TVTSVMC 108
(Tvts 57:7-11; 60:5-12)
O Tishox lex, ngaz kuex mnoz muex tvsawc ric kvmx vtaungx!
Ngaz rueq shic vngoyc maq mnoz muex tvtsvmc shix phaungx!
Ngvy siyac lex, svmz kuiuz!
Ngvy torox nuiyc toloz lex,
kvsvmc kuinz!
Shalx kuex ngaz rueq tvsvmc shaungx.
O Yehowa lex, miqphvnx htenc
hvlwvl maq mnoz muex kejux vyungx ngoz shaungx.
Miq htumc nuex ngaz rueq mnoz muex tvtsvmc phaungx.
Mnoz phaungx ngaungx yaq
lungwawc thuinz rueq raungx htenc htanc vtueq,
mnoz tvmtuing kuex raungx nuex httuiuc laz htanc yaq.
 
O Tishox lex, mnoz yungx luz
vtuiux kuex raungx nuex nuiyc ghaq htauk nuex muinz,
mnoz ngauz vngax kuex httax yaq kuex tvkhic shuiuz.
Mnoz hungc vlaungc maq nuiyshiq kuex palc wvnc koq;
nuiyshiq vjux thoz bomc kuex tvralc koq;
kvkhoc ngoz ruiux mnoz rueq
lungwawx vshuiux miqsaz htenc kuex palc wvnc rvhumc wuez tuex.
 
Vpiq vsawc baung maq Tishox
rueq, “Vtaungx wvnc maq ngaz rueq Shekhem muex phvlx kuq shaungx,
Sukkot warc tvnx kvmuinz ngvy
miqsaz htenc muex phvlx kuq shaungx.
Gilead nuiyc Manase kuex ngaz rueq guimz yaq;
Ephraim kuex ngvy yanx khux phuk,
Yuda kuex ngvy hokhvmx paq rvtueq.
Yuq muinz Moba kuex ngvy yaz
hoalc juing tuik ikhoc ngaz rueq shuimx shaungx
Edom htauk nuex ngvy yapaungc kuex tuip taq shaungx,
kvruex kuex ngaz rueq guimz vshaungx vyac shvmx rvtueq.
Philistin miqsaz htauk nuex
taungx wvnc vtueq ramc shaungx,” ngoz tueq jungx tueq.
 
10 O Tishox lex, nolaungx ghaqshungc ghaqyungx nuex ngaz kuex uraq lac shvlx laq phvnx?
Edom nuex ngaz kuex uraq lac shvlx laq phvnx?
11 Mnoz rueq nuiyshiq kuex vsuing haz tuip gay vphux?
Nuiyshiq nolaungx daungx rulc roc nuex kaz naungx muq haz?
12 Ralx hez kuex tvgap gawx tvkoc nuiyshiq muex romc kuq koq;
miqsaz rueq romc kuq yaq lvmx kuex khuec guez dvyx rvtueq.
13 Tishox kuex naungshiq kox
kvnvp nuex ngoz ruiux yuq naungshiq rueq taungx shix;
vpiq rueq naungshiq ralx htenc kuex khvt gay shuex.