TVTSVMC 82
Tishox rueq raungmungx wawc suingdaungx muingdaungx kuex shunshvlx yaq;
tishox htenc rvtuimx yaq nuex vpiq rueq htvp htaz yaq lvmx kuex jungx kuq yaq:
“Tvrac vlvmz rvmuq maq phox
vshuinx kuex nuimshiq rueq httvr gay shuinz;
layx bac jix htenc kuex htvlx phawc lawc vtueq nuimshiq rueq
raungluingx muinz ruec kuy mvy muq!
Htemsuiuz rvmsaz jix nuiyc nojix
sahez rueq lvp aungx yaq htenc kuex tvguing tvwungx kuq shuinz;
rax yaq jix htenc nuiyc romc kuy jix vguez jix htenc muex
tvrac rulc rv-ngvlc phox kuq shuinz.
Layx bac jix miqsaz luimc vkawc
kvwawc tsuingshiq kuex tvguing wvnc shuiuz.
 
“Nuimshiq kuex tharc guez khoc
vnauz! Miqyaq hvlc khoc vnauz!
Nuimshiq kuex tvsawc ric bac wvnc vtuinx,
tvrac vlvmz kuex mungkawx vwawc moz wvnc vtuex shex.
‘Nuimshiq kuex tishox htenc rvtuit,
nuimshiq lotlaz kuex Johvlc Pinhtumc waz sahez rvtuit,’
ngoz tueq ngoz vphaungx.Ref 82:6 Yoh 10:34
Yuq muinz vthueyc jix ikhoc dvyx nuimshiq thueyc wvnc wuez tuinx;
hokhvmx sahez ikhoc nuimshiq rullungx kuex htumx wvnc tuex.”
 
O Tishox lex, kaz lot, mungkawx kuex guimz lawc shuiuz;
miqphvnx lotlaz kuex mnoz muex jvnc rvtueq.