TVTSVMC 146
1 Yehowa muex tvtsvmc shuinz!
Ngvy siyac lex, Yehowa muex tvtsvmc shuiuz!
2 Ngvy rullungx tvraungx wawwawx
vpiq muex ngaz rueq tvtsvmc shaungx;
ngvy rullungx wvlex ngvy Tishox muex tvtsvmc shaungx.
3 Miqsaz vyungx vlaungx yaungc jix htenc muex nauk tvluimc kaz;
miqsaz uraq muinz mnoz kuex palc lot muq.
4 Tsuingshiq thueyc kaz ruiux yuq
ghaq daungx nuex yek kaz yek yaq;
kvruex raungnuiyq dvyx tsuing-shiq rueq kvmungx yaq htenc kuex htumx kaz yaq.
5 Yaku Tishox rueq romc kuy rvhumc jix htenc nuiyc
Yehowa piq Tishox nuex rvwak jix htenc kuex thuinhvlx yaq.
6 Vpiq rueq raungx nuiyc ghaq, svmuktvrax nuiyc
kvruex yuq httax yaq phvnx lotlaz kuex Tvdung Sung jix rvtueq.
Vpiq rueq vpiq bomkhvmc htenc kuex mkaq muinz tvmvrc yaq;Ref 146:6 Kamx 4:24; 14:15
7 vpiq kuex tuinghtuing gay rvhumc
jix htenc kox nuex raz tueq khac phox kuq ruiux khvmx
vrvmc svy rvhumc jix htenc muex phuiuz vsvy kuq yaq.
Yehowa rueq khoktep miqsaz htenc kuex tvdung kuq tueq;
8 muik mawz jix htenc muex muik tvkalc kuq tueq.
Vrulc wvnc jix htenc kuex htuiz daungx kuq ruiux,
vpiq muex tsuingrux miqsaz htenc kuex vpiq rueq lung-wawc yaq.
9 Naungshiq ghaq vraungx nuex httax yaq pungnuk miqsaz
htenc kuex vpiq rueq tvkhup wungx kuq yaq,
mvntix nyuiuz tamx nuiyc nojix saz tamx muex vpiq rueq romc kuq yaq,
yuq muinz layx bac jix htenc
rueq kvmungx yaq lvmx kuex tvsuimz rvgay tueq.
10 Yehowa kuex pattup hokhvmx waz rvtueq.
O Zion lex, m-Tishox rueq patshiz maq patshiz guimz wvnc tuex.
Yehowa muex tvtsvmc shuinz!