TVTSVMC 61
1 O Tishox lex, ngaz rueq ramc vphaungx kuex tay shuiuz;
ngvy vjux thoz bomc kuex tay kuq koq!
2 Ngaz kuex yuimx maq yalc hvlc nuex httax vtueq
thuinbac hvlc rvtueq mnoz kuex gvl vphaungx!
Ngaz kuex kvwungx juing vhttax nuex shvlx koq,
3 mnoz kuex ngaz muex tvkhup wungx kuy jix nuiyc,
ngvy ralx htenc kuex tvgawx lot juing ngvy hungc vlaungc rvtoq.
4 Ngvy rullungx wvlex mnoz vsawc baung nuex ngaz tvhttax koq;
mraungx khung nuex kvwungx juing baung kvyuq ngaz kuex tvguing koq.
5 O Tishox lex, ngvy bomkhvmc htenc kuex mnoz rueq tay toq,
mnoz muex tvtsanc nganc jix htenc rueq guimz yaq
tsak vnyvmx htenc kuex mnoz rueq ngaz muex kuq phux.
6 Hokhvmx waz rullungx kuex vwawc paunghvlc tvluz kuq shuiuz;
piq kuex tvhttoarc vtueq rullungx mluz kueq!
7 O Tishox lex, mnoz khaungkac nuex piq rueq pattup m-guimz lawc shuiuz;
mnoz phaungx ngaungx yaq lung-wawc thuinz nuiyc
tvmtuing thuinz rueq piq kuex mtvkhup wungx kuq shueq.
8 Kvkhoc rvtueq ngaz rueq bomkhvmc kuq phaungx rulc rv-ngvlc
mnoz muex wvraungx nuiyq shomc kuq vphaungx,
mnoz muex mkaq muinz tvtsvmc shic shix vtaungx.