TVTSVMC 56
1 O Tishox lex, ngaz kuex vkhvt vlungc rvhumc vtaungx,
ngaz muex menjenc kuq koq;
ngvy rax htenc rueq ngaz kuex
vkhing ruip rawx guirguenz yaq.Ref 56:1-13 1Sam 21:13-15
2 Ngvy ralx htenc rueq ngaz kuex nuiyqtuimc khvt yaq.
Ngvy khvt jix kuex paunghvlc paung yaq.
3 Tvphaungc Tvsuip Yehowa lex, ngaz hisungx vtaungx nuex
mnoz muex ngaz rueq tvluimc vphaungx.
4 Ngaz kuex Tishox muex tvluimc ningkhvnc nuex hiz mauk;
vpiq rueq vkuq bomkhvmc ningkhvnc nuex ngaz rueq
vpiq muex tvtsvmc shaungx.
Miq rueq ngaz kuex yvmx khoc lac rvlot phvnx?
5 Ngvy ralx htenc rueq ngaz kuex nuiyqtuimc tvkuilc daz yaq;
ngaz kuex lvmx shishiz maq tvthuiuz sac tvkoc
tsuingshiq rueq mkaq muinz kvmungx wuez yaq!
6 Tsuingshiq kuex kvhttuiyq juing baung nuex rvtuimx vtueq,
ngaz rueq shuimx shaungx phvnx ruip saz kuex si-khvyx lawc yaq.
7 O Tishox lex, tsuingshiq honc bac ningkhvnc nuex
tsuingshiq muex murx tvgurc shuiuz;
mthuinz khvy kvmaq kvruex miq htenc kuex taungx gay shuiuz!
8 Ngaz kuilc daz rvhumc vtaungx kuex mnoz rueq tuiuz yaq;
ngvy muik phic htenc kuex mnoz wuiyq tvtsuingc taq shuiuz.
Mluik dvp nuex wvl tvtsuingc taq shec toq rvmuq haz?
9 Ngaz rueq mnoz gvl phaungx raungnuiyq nuex,
ngvy ralx htenc kuex yix kox nuex yek wvnc rvhumc tuex.
Tishox kuex ngvy kox nuex httax yaq ngaz rueq tuiuz vshaungx,
10 Yehowa bomkhvmc htenc kuex ngaz rueq tvtsvmc vshaungx.
11 Vpiq muex ngaz rueq tvluimc vshaungx ningkhvnc nuex
ngaz hiyaz taungx rvmuq.
Miqsaz rueq ngaz kuex yvmx khoc lac ruez lot phvnx?
12 O Tishox lex, ngaz rueq mnoz muex bomkhvmc kuq phaungx rulc rv-ngvlc
tvmtuing maq tvralc phaungx;
kejux vyungx shomc kuy kuex mnoz muex kuq phaungx,
13 yvmx khoc lac ngoz ruiux lec mnoz
rueq ngaz kuex vthueyc juing wawc
palc wvnc vtueq tvsumx rumx muq ningkhvnc nuex rvtueq.
Kvkhoc rvtueq ngaz kuex rullungx
tvraungx httax yaq jix htauk nuex
wuix yaq raungwuic ngoz yaq,
Tishox khaungkac nuex ngaz khuemx shamx vtaungx.