13
Pungnuk Miqsaz htenc rulc Tvrv-phvlc tueq
1 Mungx miqsaz htenc muex Moshe Tvrac kuex hung vtueq wvl kuq koq tueq, Ammon nuiyc Moba miqsaz ukhaq muinz Tishox miqsaz htenc rulc mkaq muinz rvhumc rv-phek lvp muq mvy muq ngoz tueq.Ref 13:1-2 Tvrac 23:3-5
2 Vruex kuex yvmx khoc lac ngoz ruiux lec Israel miqsaz Ejip mungx maq kaz wvnc tueq nuex Ammon nuiyc Moba mungx miqsaz rueq phuiuz vsvy nuiyc yuix kuq muq ningkhvnc nuex rvtueq. Kvmaq raz tueq, tsuingshiq rueq Balam muex kuimphox kuq vtueq Israel miqsaz kuex tvhttonx tvmx tueq, yuq muinz naungshiq Tishox rueq kvruex mvnhttonc kvjaz kuex ruimruimc kuy kvjaz muex tvyaungc gay tueq.Ref 13:2 Wkh 22:1-6
3 Vruex tvrac luik wvl yaq kuex tay vtueq Israel miqsaz rueq tsuingshiq phungc vphawc wawc pungnuk miqsaz htenc kuex tvdux yurc gay wuez tueq.
4 Shomc yuimx taungx vwawx tvy juing khok htenc kuex lawc mawc tvy jix shomc waz Eliashib kuex Tobia rulc muingc rvtuiuz vluz shex rvtueq.
5 Vruiy vwungx maq vshomc kuq htenc, vhomc vtumc phvnx htenc, Shomc Yuimx nuex shuimc lvmc juing maq phaungc vtueq, shomc waz bix tvkoc vshomc kuq nuiyc Lewi miqsaz htenc, shomc yuimx nuex tuimc tvlc jix htenc, shomc yuimx bvmc jix htenc tvkoc mvnz rokshiz wawc mvnshiz vhtawc tuiz vtsvmz, svpiq tix nuiyc olip puiz htenc kuex tvy juing khok yungx vshiz tvshuimc naungx tueq.
6 Kvkhoc yaungx tueq kuex Yerusalem nuex ngaz vguez baunglaung rvtueq, Babelon hokhvmx ArtazezeRef 13:6 Artazeze: Persia honoc Artazeze ngoc “Babelon Hokhvmx” ngoz tueq. piq duiz tueq wawc 32 mvrc tueq nuex ngaz kuex hokhvmx waz kox nuex kvjaz tvtay kay vkaz baunglaung rvtueq. Mtanc httax mauk nuex ngaz kuex hokhvmx kox wawc bomc tvdvy kuy lvp vtueq,
7 Yerusalem nuex yek waung tauk. Kvkaq Shomc Yuimx khok vshiz kuex Tobia muex Eliashib rueq kuq tueq lvmz tay vtueq ngaz kuex vhuingc rvtauk.
8 Ngvy thuinkhaq hvlc ningkhvnc nuex Tobia taungx vwawx htenc lotlaz lvmz gay tauk.
9 Khok htenc kuex nawk palx htungx maq tvsawc nawc ruiux, shomc yuimx nuex shuimc lvmc juing htenc, vruiy vwungx vshomc kuq htenc nuiyc vhomc vtumc phvnx htenc kuex htawc tvy yek tvkoc nvr tauk.
10 Lewi miqsaz htenc nuiyc shomc yuimx nuex tuimc tvlc jix htenc kuex phuiuz vsvy hunghtaungx laz lvp muq ningkhvnc nuex miqmac wuik vnax htenc nuex yuz kaz wuez vtuex lvmz ngaz rueq tuiuz lvp tauk.Ref 13:10 Tvrac 12:19
11 Shomc Yuimx kuex tuip gay shec tueq ningkhvnc nuex ngaz rueq vlawc jix vyungx vlaungx bix kuex httonx tauk. Ngaz rueq Lewi miqsaz nuiyc vtuimc vtvlc jix hez kuex Shomc Yuimx nuex tvyez gvl yek vtueq, yauk tvshuimc yek tauk.
