvtueq;
ngaz rueq taungx wvnc shaungx lvmz rvtueq,
Tishox rueq kvruex vsuingc suing tvyaungx kuq phuex.
6 Yuq muinz kvmluimx muq miq htenc kuex vtuip vruez gay shuiuq jungx ikhoc rvtueq;
uraq muinz yauk httuiz maq shuimx kaz lot muq.
7 Kvruex shuimc tvkoc kuex yanx maq, rvmuq ngoz ruiux paq jix rax yaq;
kvruex kuex wvr maq tvsawc ric juiuz gay rvhumc tuex.
Dawid nuex Muingc Dung yaq Shvrvyx Bix
(1Tvts 11:10-41)
8 Vruex hez kuex muingc jungc vhttax Dawid shvrvyx bix muingc htenc rvtueq: vphaungc shauk shauk wawc shvrvyx waz kuex Takhemon taungx wawc Josheb Bashebet rvtueq, piq kuex shvrvyx “Waz thuimx” nuex lomx yaq vshunc vshvlc jix rvtueq; piq rueq ralx lungc shiz nuex piq paq maq miq 800 kuex khvt vtueq kvruex hez lotlaz thvt gay tueq.
9 Aho taungx wawc Dodo saz Eleazar kuex muingc jungc vhttax waz thuimx wawc vnueyc ngoc yaungc waz rvtueq. Raungnuiyq shiz Dawid tsuingnueyc kuex ralx khvt tvkoc rvtuimx yaq Philistin miqsaz rulc rvlongx palx tueq. Israel miqsaz htenc yayix nuex rv-nyuik wvnc tueq,
10 yuq muinz piq kuex vjvp juing nuex dvyx jvp hvt maq vyauk htvllaz yaung kuex vyauk wawc kvlvmc muq laz juing Philistin miqsaz kuex thvt gay tueq. Yehowa rueq kvruex raungnuiyq tvtaungx wvnc yunghvlc kuq tueq. Rv-khvt kuex lot wvnc tueq nuex, Israel miqsaz htenc kuex Eleazar httax yaq baung nuex kaz vtueq, vthueyc vruez kaz nolaungx marrarc khoz vkhvy htenc kuex put wvnc wuez tueq.
11 Harar taungx wawc Agee saz Shamma kuex muingc jungc vhttax shvrvyx waz thuimx wawc vthuimx ngoc yaungc shvrvyx waz rvtueq. Phikix roz wuik httax yaq Lehi hong nuex Philistin miqsaz htenc rvtuimx wuez yaq. Israel miqsaz htenc kuex Philistin miqsaz khaungkac wawc yuz wvnc tueq,
12 yuq muinz Shamma rueq phikix roz nuex jvp vtueq tvgawx ruiux Philistin miqsaz htenc kuex khvt gay tueq. Yehowa rueq kvruex raungnuiyq taungx wvnc lvmz yunghvlc kuq tueq.
13 Shvrvyx “Waz rok thuimx” phungc nuex lomx yaq shvrvyx waz thuimx kuex tsvmz yut nanac nuex Dawid httax yaq Adullam htawc luix nuex svt kaz wuez tueq, kvruex baunglaung Philistin miqsaz daungx shiz kuex Rephaim Warc nuex jerak tec vtueq httax yaq.
14 Kvkaq Dawid kuex ghaqluimx poz wawc nolaungx ghaqshungc nuex httax yaq, Philistin miqsaz daungx shiz rueq Betlehem ghaq kuex khvt lvp gay tueq.
15 Dawid rueq vyuimx kuex rvwvl vtueq, “Betlehem ghaq palx kaluix hep nuex httax yaq yuix jumx wawc yuix laukshiz nuingx tanc washiz shiz rueq lvmz kuq wvnc ruiux yuq raungc raq thvt vshaungx!” ngoz tueq kvbot tueq.
