7
1 Kvkhoc rvtueq Kiriat Jearim ghaq wuinz kuex kaz vtueq Yehowa Bomkhvrc Jep kuex lvmz vtueq kuz hong nuex httax yaq Abinadab muingc yaq waz yuimx nuex pix wvnc tueq. Tsuinghez rueq kvruex tvbvmc tvkoc Abinadab saz Eleazar kuex tvsawc nawc ruiux lekuq tueq.Ref 7:1 2Sam 6:2-4; 1Tvts 13:5-7
Samuel rueq Israel kuex Guimz tueq
2 Yehowa Bomkhvrc Jep kuex Kiriat Jearim ghaq nuex wawc rok nueyc tanc shex taq tueq. Kvruex baunglaung Israel miqsaz htenc rueq romc kuy lvmz lvp tvkoc Yehowa kox wawc khoarsez thoz tueq.
3 Samuel rueq Israel miqsaz muex jungx tueq kuex, “Nuimshiq thuinz vmungx lotlaz maq Yehowa kox nuex yek waung ruiux yuq, pungnuk tishox lotlaz nuiyc Astarte nyuiuz yac yuimx htenc kuex tuip gay wuez shuinx. Nuimshiq miqmac shauk pumz kuex Yehowa muex tvshuk lekuq ruiux vpiq muex dvyx nawk palx kuq ruiux yuq, Philistin miqsaz yauk wawc vpiq rueq nuimshiq kuex palc wvnc kv-phuinx,” ngoz tueq jungx tueq.
4 Kvkhoc rvtueq Israel miqsaz rueq tsuingshiq Bala yac yuimx nuiyc Astarte nyuiuz yac htenc kuex tuip gay shec ruiux, Yehowa muex dvyx nawk palx wvnc wuez tueq.
5 Kvruex yimaq Mizpa baung nuex rvhumc tvkoc Israel miqsaz lotlaz muex Samuel rueq nvr ruiux, “Kvruex yuq nuimshiq tvkoc Yehowa kox wawc ngaz rueq vjux thoz kuq phaungx,” ngoz tueq tvtay jungx tueq.
6 Kvkhoc rvtueq tsuingshiq lotlaz Mizpa nuex rvtuimx wuez tueq. Yuix raungluingx saz tsuingshiq rueq khuz vtueq Yehowa muex shomc kuy tvraung ruiuc tueq, raungnuiyq nuiyq tuimc phuiuz svy mamc tueq. Kvkaq tsuingshiq rueq, “Yehowa muex nuiyshiq yaq gay tiq,” ngoz tueq kvjungc wuez tueq. (Vruex kuex Mizpa maq Israel miqsaz htenc muex Samuel rueq phox thamx kuq tueq lvmz rvtueq.)
7 Israel miqsaz htenc kuex Mizpa nuex rvtuimx yaq lvmz kuex Philistin miqsaz rueq tay vtueq, tsuingshiq kuex khvt kay tvkoc Philistin hokhvmx waz bv-ngac kuex tsuingshiq miq htenc rulc vdvmz kvtenc kaz wvnc phaungc tueq. Kvruex thaungc kuex Israel miqsaz rueq tay vtueq hiyaz wuez koq tueq,
8 Samuel muex ngoc, “Philistin miqsaz yauk wawc nuiyshiq kuex palc wvnc tvkoc Yehowa nuiyshiq Tishox kox wawc vjux thoz kuq hvt rvkoq,” ngoz tueq jungx wuez tueq.
9 Samuel rueq khelbuenx saz vshiz kuex thvt ruiux Yehowa muex shomc nawk juing tvyaungc vtueq wvpumz tuimx jauk shomc kuq tueq. Kvruex yimaq piq rueq Yehowa kox wawc Israel miqsaz muex romc kuy tvkoc vjux thoz tueq, Yehowa rueq piq vjux thoz bomc kuex tvralc kuq tueq.
10 Samuel rueq shomc nawk juing kuex shomc kuq yaq nuex Philistin miqsaz rueq vkhvt tvkoc max kox nuex kaz thuiyc yaq; yuq muinz kvkaq dvyx Yehowa rueq raungmungx wawc raungx tvmuk gay tueq. Tsuingshiq kuex rvthuip rv-khvt yaungx wvnc ruiux kawc yawc vtueq yuz wvnc wuez tueq.
11 Israel miqsaz rueq muinz Mizpa maq kvtenc vtueq Bethakar nuex httuiuc laz Philistin miqsaz kuex yurc vtueq tsuingshiq rueq lvmx wvlex thvt wvnc tueq.
12 Kvruex yimaq Samuel rueq lung vshiz tsenz vtueq Mizpa nuiyc Shen hvlwvl nuex shungc ruiux, “Yehowa rueq nuiyshiq muex lvmx wvlex romc kuq phuex,” ngoz tueq jungx tueq, kvkhoc rvtueq lung kv-ngoc, “Romc kuy jix Lung,” (Ebeneza) ngoz tueq muingc tueq.
13 Kvkhoc rvtueq Philistin miqsaz kuex kvnvnc wuez vtueq, Samuel tvraungx wawwawx Israel ghaq vraungx kuex tsuingshiq rueq nyuip khvt muq juing Yehowa rueq tuing gay tueq.
14 Philistin miqsaz rueq guimz yaq Ekron nuiyc Gad hvlwvl wawc ghaqyungx lotlaz kuex Israel muex yez kuy gay ningkhvnc nuex, Israel rueq kungkhux wawc piq ghaq vraungx htenc lotlaz lvp wvnc yek tueq. Israel miqsaz nuiyc Kanaan miqsaz hvlwvl nuex muinz nomic lvmx taq shec tueq.
15 Samuel rueq piq tvraungx wawwawx Israel mungx kuex guimz lawc tueq.
16 Piq kuex wawc tek Bethel, Gilgal nuiyc Mizpa hong nuex khuemx kaz ruiux vtueq, khuec vkhac kuex phox thamx kuq ruiux shuex.
17 Kvruex yimaq Rama ghaq wawc vyuimx nuex yek waung vtueq, kvyuq muinz phoc waz yauk shuimc shuimx yaq. Piq rueq Yehowa tvkoc shomrawx vshiz kuex Rama ghaq nuex tvhungx guirx tueq.