36
Yuda Hokhvmx Joahaza
(2Hokh 23:30-35)
Yuda miqsaz rueq Josia saz Joahaza kuex thvl vtueq ruimruimx kuq ruiux Yerusalem nuex hokhvmx muex tvyaungc tueq. Joahaza kuex rullungx wawc 23 nuex Yuda hokhvmx muex yaungx vtueq, Yerusalem nuex yapix lex thuimx guimz lawc tueq. Ejip Hokhvmx Neko rueq piq kuex lvp vtueq khoktep miqsaz ikhoc shvlx wvnc tueq, Yuda miqsaz kox wawc kuimphox sawx kilogram 3,400 nuiyc kuimshawx kilogram 34 kuex hic tsaung tueq. Neko rueq Joahaza nox Eliakim kuex Yuda hokhvmx muex tvyaungc ruiux, piq muingc kuex Jehoiakim ngoz tueq layc tueq. Joahaza kuex Neko rueq Ejip mungx nuex shvlx laq tueq.Ref 36:4 Yer 22:11-12
Yuda Hokhvmx Jehoiakim
(2Hokh 23:36—24:7)
Jehoiakim kuex rullungx wawc 25 nuex Yuda hokhvmx yaungx tueq, piq rueq Yerusalem ghaq nuex wawc 11 guimz lawc tueq. Piq rueq Yehowa piq Tishox muex mvrax yaq tueq.Ref 36:5 Yer 22:18-19; 26:1-6; 35:1-19 Babelon Hokhvmx Nebukhadnezar rueq Yuda mungx nuex nyuip khvt ruiux, Jehoiakim kuex lvp vtueq yanx ruiuz maq khvrc ruiux Babelon nuex shvlx laq tueq.Ref 36:6 Yer 25:1-38; 36:1-32; 45:1-5; Dan 1:1-2 Nebukhadnezar rueq Shomc Yuimx wawc tsak vnyvmx wvyvmc kuex lvmz wvnc vtueq Babelon wawc piq hokhvmx hoc nuex taq tueq. Jehoiakim rueq shuimx wvnc tueq phvnx ruip saz ngoc juing piq rueq vshuimx vshuy vshac lvmz htenc kuex Yuda nuiyc Israel Hokhvmx bix Mvnphvnc luik nuex tvtsuingc taq shec tueq. Vsaz Jehoiachin kuex piq kvlayc hokhvmx yaungx tueq.
Yuda Hokhvmx Jehoiachin
(2Hokh 24:8-17)
Jehoiachin kuex rullungx wawc 18Ref 36:9 Vlayc vruez vkez wvyvmc nuex (2Hokh 24:8 nuex lawc) rokshiz rac tvjvt; Hebre nuex tvjvt ngoz tueq. nuex Yuda hokhvmx yaungx tueq, piq rueq Yerusalem nuex yapix lex thuimx rac raungx rokshiz guimz lawc tueq. Piq muinz Yehowa muex mvrax yaq tueq. 10  Raungluimc yac httuiuc wvnc koq tueq, Hokhvmx Nebukhadnezar rueq Jehoiachin kuex lvp vtueq Shomc Yuimx wawc taungx vwawx htenc rulc vdvmz Babelon nuex shvlx wvnc tueq. Kvruex yimaq Nebukhadnezar rueq Jehoiachin muex vwaungxRef 36:10 Vlayc vruez vkez wvyvmc nuex (2Hokh 24:17 nuex lawc) vwaungx; Hebre nuex vnox ngoz tueq. Zedekia kuex Yuda mungx nuex Yerusalem hokhvmx muex tvyaungc tueq.Ref 36:10 Yer 22:24-30; 24:1-10; 29:1-2; 37:1; Ezk 17:12-13
Yuda Hokhvmx Zedekia
(2Hokh 24:18-20; Yer 52:1-3a)
11 Zedekia kuex rullungx wawc 21 nuex Yuda hokhvmx yaungx vtueq, Yerusalem nuex wawc rokshiz rac wawc shiz guimz lawc tueq.Ref 36:11 Yer 27:1-22; 28:1-17 12 Piq rueq Yehowa muex mvrax yaq tueq, Yehowa bomjungc jix shvmmax Yeremia kvjaz kuex thuinz tvyomz vtueq tay muq.
