TVTSVMC 101
O Yehowa lex, ngvy shic kuex tvmtuing nuiyc tvrac vlvmz rvtueq,
kvmaq ngaz rueq mnoz muex shix ngoyx vphaungx.
Ngaz kuex mvrax kop muq laz juing phvnx shaungx.
Mnoz kuex mkaq jix lac ngaz kox nuex kaz ruiux?
 
Ngaz kuex ngvy yuimx nuex
thuinz vsawc tsuingruik ruik maq httax taungx,
honc vbac phvnx kuex ngaz rueq
mkaq muinz nanx shaungx rvmuq.
Tishox muex yix nungx shung jix htenc honc vyaungc kuex
ngaz rueq shuiuc vshaungx,
ngaz kuex tsuingshiq rulc yvmx muinz seng yaq rvmuq.
Ngaz kuex vrot vkaq yaungx taungx rvmuq,
honc vbac miqsaz htenc rulc ngaz rueq yvmx muinz
shuimx kaz shaungx rvmuq.
Naungnuk waz lvmz vbac shuip
shuiux jungc jix waz kuex tvdux gay shaungx;
ngamc ngax vtueq thuinz tvyungc
jix waz muex ngaz rueq nanx kuq shaungx rvmuq.
 
Tishox muex tvmtuing httaz jix
kuex ngaz rueq raungc raq shaungx,
tsuingshiq kuex ngvy hoc yuimx nuex tvhttax shaungx.
Tvsawc ric kenrix yaq jix htenc
rueq ngaz muex shuimc kuy vkhangx lvp wuez shuex.
 
Vrot vkaq kvjaz jungphvnc jix waz
kuex ngvy hoc yuimx nuex httax lvp tuex rvmuq;
kvlauc lawc jix waz kuex ngvy khaungkac nuex httax lvp tuex rvmuq.
Naungshiq ghaq vraungx nuex
httax vtueq layx bac jix htenc kuex nuiyqshiz maq nuiyqshiz
ngaz rueq tvbac gay shaungx;
honc bac jix htenc lotlaz kuex
Yehowa ghaqyungx wawc yurc gay shaungx.