NAHUM
LUIK DVP
(NAHUM)
Nahum luik dvp vruex kuex Israel miqsaz htenc muex tuinghtuing wvnc tueq mvnnuex pat wawc ralx rvtueq Asiria miqsaz ghaqnyuiuz jungx Ninewe ghaq bac wvnc tueq laung nuex vtvhungx moalx nuex seng vtueq shic tut luik rvtueq. Christu max dung jauz 700 BC htumx wvnc kox nuex rvtueq, kvkhoc sumrumx wvnc tueq kuex guirguenz vtueq taungx wvnc tueq mungtan htauk nuex Tishox rueq khac phox kuq tueq lvmz kvkhic yaq rvtueq.
1
1 Vruex kuex Ninewe nuex seng yaq bomjungc rvtueq, Elkosh ghaq jix Nahum rueq khiz tueq romzyac tvkhic lvmz rvtueq.Ref 1:1-3:19 Esa 10:5-34; 14:24-27 Zeph 2:13-15
Yehowa Thuinkhaq vtueq Ninewe kuex Khawx tueq
2 Yehowa Tishox rueq rvlongx palx yauk shuimc kuex nanx yaq rvmuq;
vpiq kuex vpiq tvgap gawx jix htenc muex murx tvgurc yaq.
Thuinz tvkhaq vtueq tsuingshiq muex murx tvyez kuq yaq.
3 Yehowa kuex yoalx rek rek maq thuinkhaq muq,
yuq muinz vpiq kuex luimc vkawc yunghvlc nuiyc mvrax
vhttax jix muex murx tvgurc muq maq mkaq muinz taq muq.
Yehowa khuemx yaq baung nuex
raunghtiq raungguil httuiuc yaq;
phuemx htenc kuex vyaz khung wawc kvtenc yaq bokkhuyx rvtueq!
4 Vpiq rueq svmuktvrax muex nvr koq tueq vruic rvkaz tueq!
Vpiq rueq yuix yungx ruilx htenc kuex tvruic gay tueq.
Bashan namx ruix htenc yuiuq wvnc vtueq,
Kamel Kanx nuex shawx huiux shawx wvnc tueq,
Lebanon pulx puic htenc yuiuq wvnc tsic tueq.
5 Yehowa khaungkac nuex kanx htenc kuex kvbuilc wuez tueq;
ghaq luimx htenc muinz vyuimx rvwvnc tueq.
Yehowa svt kaz ruiux yuq gaqyung mux vtueq;
mungkawx nuiyc miqsaz lotlaz kuex hiyaz kvkhuirc wuez yaq.
6 Vpiq thuinkhaq ruiux yuq, ukhaq lac tvraungx lot tvnx?
Vkawc yawc juing vpiq thuin-khvy dung yaq kvyuq, ukhaq lac tvraungx lot tvnx?
Vpiq rueq luic thuiyc yaq thuin-khvy kuex ruiuc gay koq tueq;
Vpiq khaungkac nuex lung htenc kuex bokkhuyx ikhoc bunx wvnc tueq.
7 Yehowa kuex hvlc hvlc;
vpiq miqsaz htenc kuilc daz rvhumc yaq nuex vpiq rueq tvguing tvwungx kuq yaq;
vpiq kox nuex yek waungc jix htenc kuex vpiq rueq tvwungx kuq yaq.
8 Vpiq rueq vpiq ralxRef 1:8 Vpiq ralx htenc; Hebre nuex kuex kvruex baung htenc. htenc kuex
yuix tuingx khvmx phuk rueq ikhoc tvsawc ric tvbac gay tueq;
Vpiq muex khawc lvlc jix htenc kuex vthueyc mungx nuex tvkaz gay yaq.
9 Mnoz rueq Yehowa kuex khawc lvlc muex yvmx lac kvmungx vshuiux?
Vpiq rueq mnoz kuex tvbac gay kv-phux.
Uraq muinz vpiq kuex lauk shiz htauk nuex jvnc vtueq khawx lvlx lot muq.
10 Joal pawc jix htenc kuex shuiuq rumz ruix shanx nuiyc
tsvmkuiz ikhoc khamc gay rvhumc tuex!
11 Ninewe lex, mnoz kox wawc Yehowa kuex khawc lvlc muex kvmungx jix layx vbac miq washiz mnoz kox wawc yaungx wvnc yaq.
12 Vruex kuex Yehowa rueq vpiq miqsaz Israel muex vjungx rvtueq: “Asiria miqsaz kuex hungc vlaungc httaz hvlc httax vtueq paung ruiux muinz, tsuingshiq kuex tvmvy tvbac gay rvhumc vtueq momaq wvnc tuex. Ngvy miqsaz htenc lex, ngaz rueq nuimshiq muex kuilc daz tvrvhumc phaungx, yuq muinz ngaz rueq kvruex laukshiz ruez yek shaungx rvmuq.
13 Majuiuc nuimshiq guimz yaq Asiria luimc vkawc kuex tvsuimz gay ruiux, nuimshiq khvrc buinc yaq yanx ruiuz htenc kuex jumz gay shaungx,” ngoz tueq jungx tueq.
14 Vruex kuex Asiria miqsaz htenc nuex seng vtueq Yehowa rueq vhtvp htaz rvtueq: “Tsuingshiq nuex tsuingshiq muingc tenc jix suiuz vsaz htenc doc muinz httax tuex rvmuq. Ngaz rueq tsuingshiq tishox htenc shomc yuimx nuex httax yaq yac yuimx htenc kuex tvbac gay shaungx. Ngaz rueq Asiria miqsaz htenc tvkoc luip ruiuz khux tvhungx vshaungx; tsuingshiq kuex thuiuzthuic tvraungx aungx muq!”
15 Lawc shuinz, thuix thaungx lvmc lvy jix kamx waz rueq kuz vkanx htenc kuex yanz vtueq kaz yaq! Piq kuex taungx wvnc tueq lvmz tvtay jungc kuy tvkoc kaz yaq! Yuda miqsaz htenc lex, nuimshiq kuiuq vmoalx htenc kuex tvhungx wuez shuinz, Tishox muex kvtuemc bomkhvmc kuq noalx wuez shuinz. Miq layx bac jix htenc rueq nuimshiq mungtan kuex mkaq muinz nyuip khvt lot shuex rvmuq. Tsuingshiq kuex tvmaq jup tvbac gay rvhumc tueq.Ref 1:15 Esa 52:7