TVTSVMC 18
(2Sam 22:1-51)
1 Yehowa lex, ngaz rueq mnoz kuex pinhtumc lungwawx vphaungx!
Mnoz kuex ngvy tvkhup wungx kuy jix waz rvtoq.
2 Yehowa kuex ngvy tvkhup wungx jix waz;
ngvy hungc vlaungc nolaungx ghaqshungc rvtueq.
Ngvy Tishox kuex ngaz muex tvkhup wungx kuy jix rvtueq,
vpiq nuex ngaz kvwungx httax vtaungx.
Vpiq rueq ngaz kuex lak vshiz ikhoc tvkhup wungx kuq yaq,
ngaz muex tvkhup wungx kuq ruiux tvguing tvhttax yaq.
3 Ngaz rueq Yehowa kuex gvl vtueq,
vpiq rueq ngaz kuex ngvy ralx htenc yauk wawc palc wvnc phuex.
Yehowa muex tvtsvmc wuez shuinz!
4 Vhiz juing vthueyc rueq ngaz kuex tvroz tuimx wvnc vtueq;
tvbac gay jix yuix daungx rueq ngvy htauk nuex luimz wvnc vphuex.
5 Vhiz juing vthueyc rueq ngaz kuex tvroz tuimx wvnc phuex;
luip ruiuz khux kuex ngvy tvkoc bix tsvnc yaq.
6 Ngaz kuilc daz vtueq ngaz rueq Yehowa kuex gvl tauk;
romc kuy tvkoc ngvy Tishox kuex ngaz rueq gvl tauk.
Vpiq shomc yuimx maq ngvy thuic bomc kuex tay vtueq;
romc kuy tvkoc ngaz rueq ramc tauk kuex vpiq rueq tay tueq.
7 Kvmaq Tishox kuex thuinkhvy ningkhvnc nuex
ghaq kuex kvbuilc wvnc vtueq,
kuz vkanx htenc muinz vjungx yaz maq kvbuilc wvnc tueq.
8 Vpiq khuiz puc htenc maq wvr khuiuq htenc dung wvnc vtueq,
vnuix maq khamc gay lot yaq wvrluic nuiyc wvr junx thuey htenc dung wvnc tueq.
9 Vpiq rueq raungx kuex juir vtueq svt kaz ruiux;
vhuk phac khung nuex nyauk hvlc phuemx maq svt kaz tueq.
10 Vpiq kuex kherubimRef 18:10 Kherubim kuex Tishox ngauz vngax tvkhic kuy muex vtvtsuingc juing rvtueq, Tishox httax yaq lvmx vlvmz kuex tvkhic yaq. htauk nuex ngaungc vtueq rvmak laz httuiuc kaz yaq;
raungguil htauk nuex vpiq baz khuemx yaq.
11 Vpiq rueq vshauk pumz kuex nyauk hvlc maq puingc gay ruiux;
htvy hvlc phuemx htenc nuiyc yuix yunghvlc htenc rueq vpiq kuex tvkomc tuimz httax yaq.
12 Vpiq khaungkac nuex tv-nguirx nuiyc wvrluic htenc kuex
raunglep yaq wawc dung vtueq nyauk hvlc phuemx htenc kuex
tvlvt tv-phot dvy kaz yaq.
13 Kvkaq Yehowa rueq raungmungx maq raungmuk tvmuk tueq;
Johvlc Pinhtumc Waz thuic bomc kuex kvtay yaq.
14 Piq rueq vlaq svnz htenc kuex gap koq tueq vralx htenc kuex panx yanx wvnc tueq;
raungx lep htenc kuex tsuingshiq yix nuex tvyuz tvpanc gay tueq.
15 Yehowa lex, mnoz rueq mralx htenc kuex httonx ruiux,
thuinz tvkhaq vtueq tsuingshiq kuex ramc koq tueq,
svmuktvrax mungx wawc phawx rawz kuex dung wvnc vtueq,
ghaq vjungx vbaung htenc muinz dung kvkhic wvnc tueq.
16 Yehowa rueq raungmungx maq yauk tvlanc vtueq ngaz het wvnc ruiux;
yuix thuiuz hvlc wawc ngaz kuex tvdung palc wvnc phuex.
