15
1 Kvruex yimaq raungmungx nuex vjungc lot miq yungx vtueq vwangc juing romzyac phvnx shiz kuex ngaz rueq khiz tauk. Kvruex romzyac kuex thuimkux phvnx mvshix shuimx yaq raungkamx waz mvshix rvtueq, Tishox thuinkhvy kuex vtvsuip tvlot gay vlvmz tvkhic muinz rvtueq.
2 Kvruex yimaq wvr maq vtvshot jamnac jumx ikhoc phvnshiz kuex ngaz rueq khiz tauk. Svl vwvl kuiux nuiyc piq yac yuimx muinz, lombot muingc kuex guimz jix waz muinz, taungx gay jix hez muinz ngaz rueq khiz tauk. Tsuinghez kuex Tishox rueq vkuq torox htenc shuimx vtueq jamnac jumx ikhoc hep nuex jvp wuez yaq.
3 Tsuingshiq rueq Tishox nvrc waz Moshe shic nuiyc Khelbuenx Saz shic kuex shix vtueq,
“Tvphaungc Tvsuip Taungjix Tishox lex,
Mnoz rueq shuimx wvnc toq yauk- shuimc kuex pinhtumc vwangc juing rvtueq!
Miq phvnx lotlaz muex Hokhvmx,
Mlvmx phvnc kuex pinhtumc vlvmx nuiyc pinhtumc tsuingrux ix!Ref 15:3 Tvkh 14:3; 16:7; Tvrac 31:30; Tvts 111:2; 145:17; Hos 14:9
4 Taungjix lex, mnoz muex hiyaz
tvtsanc nganc muq maq ukhaq lac httax lot yaq nguinx?
Mnoz yungx luz yaq lvmx kuex kvjungc muq jix ukhaq lac httax yaq nguinx?
Mnoz washiz dvyx vsawc rvtoq.
Miq phvnx ruip rawx kaz vtueq mnoz muex nawk palx kv-phux,
yvmx khoc lac ngoz ruiux lec mnoz rueq shuimx vshuiux
yauk shuimc kuex tvrac vlvmz rvtueq lvmx lotlaz rueq khiz yaq,” ngoz tueq jungx tueq.Ref 15:4 Esa 66:23; Yer 10:7; Tvts 86:9
5 Kvruex yimaq raungmungx nuex hakhix Tap httax yaq shomc yuimx kvdaz wvnc yaq kuex ngaz rueq khiz tauk.Ref 15:5 Dw 38:21
6 Kvkaq thuimkux phvnx mvshix shuimc lvy jix raungkamx waz mvshix kuex shomc yuimx mungx maq dung kaz tueq, tsuinghez rueq phesuimz rawx nyaz svmhung kuex svmx ruiux, tsuingshiq khez nuex kuimshawx kheshuit htenc shuit wuez tueq.
7 Kvmaq ngvmx saz kuiux bvlic wawc vshiz rueq pattup pat-sac tvraungx httax yaq, Tishox thuinkhvy mvrc yaq kuimshawx pantuimz mvshix kuex raungkamx waz mvshix muex kuq tueq.
8 Shomc yuimx kuex Tishox ngauz vngax nuiyc luimc vkawc ningkhvnc nuex wvr khuiuq mvrc wvnc tueq, raungkamx waz mvshix rueq vlvmz laq thuimkux phvnx mvshix max htumx wawwawx, shomc yuimx mungx nuex ukhaq muinz nyuip waung lot muq.Ref 15:8 Dw 40:34; 1Hokh 8:10-11; 2Tvts 5:13-14; Esa 6:4; 2Thes 1:9