12 Kvkaq Israel miqsaz lotlaz rueq miqmac rueq htawc juing mvnz rokshiz wawc mvnshiz rvtueq, tuiz vtsvmz, svpiq tix nuiyc olip puiz kuex shomc yuimx taungx vwawx tvy juing khok htenc nuex lvmz laq wuez tueq.Ref 13:12 Mal 3:10
13 Ngaz rueq shomc waz Shelemia; Tvrac tuiuz thenc jix Zadok nuiyc Lewi miqsaz Pedaia hez kuex taungx vwawx lawc mawc jix muex tvyaungc ruiux, Mattania suiuz, Zakur saz Hanan kuex tsuinghez yauk htuiz jix muex tvyaungc tauk. Vruex hez kuex vganc yauk shuimc jix hez muex tvmtuing maq lvmx svy kuex kuq noalx shuex ngoz tueq tvluimc vshaungx.
14 Ngvy Tishox lex, mshomc yuimx nuiyc nawk palx tvkoc ngaz rueq shuimx wvnc tauk htenc lotlaz kuex rvwvl lvp shuiuz.
15 Kvruex baunglaung Yuda mungx miqsaz wvyvmc rueq Vguilc Raungnuiyq svpiq thuey sur wuez yaq. Vganc jix rueq tuiuz vtsvmz, svpiq tix, svpiq thuey, phuiuq muiuq thuey nuiyc vganc phvnx htenc kuex loze htauk nuex tvdaungc vtueq, tsuingshiq rueq Yerusalem nuex wvnc wuez yaq kuex ngaz rueq khiz tauk; kvkhoc ningkhvnc nuex Vguilc Raungnuiyq yvmx muinz shaungtaung muq tvkoc ngaz rueq honc ngoz tauk.Ref 13:15 Dw 20:8-10; Tvrac 5:12-14; Yer 17:21-22
16 Yerusalem nuex httaz jix Tire ghaq jix wvyvmc rueq ngac nuiyc vhvlx phvnx taungx vwawx lotlaz kuex nuiyshiq miq muex Vguilc Raungnuiyq shaungc kuy tvkoc lvmz wvnc wuez tueq.
17 Ngaz rueq Yuda walaungx bix muex httonx tauk kuex, “Nuimshiq rueq shuimc vshuinx vyaq mvrax kuex lawc shuinz! Nuimshiq rueq Vguilc Raungnuiyq kuex tvshuy shac vshuinx.
18 Nuimshiq jix vwaz tamx rueq kvkhoc vbac vtac shuimc ningkhvnc nuex Tishox rueq vruex ghaqyungx kuex tvbac gay ruiux, nuimshiq muex murx tvgurc kv-phuinx. Kvkhoc rvyruiux nuimshiq rueq Vguilc Raungnuiyq kuex tvshuy shac vtueq Israel miqsaz htauk nuex Tishox thuinkhaq hvlc tv-httuiuc vshuinx,” ngoz tueq httonx ngoz tueq.
19 Kvkhoc rvtueq ngaz rueq Vguilc Raungnuiyq ruip rawx kvkhoc raungnuiyq httuiuc vtueq raungx buirxRef 13:19 raungx buirx: Yuda miqsaz rueq kuex shalx nyuip wvnc maq vnuiyq wvl wvnc phaungc yaq. wvnc ruiux yuq Vguilc Raungnuiyq htumx nuex httuiuc laz, palx kaluix htenc kuex shuiuz tvkoc nvr tauk. Vguilc Raungnuiyq taungshaungc jix ukhaq muinz ghaqyungx nuex nyuip muq tvkoc ngaz rueq miq wvyvmc muex palx kaluix htenc kuex tvbvmc tauk.
20 Taungx vwawx phvnx ruip saz shaungc jix bix palx ruk yix kox nuex raungx bv-ngac raungyac laukshiz, lauknueyc shaung kaz ruiux yaq.
