TVTSVMC 140
1 Yehowa lex, honc bac jix yauk wawc ngaz kuex palc wvnc koq;
yauk laungc yalawx tvyaungc jix miq hez mungx wawc ngaz tvkhup wungx
wvnc koq.
2 Tsuingshiq rueq mkaq muinz
honc vbac yauk shuimc kuex kvmungx yaq nuiyc,
mkaq muinz rvthoz thvy tvkoc dvyx naq yaq.
3 Tsuingshiq tvlix kuex vyangx
httax yaq puiuc ikhoc yaungx vtueq,
tsuingshiq rueq jungx yaq kvjaz htenc kuex puiuc kemx yangx ikhoc rvtueq.Ref 140:3 Rom 3:13
4 Yehowa lex, layx bac jix htenc
luimc vkawc wawc ngaz kuex tvguing wvnc koq;
ngaz kuex tvdvy gay tvkoc dvnc yaq yauk laungc yalawx
tvyaungc jix miqsaz htenc yauk wawc tvkhup wungx wvnc koq.
5 Ngamc ngax miq htenc ngvy
tvmanc tvkoc bix tsvnc taq tueq; tsuingshiq rueq ngvy lvp
tvkoc lvmx nuex jak tvparc taq ruiux, phix tvhungx tsvnc taq tueq.
6 Ngaz rueq Yehowa muex, “Mnoz
kuex ngvy Tishox rvtoq,” ngoz tueq jungx tauk.
Yehowa lex, romc kuy tvkoc ngaz rueq guyc sez kvjaz kuex tay kuq koq!
7 Ngaz muex Johvlc Yehowa hungc vlaungc maq mvrc vtueq,
mnoz rueq ngaz kuex ralx rvkhvt yaq wawc tvkhup wungx kuq phux.
8 Yehowa lex, layx bac waz rueq roc yaq lvmx kuex nauk kuq kaz;
tsuingshiq rueq vbac kvmungx yaq lvmx htenc kuex nauk phvnx kuq kaz.
9 Ngvy ralx htenc muex taungx wvnc lvmx nauk kuq kaz;
ngaz muex tvhiz sungx ngoz yaq lotlaz kuex tsuingshiq htauk nuex mdvy wvnc kueq.
10 Tsuingshiq htauk nuex wuix guil
kalx yaq wvrjunx thuey mdvy kueq;
tsuingshiq kuex ghaqkhurx nuex dvy wvnc vtueq mkaq muinz
duiz lot muq shex mrvkueq.
11 Miq vganc jix htenc muex vrot vkaq kvjaz maq mvrax thuiyc
jix htenc kuex mdvy wvnc kueq;
honc vbac phvnx rueq yauk laungc yalawx tvyaungc jix miq
htenc kuex lauz wvnc vtueq tsuingshiq kuex tvbac gay tueq.
12 Yehowa lex, mnoz rueq htemc vrvmc jix htenc vjux nuiyc,
rax yaq jix muex tvguing kuq vshuiux kuex ngaz rueq tuiuz vshaungx.
13 Tsuingrux miqsaz rueq vsuingc
suing mnoz muex tvtsvmc wuez shuex;
tsuingshiq kuex mkhaungkac nuex httax wuez tuex.