17 Hungc vlaungc httaz hvlc ngvy ralx htenc nuiyc,
ngvy shuiuc pac jix htenc lotlaz yauk wawc muinz
vpiq rueq ngaz kuex palc wvnc phuex,
tsuingshiq kuex ngvy tvkoc pinhtumc hungc hvlc rvtueq.
18 Ngaz kuilc daz rvhumc tauk nuex tsuingshiq rueq ngaz khvt phuex,
yuq muinz Yehowa rueq ngaz muex tvkhup wungx kuq phuex.
19 Vpiq rueq ngaz kuex kvhiz juing wawc romc kuq wvnc phuex;
vpiq kuex ngaz nuex httax ningkhvnc nuex ngaz kuex palc wvnc phuex.
20 Ngaz rueq vlvmx yauk shuimc ningkhvnc nuex
Yehowa rueq ngaz muex yauk noalc tvtsvmc yaq;
ngaz kuex mvrax kop muq waz ningkhvnc nuex
vpiq rueq ngaz muex ruimruimx kuq phuex.
21 Yehowa tvrac kuex ngaz rueq phvnx tauk;
ngvy Tishox kox maq vluz nuex ngaz kvroz kaz wvnc mauk.
22 Vpiq tvrac htenc lotlaz ngaz rueq phvnx tauk;
vpiq rueq nvr htenc ngaz rueq tay phvnx mauk lvmz vguez.
23 Ngaz mvrax kop muq kuex vpiq rueq tuiuz yaq;
vyaq yauk shuimc kuex ngaz rueq httvr gay tauk.
24 Kvmaq ngaz kuex vlvmx yauk shuimc jix ningkhvnc nuex
vpiq rueq ngaz muex yauk noalc tvtsvmc yaq,
ngvy mvrax kop mauk waz rvtauk kuex vpiq rueq tuiuz yaq.
25 O Yehowa lex, mnoz nuex tvmtuing vhttax jix htenc htauk nuex
mnoz muinz tvmtuing httax vtuiux;
hunghtaungx yaq jix htenc muex vhvlx kejux shuimx kuq vshuiux.
26 Thuinz vsawc jix htenc muex vsawc thuinz mnoz rueq tvkhic vshuiux,
yuq muinz layx bac jix htenc muex vtuing vshaung thuinz mnoz rueq tvkhic vshuiux.
27 Thuinz tvyomx thuinz httaz jix htenc kuex mnoz rueq palc wvnc toq,
yuq muinz ngamc vngax thuinz httax yaq jix htenc kuex
mnoz rueq tvnulx gay toq.
28 O Yehowa lex, mnoz rueq ngaz muex raungwuic kuq phux;
ngvy raungnyauk kuex mnoz rueq tvmoz kuq gay phux.
29 Mnoz rueq ngvy ralx htenc kuex khvt tvkoc ngaz muex hungc vlaungc kuq phux,
tsuingshiq kvtuk yaq htenc kuex tvbac gay tvkoc luimc vkawc muinz kuq phux.
30 Tishox rueq shuimx wvnc tueq yauk shuimc htenc kuex hunghtaungx wvnc tueq!
Vpiq rueq jungx wvnc tueq muinz vkvmx juing rvtueq!
Vpiq kox nuex kvwungx jix lotlaz tvkoc lak ikhoc yaungx yaq.
31 Yehowa dvyx Tishox rvtueq;
Tishox dvyx naungshiq kvwungx juing rvtueq.
32 Vpiq rueq ngaz muex yungc tvyungc kuq ruiux,
ngvy lvmx kuex tvkhup wungx kuy jix Tishox rvtueq.
33 Khiyix yaz phaungx yaq ikhoc vpiq rueq ngvy yaz tv-phaungx kuq phuex;
kuz vkanx htenc htauk nuex ngaz kuex vpiq rueq tvkhup wungx taq phuex.Ref 18:33 Hab 3:19
34 Vpiq rueq ngaz kuex ralx lungc tvkoc tvluing kuq phuex,
kvkhoc rvtueq ngaz rueq hungc hvlc laq kuex shuimx lvp vshaungx.
