22
Dawid rueq Taungx Wvnc Shic
(Tvts 18)
Yehowa rueq Dawid kuex Sholu nuiyc vganc ralx htenc yauk wawc palc wvnc tueq nuex, Dawid rueq vruex shic vmaq Yehowa muex tvkuiux kemz shix tueq:
Yehowa kuex ngaz muex tvkhup wungx kuy jix waz;
vpiq kuex phaungx ngaungx hvlc ngvy nolaungx ghaqshungc rvtueq.
Ngvy Tishox kuex ngvy tvkhup wungx kuy jix waz rvtueq,
vpiq rulc vdvmz ningkhvnc nuex ngaz kvguing vtaungx.
Vpiq rueq ngaz kuex lak vshiz ikhoc tuinggawx kuq vtueq;
vpiq rueq ngaz tvguing vtueq tvwungx taq yaq.
Vpiq kuex ngaz palc daungc jix waz rvtueq;
ngaz muex tvwungx kuq ruiux yauk laungc yalawx jix kox wawc palc wvnc phuex.
Yehowa kuex ngaz rueq gvl koq tueq,
ngaz kuex ngvy ralx hez yauk wawc vpiq rueq palc wvnc phuex.
Yehowa muex tvtsvmc wuez shuinz!
 
Vthueyc vmvy yuix daungx htenc rueq ngaz kuex tuimx ruiux;
tvbac gay yaq yuix daungx htenc rueq ngvy htauk nuex luimz wvnc yaq.
Vthueyc vmvy juing miqhiz vsac rueq ngaz kuex tuimx wvnc phuex,
Wulumx mungx rueq ngaz kuex tsvnc yaq.
Ngaz kuilc daz rvhumc tauk nuex Yehowa kuex gvl tauk;
romc kuy tvkoc ngvy Tishox kuex ngaz rueq gvl tauk.
Vpiq shomc yuimx mungx maq ngvy guyc kuex tay tueq;
romc kuy tvkoc ngvy guyc kuex vpiq rueq tay tueq.
 
Kvkaq ghaq kuex kv-khuirc vtueq kvbuilc tueq;
Tishox thuinkhaq vtueq raungmungx ruingx jungx htenc
kv-nguirx ngauk vtueq kvbuilc yaq!
Vpiq khuiz wawc wvr khuiuq dung vtueq,
vpiq nuix wawc wvr tsauz yaq nuiyc vkhamc rvyaq wvrluic yaq.
10 Vpiq rueq raungx kuex juir vtueq svt kaz tueq,
vpiq yaz khung nuex nyauk hvlc phuemx rvtueq.
11 Vpiq kuex kherubim nuex ngaungc ruiux baz vtueq;
raungguil raungkungx htauk nuex vpiq khuemx yaq.
12 Vpiq kuex raungx nyauk maq vshauk pumz kuex kvpuingc ruiux,
htvy hvlc phuemx htenc nuiyc yuix htenc maq kvruk yaq;
13 vpiq khaungkac wawc phelep yaq baung maq vkhamc rvyaq wvr tsauz yaq.
14 Kvruex yimaq Yehowa rueq raungx maq raungx tvmuk koq tueq,
Tvphaungc Tvsuip Tishox tvruingc kvtay tueq.
15 Vpiq rueq vpiq laqsvnz htenc kuex gap koq tueq, vpiq ralx htenc kuex tvpanc gay tueq;
raungx tvlep vtueq tsuingshiq kuex tvyuz gay tueq.
16 Yehowa rueq piq ralx htenc kuex mulx ruiux,
khaq vtueq tsuingshiq kuex ramc koq tueq,
svmuktvrax phawx rawz kuex dung wvnc vtueq,
ghaq jungx vruingx kuex dung wvnc tueq.
 