Yerusalem Sumx Dvy wvnc tueq
(2Hokh 25:1-21; Yer 52:3b-11)
13 Zedekia kuex Tishox muingc maq piq muex tvtuemc vtueq tvkhvmc tueq Hokhvmx Nebukhadnezar kuex khawx lvlx tueq. Piq kuex thuinz kvlayc vtueq Yehowa Israel Tishox kox nuex kvyez tvkoc tvlvlc tueq.Ref 36:13 Ezk 17:15 14 Kvdvyx muinz rvmuq, Yuda walaungx bix, shomc waz bix nuiyc mungx miqsaz htenc muinz tsuingshiq tvroz nuex httax yaq yac yuimx htenc nawk palx jix miqphvnx htenc mvrax layx kuex phvnx vtueq, Yehowa vpiq rueq tvsawc taq tueq Shomc Yuimx kuex tvshuy shac tueq. 15 Yehowa tsuingshiq jix vwaz tamx Tishox rueq tsuingshiq kvmuinz, Shomc Yuimx kvmuinz tvjungx tvy roc vtueq, vpiq miqsaz htenc muex tvhonc tvsvmc tvkoc shvmmax bix kuex tvkaz tueq. 16 Yuq muinz tsuingshiq rueq Tishox bomjungc jix hez kuex shummarc vtueq, vpiq kvjaz kuex wvlc guez waqguez tvyaungc ruiux, vpiq shvmmax bix kuex ngoz ngax nueykuic wuez tueq, kvkhoc rvtueq tvsuip nuex Yehowa rueq vpiq miqsaz htenc kuex dungc wvnc juing vguez laz juing khaq tueq.
17  Kvkhoc rvtueq Yehowa rueq tsuingshiq kuex khvt kay tvkoc Babelon hokhvmx waz kuex tvkaz tueq. Hokhvmx waz rueq Shomc Yuimx mungx nuex httax yaq Yuda yalxrox bix nuex httuiuc laz thvt gay tueq. Piq rueq nyuiuz waz, nosaz, miqwaz yalxjuik, vthuiuz vsac jix, miq hvlx jix, ukhaq muex muinz menjenc muq. Tishox rueq tsuingshiq lotlaz kuex piq yauk nuex lekuq gay tueq.Ref 36:17 Yer 21:1-10; 34:1-5 18 Babelon hokhvmx waz rueq Shomc Yuimx tsak vnyvmx taungx vwawx, hokhvmx waz nuiyc piq vyungx vlaungx bix taungx vwawx htenc phvnx ruip saz kuex khvt lvp vtueq Babelon nuex yek waung tueq. 19  Piq rueq Shomc Yuimx nuiyc ghaqyungx muinz hokhvmx hoc tsak vnyvmx lotlaz kuex wvr maq jauk gay tueq, ghaqyungx palx ruk muinz tvrul tvbunx gay tueq.Ref 36:19 1Hokh 9:8 20 Piq rueq tvraungx kvjungx yaq jix htenc lotlaz kuex Babelon mungx nuex shvlx wvnc vtueq, tsuingshiq kuex piq nuiyc piq suiuz vsaz htenc Persia Honoc mungtan yaungx wvnc tueq nuex httuiuc laz dax muex yaungx vtueq shuimx kuq tueq. 21 Kvkhoc rvtueq shvmmax Yeremia maq raz tueq Yehowa rueq tvluz nuex jungx wvnc tueq kvjaz kuex, “Ghaq phux muex Nyec TvkuiyqRef 36:21 Nyec Tvkuiyq: Wawc mvshix vngoz raungwawc wuik vnax shuimc mvy muq ngoz tueq Tvrac kuex shuiuq tvkhic lvmz rvtueq (Lew 25:1-7 nuex lawc). kuy htungx tvrac phvnx muq ningkhvnc nuex, kvruex phvnc tvhungx yek tvkoc ghaqphux kuex wawc mvshix tup kuiyqshuik kuiyq khvmx yaungx wvnc tuex,” ngoz tueq jungx tueq.Ref 36:21 Yer 25:11; 29:10
Yuda Miqsaz Yek tvkoc Kiru rueq Nvr tueq
(Ezra 1:1-4)
22 Persia honoc Kiru kuex honocRef 36:22 honoc: Persia Hokhvmx Kiru Babelon ghaqyungx kuex 539 BC nuex nyvlc wvnc ruiux Babelon honoc mungx muex guimz lawc wvnc phaungc tueq. yaungx tueq vphaungc raungwawc shvmmax Yeremia maq raz tueq jungx tueq Yehowa kvjaz kuex hungx wvnc tueq. Kvkhoc rvtueq piq rueq vruex vnvrc bomc kuex wuiyq tvdung vtueq piq rueq guimz lawc yaq mungtan baung ruip saz nuex wvlc kuy tvkoc Kiru muex tvshuimc tueq. Kvruex kuex vkhoc rvtueq:
23  “Vruex kuex Persia Honoc Kiru rueq vnvr bomc rvtueq. Yehowa Raungmungx Tishox rueq ngaz muex mungkawx lotlaz tvguimz lawc vtueq, Yuda mungx Yerusalem ghaq nuex vpiq tvkoc shomc yuimx vshiz guirc muex yauk shuimc ngaz muex kuq phuex. Majuiuc kuex Tishox miqsaz rvtuit nuimshiq lotlaz kvyuq yek wuez kuinz, Yehowa nuimshiq Tishox kuex nuimshiq rulc vdvmz nuex mhttax kueq.”Ref 36:23 Esa 44:28