TVTSVMC 138
1 Yehowa lex, ngvy thuinz vmungx lotlaz maq mnoz muex kejux vyungx ngoz vphaungx;
tishox htenc khaungkac nuex mnoz muex ngaz rueq shix ngoyx phaungx.
2 Mnoz phaungx ngaungx yaq lungwawc nuiyc tvmtuing
kuex mmuingc jungc nuiyc mnoz rueq nvrc bomc htenc
lvmx tvkhic kuq yaq ningkhvnc nuex, mnoz vsawc
Shomc Yuimx nuex ngvy htvlx phawc tv-muiz vtueq bumx
ruiux mmuingc kuex tvtsvmc phaungx.
3 Mnoz kuex ngaz rueq gvl phaungx tueq mnoz rueq tvralc kuq
ruiux; mhungc vlaungc maq ngaz muex hungc kuq phux.
4 Yehowa lex, mungkawx wawc hokhvmx bix wvyvmc rueq
mbomkhvmc htenc tay tueq ningkhvnc nuex,
tsuingshiq rueq mnoz muex tvtsvmc wuez shuex.
5 Mnoz rueq shuimx wvnc toq yauk
shuimc htenc nuiyc mnoz yungx luz yaq ngauz vngax
kuex tsuingshiq rueq shix ngoyx wuez shuex.
6 Mnoz kuex johvlc baung nuex httax ruiux muinz,
thuinz tvyomx jix htenc muex mnoz rueq lawc mawc wvnc
toq, ngamc ngax jix htenc kuex mnoz kox wawc
kvhttuiyq kvyenc lvp tuex rvmuq.
7 Vkuilc vdaz rueq tvroz ruimc wvnc ngaz rvhumc tauk nuex
mnoz rueq ngaz muex tvkhup wungx kuq phux.
Ngvy ralx htenc thuinkhvy kuex
mnoz rueq tuinghtuing kuq gay ruiux, mnoz luimc vkawc
maq ngaz kuex palc wvnc phux.
8 Mnoz rueq bomkhvmc taq toq rulc rv-ngvlc phvnx ruip saz kuex tvhungx tvmvrc vshuiux.
Yehowa lex, mlungwawc kuex pattup httax yaq.
Mnoz rueq vphaungc yauk shuimc htenc kuex tvlot shuiuz.