TVTSVMC 144
Ngaz muex tvguing tvwungx kuq yaq Yehowa muex tvtsvmc shuinz!
Vpiq rueq ngaz muex ralx khvt,
ralx lungc juing lvmx tvluing kuq phuex.
Vpiq kuex ngvy kvguing kvwungx juing, ngvy kvgawx juing palx
ruk, ngvy palc daungc jix ngvy lak nuiyc kvwungx tvkoc ngaz
rueq tvluimc juing waz rvtueq.
Miq phvnx htenc kuex vpiq rueq
ngvy yauk khung nuex taq kuq phuex.
 
Yehowa lex, miqsaz kuex yvmx khoc lix miq rvtueq lac mnoz rueq piq kuex lawc vshuiux?
Miqsaz dvyx rvhvt maq mnoz rueq yvmx ngoz tueq lac
vkhek waz ikhoc tvyaungc vshuiux.Ref 144:3 Yob 7:17-18; Tvts 8:4
Miqsaz kuex vdungc vnyuip rvyaq raungguil rulc rv-ngvlc yaq;
piq rullungx kuex vlvy rvwvnc vtuex yac khawx ikhoc dvyx rvtueq.
 
O Yehowa lex, raungx kuex juir vtueq svt kaz loq;
kanx htenc kuex htuinc shuiuz, kvruex wawc wvr khuiuq dung tuex.
Raungx tvlep vtueq mralx htenc kuex tvpanc yurc gay shuiuz;
mlaq svnz htenc gap vtueq tsuingshiq kuex tvyurc gay shuiuz.
Johvlc baung maq m-yauk kuex tvlanc vtueq,
thuiuz hvlc yuix mungx wawc ngaz kuex het tvdung vtueq palc wvnc koq;
pungmungx miqsaz yauk wawc ngaz kuex palc wvnc koq,
tsuingshiq rueq vlvmx kvjaz kuex mkaq muinz jungx wuez muq,
kvruex jungc tvkoc vtuemc kvjaz nuiyc bomkhvmc vtaq
rvyruiux tsuingshiq kuex rot kaq ruq dvyx rvyaq.
 
O Tishox lex, shic vnyalx maq
mnoz muex ngaz rueq shix ngoyx taungx;
torox tuimz vtueq mnoz muex shix ngoyx taungx.
10 Mnoz rueq hokhvmx bix muex lotlaungc wvnc kuq toq nuiyc,
mnvrc waz Dawid kuex palc wvnc toq.
11 Guirguenz yaq ngvy ralx htenc
yauk wawc ngaz kuex palc wvnc koq;
pungmungx miqsaz yauk wawc
muinz ngaz kuex palc wvnc koq,
tsuingshiq rueq vlvmx kvjaz kuex
mkaq muinz jungx wuez muq,
vtuemc kvjaz nuiyc bomkhvmc kuq ruiux doc muinz vrot vkaq dvyx jungx wuez yaq.
 
12 Nuiyshiq saz tamx kuex rullungx nosaz baunglaung nuex,
vkemc sahez yungx luz wvnc yaq ikhoc m-yaungx wvnc kueq.
Nuiyshiq saz yalxjuik sahez muinz hoc wangx shuk htenc nuex
tvsvp juing vshungc taq lung-htung htenc ikhoc m-yaungx wvnc kueq.
13 Nuiyshiq tsvmz tap htenc nuex
jurx vkhvmx phvnx ruip saz mmvrc wvnc kueq,
ngac remc juing nuex guilc yaq khelbuenx htenc muinz
vsaz vhingc vmunc mpaung wvnc kueq.
14 Nuiyshiq suiux vmanx htenc
muinz vthueyc vmvy vguez maq mpaung wvnc kueq.
Nuiyshiq lvmx htenc nuex vkuilc
vdaz rvhumc yaq jix htenc huinsez kvjaz vguez mrvkueq.
 
15 Ekvkhoc tsuingrux maq httax lot
yaq miqphvnx kuex thuinhvlx yaq;
Yehowa kuex Tishox ngoz tueq kvmx jix miqphvnx kuex thuinhvlx yaq.