35 O Yehowa lex, mnoz rueq ngaz kuex tvkhup wungx vtueq palc wvnc phux;
mnoz rueq konjonz lawc kuy ningkhvnc nuex ngaz yungx luz wvnc tauk,
mnoz hungc vlaungc rueq ngaz kuex tvkhup wungx tvhttax yaq.
36 Vlvp rvhumc khvmz wawc mnoz rueq ngaz kuex tvkhup wungx kuq phux,
ngaz mkaq muinz rul mauk shauk doc.
37 Ngaz rueq ngvy ralx htenc kuex yurc vtueq tsuingshiq kuex lvp taq tauk;
tsuingshiq kuex tvbac gay lot nuex httuiuc laz ngaz thauk taungx rvmuq.
38 Ngaz rueq tsuingshiq kuex wung tvrul gay koq tueq tsuingshiq kvtenc lot muq shex;
kvkhoc tsuingshiq kuex ngvy htumc nuex sumx wvnc wuez tueq.
39 Mnoz rueq ngaz muex ralx khvt tvkoc hungc vlaungc kuq phux;
ngvy ralx htenc kuex tvtaungx gay phux.
40 Mnoz rueq ngvy ralx htenc kuex ngvy kox wawc tvyuz yurc gay toq;
ngaz rueq ngaz muex shuiuc pac jix htenc kuex tvbac gay tauk.
41 Romc kuy tvkoc tsuingshiq guyc koq muinz,
tsuingshiq kuex uraq muinz palc wvnc muq;
tsuingshiq rueq Yehowa kuex gvl tueq, yuq muinz vpiq rueq tvralc kuq muq.
42 Ngaz rueq tsuingshiq kuex tvbunx jek gay tauk,
tsuingshiq kuex raungguil nuex pvnc wvnc yaq bokkhuyx ikhoc
yaungx wvnc wuez vtuex.
Lvmx laungx wawc bokbiq ikhoc nuiuz nut gay tauk.
43 Mnoz rueq ngvy khawc lvlc jix miqsaz htenc yauk wawc palc wvnc vtueq,
miqphvnx ruip rawx htauk nuex guimz lawc jix waz muex mnoz rueq ngaz tvyaungc phux;
majuiuc kuex ngaz rueq tuiuz mauk miqsaz htenc
ngvy mungx miqsaz muex yaungx wvnc wuez tueq.
44 Pungnuk miqsaz htenc ngvy htumc nuex bumx vtueq nawk yaq;
ngaz rueq jungx shaungx kvjaz kuex tay vtueq phvnx wuez yaq.
45 Tsuingshiq kuex khvmc thuinz vguez shex
tsuingshiq nolaungx ghaqshungc mungx wawc
kv-khuirc yaq lvmx maq dung kaz wuez yaq.
46 Yehowa kuex tvraungx httax yaq!
Ngvy tvkhup wungx kuy jix waz muex tvtsvmc wuez shuinz!
Ngvy palc daungc jix Tishox yungx luz yaq lvmx kuex jungx wuez shuinz.
47 Vpiq rueq ngvy ralx htenc htauk nuex taungx gay lotlaungc kuex kuq phuex;
ngvy khung nuex miqphvnx htenc kuex vpiq guimz kuq yaq
48 nuiyc ngvy ralx htenc yauk wawc ngaz kuex palc wvnc phuex.
O Yehowa lex, ngvy ralx htauk nuex ngaz muex tvtaungx kuy kuq vtueq
yauk laungc yalawx ruec jix miqsaz yauk wawc
mnoz rueq ngaz tvkhup wungx kuq phux.
49 Kvkhoc rvtueq ngaz rueq mnoz kuex miqphvnx htenc hvlwvl nuex tvtsvmc vphaungx;
ngaz rueq mnoz muex tvtsvmc shic shix vtaungx.Ref 18:49 Rom 15:9
50 Tishox rueq vpiq hokhvmx waz muex yunghvlc taungx wvnc lvmx kuq tueq;
thvl wvnc tueq Dawid nuiyc piq suiuz vsaz htenc muex
phaungx ngaungx yaq lungwawc thuinz pattup tvkhic kuq shec tueq.