21
Kanaan Miqsaz Taungx gay tueq
1 Israel miqsaz Atharim lvmx maq kaz yaq kuex Kanaan mungx ghaqyaz kox wawc Kanaan miqsaz Arad hokhvmx waz rueq tay vtueq, tsuingshiq khvt kaz ruiux wvyvmc kuex lvp wvnc tueq.Ref 21:1 Wkh 33:40
2 Kvruex yimaq Israel miqsaz htenc rueq Yehowa muex, “Mnoz rueq nuiyshiq muex kvruex miq htenc kuex khvt tvtaungx gay ruiux yuq, tsuingshiq nuiyc tsuingshiq ghaqyungx htenc kuex mnoz Yehowa muex lekuq vtueq tvsawc ric tvbac gay shix,” ngoz tueq bomkhvrc tvhungx wuez tueq.
3 Yehowa rueq muinz tsuingshiq rueq thoz tueq rulc rv-ngvlc Kanaan miqsaz kuex khvt tvtaungx gay tueq. Kvkhoc rvtueq Israel miqsaz rueq tsuingshiq ghaqyungx htenc kuex tvsawc ric tvbac gay ruiux, kvruex hong kuex Horma ngoz tueq muingc tueq.
Nvyrvyx maq Vtvhungx Puiuc Yac Yuimx
4 Israel miqsaz kuex Hor Kanx maq kaz wvnc vtueq Edom mungx kuex koayc lvy tvkoc Yuix Shawx Jumx nuex kay juing lvmx kvruex phvnc kaz wvnc tueq. Yuq muinz tsuingshiq kuex lvmx yvmc maq dvyx hungc vlaungc nulx wvnc wuez vtueq,Ref 21:4 Tvrac 2:1
5 Tishox nuiyc Moshe muex mvrax tvgurc tueq. Tsuingshiq rueq, “Phuiuz vsvy nuiyc yuix muinz vguez kumtsvy tvnx vyuq tvthueyc gay muex nuiyshiq kuex yvmx ngoz tueq lac Ejip mungx wawc tvdung shvlx laq ruinx? Vsumc vkvmc muinz vguez phuiuz vsvy vruex nuiyshiq rueq vshuiuc shex rvlaq shix!” ngoz tueq kvbot nyvnx wuez tueq.Ref 21:5-6 1Kor 10:9
6 Kvruex yimaq Yehowa rueq vyangx httaz hvlc phvnx puiuc htenc kuex Israel miqsaz kox nuex tvkaz vtueq miq paunghvlc puiuc rueq kauk koq tueq thueyc wvnc wuez tueq.
7 Kvkhoc rvtueq miq htenc kuex Moshe kox nuex kaz vtueq, “Nuiyshiq rueq mnoz muex nuiyc Yehowa muex khawx lvlx ngoz ngax vtueq yaq gay tiq. Majuiuc muinz puiuc htenc vruex yurc gay tvkoc Yehowa kox wawc vjux thoz kuq koq,” ngoz tueq kvmenc jenc thoz tueq. Kvkhoc rvtueq Moshe rueq miq htenc kvruex tvkoc vjux thoz kuq tueq.
8 Kvruex yimaq Yehowa rueq Moshe muex nvr tueq kuex tvyuimx vruex maq puiuc yac yuimx kuex tvhungx vtueq htung nuex tsomz shuiuz, puiuc rueq kuiuz rvhumc jix miq rueq puiuc yac yuimx kuex lawc ruiux yuq, hvlx kaz tuex lvmz kuex jungx kuq shuiuz.
