14
Yerusalem nuex Dawid Kvmoay Shay tueq
(2Sam 5:11-16)
1 Tire Hokhvmx Hiram rueq pvkac pvylvyc jix kungshiz kuex Dawid kox nuex tvkaz tueq; piq rueq hokhvmx hoc guirc tvkoc ngoz tueq ruippulx guix htenc, lungphawc jix hez nuiyc thamx waz hez tauk vdvmz nuex Dawid muex romc kuq tueq.
2 Yehowa rueq piq kuex Israel hokhvmx muex tvyaungc tueq lvmz nuiyc piq miqsaz htenc tvkoc piq mungtan tvrungx wanx tueq kvmuinz Dawid rueq tuiuz wvnc lvp tueq.
3 Dawid rueq Yerusalem ghaq maq vjuik htenc lvmz yek vtueq, vsaz hez miqwaz, yalxjuik paunghvlc lvp tueq.
4 Yerusalem maq piq muex vjawx kuq sahez kuex: Shammua, Shobab, Nathan, Solomon,
5 Ebhar, Elishua, Elpelet,
6 Noga, Nepheg, Japhia,
7 Elishama, Beeliada,Ref 14:7 Beeliada: 3:8 nuex Eliada ngoz yaq. nuiyc Eliphelet rvtueq.
Philistin Miqsaz Khvt Taungx gay tueq
(2Sam 5:17-25)
8 Dawid kuex Israel mungtan wvmungx tuimx guimz jix hokhvmx muex tvyaungc tueq lvmz Philistin miqsaz rueq tay vtueq, piq lvp kay tsuingshiq nolaungx bix kuex kaz tueq. Rvkoq tueq tsuinghez rulc rvhumc muex ngoz tueq Dawid kuex kvtenc kaz wvnc tueq.
9 Philistin miqsaz kuex Rephaim Warc tvnx nuex httuiuc kaz vtueq khvt nyvlc wvnc phaungc tueq.
10 Dawid rueq Tishox muex ngoc, “Philistin miqsaz htenc kuex ngaz rueq khvt lvp shaungx haz? Mnoz rueq ngaz muex tvtaungx phux haz?” ngoz tueq wiz tueq.
Yehowa rueq, “Quex, khvt shuiuz! Ngaz rueq mnoz muex tvtaungx kuq phaungx!” ngoz tueq tvralc tueq.
11 Kvkhoc rvtueq Dawid kuex Bala Perazim nuex duiz wvnc vtueq kvyuq Philistin miqsaz htenc kuex khvt taungx gay tueq. Rvkoq tueq piq rueq, “Tishox rueq ngaz kuex shuimx vtueq ngvy ralx hez kuex yuix puingc rueq hut gay yaq ikhoc shuiuq thvt gay tueq,” ngoz tueq. Kvkhoc rvtueq kvruex hong kv-ngoc Bala PerazimRef 14:11 Bala Perazim: Vruex muingc kuex Hebre maq “Yehowa rueq tvbac gay tueq.” ngoz tueq muingc tueq.
12 Philistin miqsaz htenc kuex yuz wvnc ruiux tsuingshiq yac yuimx htenc kuex tuip gay shec koq tueq, kvruex htenc kuex juiuz gay tvkoc Dawid rueq nvr tueq.
13 Mtanc httax muq nuex Philistin miqsaz kuex kvruex warc tvnx kvyuq kaz yek vtueq yauk laungc yalawx maq ruez phaungc wvnc yek tueq.
14 Dawid rueq laukshiz hulawx Tishox muex wiz koq tueq, “Vruex baung vmaq tsuinghez kuex nauk khvt kaz, yuq muinz tvkomc vtueq basamRef 14:14 basam: pulx kvruex kuex naungmungx nuex vguez. pulx htenc kemz yaq hep kvnvp nvp kvmaq tsuingshiq kuex khvt tvkoc tvyoalc shuiuz.
15 Pulx jungx thawx nuex khuemc wvnc tvruingc kuex tay ruiux yuq khvt shuinz, yvmx khoc lac ngoz ruiux lec Philistin miqsaz kuex khvt taungx gay tvkoc mmax nuex ngaz kaz wvnc taungx,” ngoz tueq tvralc tueq.
16 Tishox rueq nvr tueq rulc rv-ngvlc Dawid rueq shuimx kaz koq tueq, Philistin miqsaz htenc kuex Gibeon maq Gezer ghaq nuex httuiuc laz yurc khvt gay tueq.
17 Dawid muingc dungc kuex baung ruip saz nuex httuiuc wvnc tueq, piq muex miqphvnx ruip rawx hiyaz tvkoc Yehowa rueq ruez kuq tueq.