17 Yehowa rueq raungx maq tvlanc vtueq ngaz kuex shuimx laq phuex;
thuiuz hvlc yuix mungx wawc ngaz kuex het tvdung gay phuex.
18 Vpiq rueq luimc vkawc hungc hvlc ngvy ralx hez kox wawc muinz,
ngvy shuiuc pac jix lotlaz kox wawc muinz ngaz kuex palc wvnc phuex,
tsuingshiq kuex ngvy tvkoc hungc hvlc yaungx yaq.
19 Ngaz kuilc daz rvhumc tauk nuex, tsuingshiq rueq ngaz kuex khvt wuez phuex,
yuq muinz Yehowa rueq ngaz muex tvwungx kuq phuex.
20 Vpiq rueq ngaz kuex kvhiz juing wawc tvdung romc kuq phuex;
vpiq rueq ngaz kuex raungc raq ningkhvnc nuex ngaz kuex palc wvnc phuex.
21 Ngaz rueq vlvmz shuimc ningkhvnc nuex Yehowa rueq ngaz muex yauk mauk kuq phuex;
ngaz nuex mvrax kop muq rvtueq vpiq rueq ngaz muex ruimruimx kuq phuex.
 
22 Yehowa tvrac kuex ngaz rueq phvnc ningkhvnc nuex,
ngvy Tishox kox wawc kvroz wvnc mauk.
23 Vpiq tvrac lotlaz kuex ngaz rueq phvnx vshaungx;
vpiq rueq nvr yaq htenc kuex ngaz rueq tvlvlc gay mauk.
24 Ngaz kuex mvrax yaq gay mauk,
ngaz rueq vyaq shuimx mauk lvmz kuex vpiq rueq tuiuz yaq.
25 Kvkhoc rvtueq ngaz rueq vlvmz rvkhauk shuimx vshaungx ningkhvnc nuex,
ngaz kuex mvrax vguez rvtauk lvmz vpiq rueq tuiuz vtueq yauk mauk kuq phuex.
 
26 O Yehowa lex, mnoz kuex tvmtuing httaz jix waz muex tvmtuing httax vtuiux,
hunghtaungx jix muex jvnc vtueq vhvlx lvmz tvkhic kuq vshuiux.
27 Mnoz rueq vsawc jix muex vsawc thuinz tvkhic kuq ruiux muinz,
honc bac jix muex kuex ralx tvyaungx vshuiux.
28 Vpiq rueq thuinz tvyomz jix kuex palc wvnc tueq,
yuq muinz ngamc vngax jix kuex mnoz rueq tvyomz gay tueq.
 
29 Yehowa lex, mnoz kuex ngvy raungwuic rvtoq;
ngvy kox wawc raungx nyauk kuex mnoz rueq tvwuic kuq phux.
30 Mnoz rueq ngaz kuex ngvy ralx htenc khvt gay juing hungc vlaungc muinz,
tsuingshiq jex yaq kuex tvbunx gay tvkoc luimc vkawc kuex ngaz muex kuq phux.
 
31 Tishox vpiq rueq shuimx kaz yaq kuex hunghtaungx mvrc yaq,
vpiq rueq jungx yaq kvjaz htenc kuex vkvmx juing doc ix!
Vpiq rueq tvkhup wungx yaq kuex thuiyc jix miq lotlaz tvkoc
vpiq kuex lak vshiz ikhoc rvtueq.
32 Yehowa dvyx Tishox rvtueq;
Tishox dvyx naungshiq kvwungx juing rvtueq.
33 Vruex Tishox kuex ngvy kv-phaungx ngaungx juing baung rvtueq;
vpiq rueq ngvy khuemc juing lvmx kuex tuimz guimz kuq yaq.
34 Vpiq rueq ngaz kuex jaw ngic huk ikhoc tv-phaungx ngaungx kuq vtueq;
vpiq rueq ngaz kuex kanx htenc htauk nuex tuimz guimz taq yaq.Ref 22:34 Hab 3:19
35 Vpiq rueq ngaz muex ralx lungc tvkoc tvluing kuq vtueq,
hungc hvlc laq kuex ngaz rueq shuimx lot vshaungx.
 