9 Kvkhoc rvtueq Moshe rueq nvyrvyx maq puiuc yac yuimx tvhungx vtueq htungkhux nuex tsomz taq tueq, puiuc rueq kuiuz rvhumc jix miq rueq puiuc yac yuimx kuex lawc ruiux yuq hvlx kaz yaq.Ref 21:9 2Hokh 18:4; Yoh 3:14
Hor Kanx maq Moba Miqsaz Httax yaq Warc Tvnx nuex Kaz tueq
10 Israel miqsaz kuex kaz wvnc yek vtueq Obot ngoz yaq kvyuq jerak tec wuez tueq.
11 Ekvmaq tsuingshiq kaz wvnc yek vtueq Moba mungx maq shaldungc kox nuex httax yaq yaruix tvnx wawc vbac kay wuez shex Abarim ghaq nuex jerak tec wuez tueq.
12 Kvruex yimaq tsuingshiq rueq Zered Warc tvnx nuex jerak tec wuez tueq.
13 Ekvmaq tsuingshiq kaz wvnc yek vtueq Aranon ruilx maq ghaqkhux kox Amori mungx rulc rvjuy shauk httax yaq yaruix tvnx kvyuq jerak tec wuez tueq. (Aranon ruilx kuex Moba mungx nuiyc Amori mungx ghaqruiy nuex rvtueq.)
14 Kvkhoc rvtueq Yehowa rueq Vkhvt wvnc lvmx Luik dvp nuex, “Supha hong nuex httax yaq Waheb ghaq nuiyc Warc tvnx htenc; Aranon ruilx,
15 nuiyc Ar ghaq kox, Moba ghaqruiy nuex httuiuc laz rvyuiuc wvnc tueq warc tvnx htenc,” ngoz tueq httax yaq.
16 Israel miqsaz kuex kvruex hong kvmaq yuix Tumz ngoz yaq Bera nuex httuiuc kaz tueq, kvruex baung maq Yehowa rueq Moshe muex ngoc, “Miq htenc kuex tvtuimx shuiuz, ngaz rueq tsuingshiq muex yuix kuq shaungx,” ngoz tueq jungx tueq.
17 Kvkaq Israel miqsaz rueq tvkuiux kemz shix tueq shic kuex:
“Yuix jumx htenc lex, yuix dung wuez kuinz;
Nuiyshiq rueq shic vngoyc maq malc wvnc phix.
18 Yuix tumz kvruex hokhvmx sahez nuiyc
mungx miqsaz walaungx bix rueq htuz tueq,
Hokhvmx jowvyx nuiyc ngvlhtulc htenc maq
Htoay mvy yaq.”
Tsuingshiq kuex kvruex yaruix tvnx kvmaq Mattana nuex,
19 kvmaq hulawx Nahaliel nuex, Nahaliel maq Bamot nuex,
20 Bamot maq kumtsvy tvnx rulc khaungx ralc httax yaq Pisga Kanx yaz wawc Moba Warc tvnx nuex kaz wvnc tueq.
Hokhvmx Sihon nuiyc Hokhvmx Oga kuex Taungx gay tueq
(Tvrac 2:26-3:11)
21 Israel miqsaz rueq Amori hokhvmx waz Sihon kox nuex thaungc jungc jix tvkaz vtueq:
22 “Nuiyshiq kuex mmungtan kvmaq tvlvy koq. Nuiyshiq nuiyc nyvmx saz htenc kuex lvmx laungx tv-phvnc dvyx kaz tiq, nuimshiq wuik vnax nuiyc svpiq sunc htenc kvmaq lvy miq, nuimshiq yuix tumz wawc yuix muinz nuingx miq; nuiyshiq kuex m-ghaq hong maq lvy wvnc tix nuex httuiuc laz lvmx laungx phvnc dvyx kaz tix,” ngoz tueq thoz tueq.
23 Yuq muinz hokhvmx waz Sihon rueq Israel miqsaz kuex piq mungtan maq lvy wvnc tvkoc vkhangx kuq muq. Piq rueq yaruix tvnx nuex httax yaq Jahaza ghaq kvyuq nolaungx bix rulc kaz vtueq Israel miqsaz kuex khvt kaz tueq.