21 Ngaz rueq tsuingshiq muex ngoc, “Nuimshiq rueq raungx tvwuic laz bvmc kaz vtuinx kuex khuec guez dvyx. Nuimshiq rueq yix maq laukshiz vkhoc shuimx wuez yek ruiux kuex nuimshiq kuex laungc maq yurc gay shaungx,” ngoz tueq honc tvsvmz jungx tauk. Kvruex maq phaungc vtueq Vguilc Raungnuiyq kaz muq shex.
22 Vguilc Raungnuiyq vsawc yaungc tvkoc Lewi miqsaz muex miqmac gvnz kuex kvsawc nawc vtueq palx kaluix htenc kuex bvmc kay tvkoc ngaz rueq nvr tauk.
O Tishox lex, vruex ningkhvnc nuex ngaz muex rvwvl koq, mlungwawc yunghvlc htauk maq ngaz muex menjenc kuq koq.
23 Kvruex baunglaung Yuda miqsaz paunghvlc Ashdod, Ammon nuiyc Moba shvlx rulc htenc lvmz wuez tueq lvmz ngaz rueq khiz tauk.Ref 13:23-25 Dw 34:11-16; Tvrac 7:1-5
24 Tsuingshiq sahez wvyvmc rueq nuiyshiq kvjaz kuex kvjak thenc muq, Ashdod kvjaz kvjak yaq, wvyvmc kuex vganc phvnx kvjaz kvjak wuez yaq.
25 Kvkhoc ningkhvnc nuex ngaz rueq kvruex waz hez kuex ngoz ngax httonx tauk, thvt tauk, tsuingshiq khux mul muinz phiz gay tauk. Kvruex yimaq ngaz rueq tsuingshiq nuiyc tsuingshiq sahez muex mkaq muinz pungnuk shvlx rulc kuex lvmz miq shex, ngoz tueq Tishox muingc jungx vtueq tvtuemc tvkhvmc wuez tauk.
26 Ngaz rueq tsuingshiq muex, “Hokhvmx Solomon mvrax yaq tueq kuex pungnuk shvlx rulx rueq rvtueq. Piq kuex vganc phvnx hokhvmx htenc htauk nuex muinz hungc vlaungc httaz hvlc rvtueq. Tishox rueq piq muex lungwawc ningkhvnc nuex Israel mungtan lotlaz nuex hokhvmx tvyaungc tueq, yuq muinz mvrax vraq piq kuex tvrul gay tueq.Ref 13:26 2Sam 12:24-25; 1Hokh 11:1-8
27 Nuiyshiq rueq nuimshiq htungx vlayx kuex phvnx vtueq nuiyshiq Tishox kvjaz kuex tay phvnx miq maq pungnuk shvlx rulx kuex lvmc mvy yaq haz?” ngoz tueq jungx tueq.
28 Joiada kuex Shomc Wayungx Eliashib saz rvtueq, yuq muinz Joiada saz washiz rueq Bet Horon ghaq jix Sanbalat saz kuex lvmc ningkhvnc nuex ngaz rueq Joiada kuex Yerusalem ghaq wawc yurc gay tauk.Ref 13:28 Neh 4:1
29 Tishox lex, kvruex hez rueq shomc waz kvyaungc muinz, shomc waz bix nuiyc Lewi miqsaz rulc mnoz rueq taq toq bomkhvrc muinz yvmx khoc lac yomnamc gay tvnx rvwvl tvmaung shuiuz.
30 Ngaz rueq pungmungx hup vsvmx phvnx ruip saz shuimx yaq miqsaz htenc kuex tvsawc nawc gay vshaungx; shomc waz bix nuiyc Lewi miqsaz htenc tvkoc phvnc juing tvrac htenc tvhungx vshaungx ningkhvnc nuex miq pumz tek vtueq miqmac rueq gurc pic juing kuex tuiuz wuez yaq.
31 Ngaz muex hungx tuex baunglaung wvr maq jauk shomc kuy tvkoc janx nuiyc vphaungc thuey yaq vthuey vngoz nuiyc vphaungc muinx yaq tuiuz vtsvmz htenc lvmc lvy tvkoc tvhungx htaungx tauk.
O Tishox lex, vruex lotlaz kuex rvwvl vtueq, ngaz muex kejux kuq koq.