TVTSVMC 28
1 Ngvy kvgawx juing O Yehowa lex, ngaz rueq mnoz gvl vphaungx.
Ngaz rueq ramc phaungx kuex tay kuq koq!
Mnoz rueq tvralc muq ngoz ruiux,
ngaz kuex wulumx mungx nuex kay wvnc jix rulc roc nuex kay wvnc juing shex.
2 Mnoz vsawc Shomc Yuimx kox nuex yauk tenz vtueq,
romc kuy tvkoc thoz ruiux yuq ngaz rueq thoz phaungx kuex tay kuq koq.
3 Layx bac jix hez rulc muinz,
honc bac shuimc jix hez rulc muinz,
miqsaz nuix htenc kuex kungjix ikhoc yaungx yaq,
yuq muinz tsuingshiq thuinz vmungx nuex kuex vshuiuc vpac thuinz httax yaq jix rulc
vdvmz nuex ngaz kuex nauk phox gay vkueq.
4 Tsuingshiq rueq shuimx wvnc tueq nuiyc tsuingshiq yaq gay tueq
honc bac yauk shuimc laung nuex tsuingshiq muex murx tvgurc shuiuz.
Tsuingshiq kvmungx lotlaz kvyuq murx tvgurc shuiuz;
tsuingshiq rueq lvp aungx yaq rulc rv-ngvlc tvgurc shuiuz!Ref 28:4 Tvkh 22:12
5 Yehowa rueq yvmx lac shuimx wvnc tvnx,
rvmuq ngoz ruiux yvmx lac shuimx taq tvnx htenc kuex
tsuingshiq rueq wvlc guez tvyaungc kuq tueq;
kvkhoc rvtueq vpiq rueq tsuing-shiq muex murx tvgurc kuq ruiux,
tsuingshiq kuex pattup pat-sac tvbac kuq gay shuex.
6 Yehowa muex tvtsvmc wuez shuinz;
vpiq rueq romc kuy tvkoc ngaz rueq thoz vshaungx kuex tay tueq.
7 Yehowa rueq ngaz muex tvkhup wungx vtueq tvguing kuq yaq;
ngaz kuex vpiq muex tvluimc vshaungx.
Vpiq rueq ngaz muex romc kuq
vtueq ngaz muex tvkoz kez yaq;
ngaz rueq vpiq muex vkokez juing shic htenc maq tvtsvmc shix vtaungx.
8 Yehowa rueq vpiq miqsaz htenc kuex tvkhup wungx kuq yaq;
vthvlc tvy rvhumc tueq vpiq hokhvmx waz kuex
tvkhup wungx kuq ruiux palc wvnc tueq.
9 Yehowa lex, mmiqsaz htenc kuex palc wvnc shuiuz,
Mmiqsaz htenc muex ruimruimx kuq shuiuz.
Tsuingshiq kuex lawc jix khelbuenx remc jix waz muex yaungx vtueq,
tsuingshiq kuex pattup tvkhup wungx shuiuz.