24 Yuq muinz Israel miqsaz rueq ralx paunghvlc kuex khvt taungx gay vtueq, Aranon ruilx maq ghaqkhux kox Ammon mungx ghaqruiy wawc Jabbok ruilx nuex httuiuc laz dvyx lvp lot tueq, yvmx khoc lac ngoz ruiux lec Ammon ghaqruiy maq phaungx duing tuing lvy ningkhvnc nuex rvtueq.
25 Ekvkhoc raz tueq Israel miqsaz kuex Heshbon ghaq nuiyc tvroz wawc ghaq htenc vlomx Amori ghaqyungx htenc lotlaz lvp wvnc vtueq kvruex ghaq htenc kvyuq httax ngaungc wuez tueq.
26 Heshbon ghaqyungx kuex Amori hokhvmx Sihon hoc httax juing ghaq rvtueq, hokhvmx Sihon rueq guimz yaq kuex Aranon ruilx nuex httuiuc laz yungx yaq, mvnnuex Moba hokhvmx waz rueq vguimz ghaq rvtueq, kvruex ghaqphux kuex hokhvmx waz Sihon rueq khvt taungx vtueq vlvp wvnc rvtueq.
27 Kvkhoc rvtueq shic tut shic jix hez rueq:
“Heshbon nuex kaz luit,
Hokhvmx Sihon ghaqyungx nuex kaz wuez luit!
Naungshiq rueq kvruex ghaq kuex
vnyalx lauk shiz vtec yek kuex khic roc.
28 Lauk shiz Heshbon ghaqyungx maq
Sihon ralx daungx kuex wvrluic ikhoc kvtenc vtueq;
Moba mungx Ar ghaq kuex tvbac gay ruiux
Aranon ruilx maq htauk kox kanx htenc tvkhamc gay tueq.Ref 21:28-29 Yer 48:45-46
29 Moba miqsaz lex, Htemc rvmc kuilc daz rvhumc vtuinx nyix!
Khemosh nawk palx jix nuimshiq kuex bac wvnc vtuiux shex!
Nuimshiq tishox rueq nuimshiq phvnx htenc kuex
ralx penc kuilc daz jix muex tvyaungx vtueq,
Yalxjuik rulx htenc kuex Amori hokhvmx waz rueq
wuinz saz muex tvyaungc tueq.
30 Yuq muinz majuiuc tsuingshiq phvnx vmaq htenc kuex tvbac gay rvhumc tueq,
Heshbon maq Dibon nuex muinz,
Nashim maq Medeba hep wawc Nopha nuex httuiuc laz tvbac gay tueq,”
ngoz tueq shix tueq.
31 Kvkhoc rvtueq Israel miqsaz kuex Amori mungx nuex ghaqshungc shex httax wuez tueq.
32 Moshe rueq Jazer ghaqyungx kuex khvt kay muex miq tvkaz vtueq thaungc tvsawk kaz tueq. Israel miqsaz rueq ghaqyungx kvruex nuiyc tvroz wawc ghaq htenc kuex khvt taungx wvnc koq tueq Amori miqsaz kuex kvhtenc kvwawc yuz wvnc wuez tueq.
33 Kvruex yimaq Israel miqsaz kuex Bashan mungx nuex tvtsuingc vtueq kaz wvnc tueq, kvkaq Bashan Hokhvmx waz Oga kuex ralx daungx kvtenc vtueq Israel miqsaz rulc Edrei maq rvkhvt tueq.
34 Yehowa rueq Moshe muex ngoc, “Piq muex nauk hiz kaz. Piq maq raz tueq mungx miqsaz htenc kvmuinz, piq mungtan kvmuinz m-yauk nuex ngaz rueq lekuq phaungx. Mnoz rueq Heshbon nuex httax tueq Amori hokhvmx waz Sihon khvt toq kvkhoc piq kvmuinz khvt shuiuz,” ngoz tueq jungx tueq.
35 Kvkhoc rvtueq Israel miqsaz rueq Oga nuiyc vsaz hez htenc rulc vdvmz mungx miqsaz htenc kuex vshiz muinz tvjungx muq thvy gay yix maq, mungtan kuex lvp wvnc tueq.