TVTSVMC 25
1 O Yehowa lex, ngvy vjux thoz maq mnoz muex shomc kuq vphaungx;
2 ngvy Tishox lex, mnoz muex ngaz rueq tvluimc vphaungx.
Miq yvlc vsac sumx wvnc tauk
wawc ngaz kuex palc wvnc koq;
ngvy ralx htenc muex tvtaungx vtueq nauk tvkokez kaz!
3 Mnoz muex tvluimc jix htenc kuex nauk tvsumx rumx kaz,
yuq muinz mnoz muex khawc lvlc jix hez htauk nuex htat htat httuiuc yaq.
4 O Yehowa lex, mlvmz kuex ngaz muex tvluing kuq koq;
kvruex lvmx kuex ngaz muex tvtuiuz kuq koq.
5 Mnoz tsuingrux lvmx rulc rv-ngvlc
thuiuzthuic tvraungx lvp tvkoc
ngaz muex tvluing kuq koq, mnoz kuex ngvy Tishox,
ngvy palc wvnc jix waz rvtueq.
Ngaz rueq mnoz muex mkaq muinz tvluimc vphaungx.
6 O Yehowa lex, mvnnuex pat maq phaungc vtueq mnoz rueq tvkhic wvnc toq
menjenc thuinz nuiyc phaungx ngaungx hvlc lungwawc thuinz kuex tvmaung shuiuz.
7 Ngaz yalxrox pat nuex yaq wvnc tauk htenc nuiyc mvrax htenc kuex dawc kuq koq.
Yehowa lex, mnoz phaungx ngaungx hvlc lungwawc thuinz nuiyc
vhvlx thuinz maq ngaz kuex rvwvl koq!
8 Yehowa kuex tsuingrux vtueq vhvlx waz ningkhvnc nuex,
mvrax kop yaq jix htenc tsuing-shiq rueq phvnc juing lvmx vpiq rueq tvluing kuq yaq.
9 Vlvmx nuex thuinz tv-nyenc jix htenc kuex vpiq rueq shvlx wvnc vtueq,
vpiq thuinroc lvmx tsuingshiq muex tvluing kuq yaq.
10 Vpiq bomkhvrc nuiyc vpiq rueq nvrc bomc lotlaz tay phvnc jix
muex lungwawc thuinz nuiyc tvmtuing maq lvmx shvlx kuq tueq.
11 Yehowa lex, mbomkhvmc kuex tvhungx shuiuz,
ngvy mvrax htenc kuex dawc kuq koq,
yvmx khoc lac ngoz ruiux lec kvdoc muinz paunghvlc shex.
12 Yehowa muex tay phvnc jix htenc
kuex tsuingshiq rueq phvnc
juing lvmx htenc vpiq kox wawc tvluing wvnc shuex.
13 Tsuingshiq kuex mkaq muinz rungwanx wvnc vtueq,
tsuingshiq suiuz vsaz htenc rueq kvruex mungtan kuex guimz wvnc shuex.
14 Yehowa kuex vpiq kvjaz tay jix rulc kungjix yaungx vtueq;
vpiq bomkhvrc kuex tsuingshiq muex tvluing kuq shec tueq.
15 Romc kuy tvkoc Yehowa kuex ngaz rueq vkhing ruip rawx lawc vshaungx,
vpiq rueq ngaz kuex vhiz juing wawc palc wvnc phuex.
16 Yehowa lex, ngaz kuex kvmenc
kvjenc rvhumc vtaungx nuiyc
hungc vlaungc nulx vtaungx ningkhvnc nuex,
ngaz kuex lawc vtueq menjenc kuq koq.
17 Ngaz rvwvlc tvmaung thuiyc vtaungx kuex tvhvlc kuq koq,
kuilc daz juing lotlaz wawc ngaz kuex palc wvnc koq.
18 Ngaz rvwvlc tvmaung thuiuz nuiyc jamjaux lvmx htenc kuex rvwvl kuq koq,
ngvy mvrax lotlaz kuex dawc kuq koq.
19 Ngaz nuex ralx mtanc lac paung yaq nguinx kuex khiz kuq koq;
tsuingshiq rueq ngaz mtanc lac shuiuc pac yaq nguinx kuex tuiuz taq shuiuz.
20 Ngaz muex tvkhup wungx kuq vtueq palc wvnc koq;
ngaz kuex nauk tvsumx rumx vkueq.
Ngaz kuex mnoz kox nuex kvwungx tvkoc httuiuc kaz raungx.
21 Ngaz kuex mnoz muex kvmx vtaungx ningkhvnc nuex,
ngaz vhvlx nuiyc kenrix thuinz rueq ngaz kuex mtuimz guimz kuq phueq.
22 O Tishox lex, miqsaz Israel kuex
tsuingshiq kuilc daz yaq lvmx lotlaz wawc palc wvnc shuiuz!