16 Muingc dung yaq shvrvyx waz thuimx kuex Philistin jerak mungx maq nyuip yanz wvnc vtueq, yuix jumx wawc yuix kuex khuz wvnc vtueq Dawid muex lvmz kuq wvnc tueq. Yuq muinz piq rueq yuix kvruex nuingx muq maq Yehowa muex shomc kuq vtueq ruiuc gay ruiux,
17 “Yehowa lex, vruex yuix kuex ngaz rueq mkaq muinz nuingx mauk shex! Thuiuz thuic maq khvmc jix waz hez tvguiy kuex nuingx gay shix ikhoc yaungx kaz tuex!” ngoz tueq. Kvkhoc rvtueq piq rueq yuix kvruex nuingx khvmc muq.
Vruex kuex muingc dung yaq shvrvyx waz thuimx rueq khvmc wvnc tueq lvmz rvtueq.
18 Joab nox Abishai (tsuingnueyc nyuiuz Zeruia) kuex “Muingc dung yaq shvrvyx waz rok thuimx” kvruex shunshvlc jix vyungx rvtueq, piq rueq miq 300 kuex piq paq maq shuiuq thvt gay tueq ningkhvnc nuex “Waz rok thuimx” wawc muingc dung yaq waz rvtueq.
19 Piq kuex shvrvyx “Waz rok thuimx” nuex muingc dungc hvlc waz ningkhvnc nuex tsuinghez shunshvlc jix muex yaungx wvnc tueq; yuq muinz shvrvyx “Waz thuimx” ikhoc kuex muingc dung muq.
20 Kabzeel ghaq jix Jehoiada saz Benaia kuex muingc dung yaq vganc shvrvyx washiz rvtueq; piq rueq vkhvmc juing yauk shuimc paunghvlc shuimx wvnc tueq, kvmaq yungc loayc hvlc Moba miqsaz shvrvyx yungx wanueyc kuex thvt gay tueq. Laukshiz tsuik hek dvy yaq raungnuiyq ghaqluix vshiz nuex nyuip vtueq hangsic vshiz thvt gay tueq.
21 Shauk pumz yunghvlc Ejip miq washiz kvmuinz piq rueq thvt gay tueq, Ejip miq waz rueq paq kuex shuimx tueq, Benaia rueq wungrawc pumz maq mulx vtueq piq yauk wawc paq kuex nyvlc ruiux, kvmaq dvyx piq kuex shuiuq thvt gay tueq.
22 Vruex kuex shvrvyx “Waz rok thuimx” phungc wawc washiz rvtueq, Benaia rueq khvmc wvnc tueq lvmz rvtueq.
23 Piq kuex tsuinghez htauk nuex vjvnc lanc muingc dung ruiux muinz, shvrvyx “Waz rok thuimx” ikhoc kuex muingc dung muq. Dawid rueq kvruex waz kuex piq bvmc jix nolaungx yungx muex tvyaungc tueq.
24-39 Shvrvyx “Waz rok thuimx” nuex lomx yaq vganc jix htenc kuex:
Joab nox Asahel
Betlehem ghaq jix Dodo saz Elhanan
Harod ghaq jix Shamma nuiyc Elika
Pelet ghaq jix Heleza
Tekoa ghaq jix Ekkesh saz Era
Anathot ghaq jix Abiezer
Husha ghaq jix Mebunnai
Aho ghaq jix Zalmon
Netopha ghaq jix Maharai
Netopha ghaq jix Bana saz Heleb
Benjamin hong wawc Gibea ghaq jix Ribai saz Ettai
Pirathon ghaq jix Benaia
Gasha hep wawc warc tvnx nuex httaz jix Hiddai
Araba ghaq jix Abialbon
Bahurim ghaq jix Azmawet
Shabon ghaq jix Eliab
Jashen sahez
Yonathan
Harar ghaq jix Shamma
Harar ghaq jix Sharar saz Ahiam
Maaka ghaq jix Ahasabai saz Eliphelet
Gilo ghaq jix Ahithophel saz Eliam
Karmel ghaq jix Hezro
Arab ghaq jix Paarai
Zoba ghaq jix Nathan saz Egal
Gad ghaq jix Bani
Ammon ghaq jix Zelek
Joab koz vlaq shuimc kuy jix Beerot ghaq wawc Naharai
Jattir ghaq jix Era nuiyc Gareb
Hitti phvnx Uria.
Muingc dung yaq shvrvyx nolaungx bix lotlaz waz 37 rvtueq.