TVTSVMC 115
O Yehowa lex, mnoz phaungx ngaungx yaq lungwawc nuiyc tvmtuing ningkhvnc nuex,
mnoz ngauz vngax kuex mnoz
nuex dvyx, mnoz nuex dvyx mhttax kueq,
nuiyshiq nuex kvruex ngauz vngax kuex httax muq.
 
“Nuimshiq Tishox kuex m-yuq lac httax yaq nguinx?”
Ngoz tueq miqphvnx htenc rueq nuiyshiq muex yvmx ngoz tueq lac wiz yaq nguinx?
Naungshiq Tishox kuex raungmungx nuex httax yaq;
vpiq thuinroc yvmx yuq muinz vpiq rueq shuimx kaz yaq.
Tsuingshiq tishox htenc kuimphox maq tvhungx ruiux,
kvruex htenc kuex miq yauk maq tvhungx wvt taq tueq.Ref 115:4-8 Tvts 135:15-18; Tvkh 9:20
Tsuingshiq kuex vnuix vhttax rvhvt maq kvjak lot muq,
vmuik vhttax, yuq muinz khiz lot muq.
Tsuingshiq nuex vnac httax yaq, yuq muinz tay lot muq,
vkhuiz httax yaq, yuq muinz vthuingc shec lot muq.
Tsuingshiq nuex yauk htenc httax
yaq, yuq muinz shuimx lot muq,
vyaz httax yaq, yuq muinz khuemx lot muq;
tsuingshiq rueq thuic bomc kuex tvdung lot muq.
Kvruex yac yuimx htenc kuex wvt tvhungx guirc jix htenc nuiyc
tsuingshiq muex tvluimc jix
htenc kuex tsuingshiq shuimx wvnc tueq yac yuimx htenc
ikhoc m-yaungx wvnc kueq.
 
Israel miqsaz htenc lex, Yehowa muex tvluimc wuez kuinz.
Piq rueq nuimshiq muex romc kuq ruiux tvguing tvwungx kuq yaq.
10 Tishox shomc waz bix lex, Yehowa muex tvluimc wuez shuinz.
Nuimshiq muex romc kuq ruiux tvguing tvwungx kuq yaq.
11 Yehowa muex nawk palx jix lotlaz
lex, vpiq muex tvluimc wuez shuinz.
Vpiq rueq nuimshiq muex romc kuq ruiux tvguing tvwungx kuq yaq.
 
12 Yehowa rueq nuimshiq kuex
tvmaung lvp vtueq ruimruimx kuq kv-phuinx;
vpiq rueq Israel miqsaz htenc muex
nuiyc Tishox shomc waz bix muex ruimruimx kuq shuex.
13 Vpiq muex tvtsanc nganc jix miq ruip rawx wawc,
vyungx vruinx ngoz muq lotlaz muex ruimruimx kuq shuex.Ref 115:13 Tvkh 11:18; 19:5
 
14 Yehowa rueq nuimshiq nuiyc
nuimshiq suiuz vsaz htenc muex nuingc vnox mkuq kv-phuinx!
15 Raungx nuiyc ghaq tvdungc sungc
jix Yehowa rueq nuimshiq muex ruimrix mkuq shueq!
 
16 Raungmungx kuex Yehowa rueq dvyx guimz yaq,
yuq muinz ghaq kuex miqsaz muex kuq tueq.
17 Vthueyc kay wuez jix htenc nuiyc
kuiyqshuik kuiyqshix baung nuex kay wvnc jix htenc rueq
Yehowa muex tvtsvmc lvp wuez yaq rvmuq.
18 Yuq muinz rullungx tvraungx
httax vtix naungshiq htenc kuex majuiuc vmaq phaungc vtueq,
pattup pat-sac nuex httuiuc laz vpiq muex kejux vyungx ngoz vshix.
 
Yehowa muex tvtsvmc wuez shuinz!