36 O Yehowa lex, mnoz rueq ngaz kuex tvkhup wungx vtueq palc wvnc phux;
mnoz rueq romc kuy ningkhvnc nuex ngaz yungx luz wvnc tauk.
37 Mnoz rueq ngaz kuex vkvlvp juing wawc
tvguing kuy ningkhvnc nuex ngaz kuex mkaq muinz rul mauk doc.
38 Ngvy ralx htenc kuex ngaz rueq yurc vtueq khvt taungx gay tauk;
tsuingshiq kuex tvbac gay lot nuex httuiuc laz ngaz rueq tvthauk gay shaungx rvmuq.
39 Ngaz rueq tsuingshiq kuex tvrul jek gay tauk ningkhvnc nuex kvtenc lot muq shex;
tsuingshiq kuex ngvy max nuex rul wvnc wuez vtuex.
40 Mnoz rueq ngaz muex ralx lungc lot juing hungc kuq vtueq
ngvy ralx htenc kuex tvtaungx gay phux.
41 Mnoz rueq ngvy ralx htenc kuex ngvy kox wawc tvyuz gay ruiux;
ngaz muex shuiuc pac jix hez kuex ngaz rueq tvbac gay tauk.
42 Romc kuy tvkoc tsuingshiq rueq thuiyx wuez tueq,
yuq muinz tsuingshiq kuex uraq muinz palc wvnc muq;
Yehowa kuex tsuingshiq rueq gvl tueq, yuq muinz vpiq rueq tvralc muq.
43 Bokkhuyx ikhoc yaungx laz juing ngaz rueq tsuingshiq kuex tvbunx jek gay tauk;
lvmx laungx wawc bokbiq ikhoc tsuingshiq kuex nyet nuiuz gay tauk.
 
44 Mnoz rueq ngvy tvgap gawx jix miqsaz kox wawc palc wvnc phux,
miqphvnx htenc kuex guimz tvkoc ngaz muex tvhungx kuq phux;
ngaz rueq tuiuz mauk miqsaz htenc muinz
ngaz rueq guimz yaq khung nuex httax yaq.
45 Pungnuk miqsaz htenc kuex ngvy khaungkac nuex bumx wuez yaq;
ngaz rueq nvr shaungx kuex tsuingshiq rueq tay vtueq phvnx wuez yaq.
46 Tsuingshiq kuex khvmc thuinz vguez shex,
tsuingshiq nolaungx ghaqshungc htenc nuex
hiyaz kv-khuirc vtueq dung kaz wuez yaq.
 
47 Yehowa kuex tvraungx httax yaq!
Ngvy kvguing juing waz muex tvtsvmc wuez shuinz!
Ngaz muex palc daungc hungc vlaungc httaz hvlc
Tishox yungx luz yaq lvmz kuex jungphvnx wuez shuinz!
48 Vpiq rueq ngaz muex ngvy ralx htenc kuex tvtaungx gay juing kuq phuex;
miqphvnx htenc kuex ngvy yauk khung nuex taq shec tueq,
49 ngvy ralx htenc yauk wawc ngaz kuex palc wvnc phuex.
O Yehowa lex, ngaz rueq ralx htenc kuex tvtaungx gay juing ngaz muex kuq phux nuiyc
yauk laungc yalawx yauk shuimc tvdungc jix miq htenc yauk wawc
tvkhup wungx kuq phux.
 
50 Kvkhoc rvtueq miqphvnx htenc htumc nuex ngaz rueq
mnoz muex tvtsvmc vphaungx;
ngaz rueq mnoz muex tvtsvmc shix vphaungx.Ref 22:50 Rom 15:9
51 Tishox rueq vpiq hokhvmx muex yunghvlc taungx wvnc lvmz kuq tueq;
vpiq rueq vthvl taq waz ngoz yaq, Dawid nuiyc piq suiuz vsaz htenc muex
pattup pat-sac lungwawc thuinz kuex tvkhic kuq tueq.