TVTSVMC 19
Raungx rueq muinz Tishox ngauz vngax kuex tvkhic tvdung kuq tueq!
Kvruex raq vpiq yauk shuimc kuex raungshuex raung tvkhic kuq tueq!
Nuiyqshiz maq nuiyqshiz vpiq ngauz vngax kuex tvtay kuq vtueq,
wvrx shiz maq wvrx shiz kvruex lvmz tvyez jungphvnx kuq yaq.
Nuix maq kvjak muq,
yvmx thuic yvmx bomc muinz tay muq;
yuq muinz tsuingshiq bomjungc kuex mungkawx baung ruip saz nuex nyvmc wvnc vtueq
mungkawx lotlaz nuex bomjungc kuex tay wvnc wuez tueq.
Tishox rueq shalx tvkoc raungx nuex yuimx vshiz guirx taq tueq;Ref 19:4 Rom 10:18
miq lvmc tvkoc vkoz vkez maq dung kaz yaq waz nyalx waz vshiz ikhoc muinz,
vyuz rvsherc tvkoc thuinz phez hvlc maq dung kaz yaq waz ikhoc muinz,
shalx kuex raungnvp nuex dung wvnc yaq.
Vpiq kuex raungsamx kox maq dung vtueq
raungsamx kox tvsuip nuex httuiuc laz kvroz khuemx wvnc tueq.
Vpiq kawc vkalc rvhumc muq phvnx yvmx muinz vguez.
Yehowa tvrac kuex hungx htaungx mvrc yaq;
kvruex hungc vlaungc vnyalx kuq yaq.
Yehowa rueq nvrc bomc htenc vkvmx juing ningkhvnc nuex,
kvruex tvrac lvp muq jix htenc muex taksux tharc kuq yaq.
Yehowa tvrac kuex vlvmx rvtueq,
kvruex tay phvnc jix htenc kuex thuinhvlx wuez yaq.
Yehowa rueq nvr yaq tvrac htenc kuex vlvmx rvtueq,
thuinz vmungx nuex tvtuiuz tvtay kuq yaq.
Yehowa muex tvtsanc nganc lvmx kuex vhvlx pinhtumc rvtueq;
kvruex kuex rullungx pattup phaungx ngaungx wvnc tuex.
Yehowa rueq phox kuq yaq lvmx kuex tvrac vlvmz rvtueq;
kvruex kuex mkaq muinz vlvmx rvtueq.
10 Kvruex kuex kuimshawx htauk nuex muinz jvnc vtueq raungc raq juing nuiyc
nyaq ngurx muik shauk htauk nuex muinz vruimx pinhtumc rvtueq.
11 Kvruex htenc kuex mnvrc waz rvtauk ngaz phaqjic kuq koq;
ngaz rueq kvruex htenc kuex
phvnx vshaungx ningkhvnc nuex
yauk noalc kejux lvp wvnc vshaungx.
 
12 Miqmac vyaq vrax lvmx kuex uraq muinz khiz muq;
Yehowa lex, vhttuiyq vpuiuc vruez mvrax kvwawc ngaz kuex tvdung wvnc koq!
13 Htvmhtvmx maq vshuimx kaz mvrax kvwawc muinz tvsawc wvnc koq;
kvruex raq ngaz kuex puingc wvnc muq mruez phueq.
Kvkhoc ngaz kuex hungx htaungx wvnc vtueq,
layx vbac mvrax wawc dung wvnc lvp taungx.
 
14 Ngvy kvwungx juing nuiyc ngvy
palc wvnc jix waz O Yehowa lex,
ngvy kvjaz htenc nuiyc ngaz rueq tvmaung vshaungx htenc kuex
mhtumc nuex vraungc raq juing muex m-yaungx kueq!