4
(Mak 1:12-13; Luk 4:1-13)
1 Kvruex yimaq Htaungc rueq laulawc mrvhumc kueq ngoz tueq, Vsawc Siyac rueq Yesu kuex kumtsvy tvnx nuex shvlx wvnc tueq.Ref 4:1 Heb 2:18; 4:15
2 Majuiuc raungrok bvlic tup raungnuiyq raungwvrx phuiuz svy mamc tueq yix maq Yesu kuex rvmc svy rvhumc tueq.
3 Kvkaq Htaungc kuex vpiq kox nuex httuiuc kaz vtueq, “Mnoz Tishox Saz doc ngoz ruiux kuex lung htenc vruex wanx muex m-yaungx kueq, ngoz shuiuz,” ngoz tueq.
4 Yuq muinz Yesu rueq, “Miq kuex wanx rueq dvyx tvraungx yaq rvmuq, Tishox nuix maq vdung bomc poz ruip rawx rueq juex tvraungx yaq, ngoz tueq Rumvrc luik nuex jungx shec tueq,” ngoz tueq tvralc tueq.Ref 4:4 Tvrac 8:3
5 Kvkaq Htaungc rueq Yesu kuex Vsawc Yerusalem Ghaqyungx nuex shvlx wvnc vtueq Shomc Yuimx vjoz pinhtumc baung nuex tvjvp ruiux,Ref 4:5 Neh 1:1,18; Esa 48:2; Yoy 11:2
6 “Mnoz Tishox Saz doc ngoz ruiux kuex mshauk pumz kuex nuex ghaq kvyuq dvy kuiuz, yvmx khoc lac ngoz ruiux lec:
‘Tishox rueq mnoz tvkoc vpiq raungkamx waz hez muex vpiq rueq nvr vtueq,
tsuinghez rueq m-yaz lung nuex htuiuz muq laz juing,
tsuinghez yauk htenc maq mnoz kuex tenz shuex ngoz tueq
wuiyq shec tueq,’” vpiq muex jungx tueq.Ref 4:6 Tvts 91:11-12
7 Yesu rueq tvralc tueq, “Yuq muinz Taungjix m-Tishox kuex mnoz rueq laulawc lot shuiux rvmuq, ngoz tueq Rumvrc luik nuex wuiyq shec tueq,” ngoz tueq.Ref 4:7 Tvrac 6:16
8 Kvruex yimaq Htaungc rueq Yesu kuex johvlc kanx nuex shvlx wvnc vtueq, mungkawx wawc mungtan htenc nuiyc kvruex wawc muingc jungc tsak vnyvmx htenc kuex vpiq muex tvkhic vtueq,
9 “Mnoz rueq bumx vtueq ngaz nawk ruiux yuq, vruex lotlaz kuex ngaz rueq mnoz muex kuq phaungx,” ngoz tueq jungx tueq.
10 Kvkaq Yesu rueq, “Satan lex, kaz wvnc kuiuz! Rumvrc luik nuex, ‘Taungjix m-Tishox muex dvyx nawk palx lvp shuiux nuiyc vpiq muex shomc kuy rax!’ ngoz tueq juex wuiyq shec tvnx,” ngoz tueq tvralc tueq.Ref 4:10 Tvrac 6:13; 10:20; Yoh 24:14
11 Kvkaq lvmx lvy dvyx Htaungc kuex vpiq kox wawc dung kaz wvnc tueq; Raungkamx bix httuiuc kaz vtueq Yesu muex joalc moalc kuq tueq.
Galile Mungx nuex Yesu rueq Yauk Shuimc Phaungc Wvnc tueq
(Mak 1:14-15; Luk 4:14-15)
12 Yohan kuex lvp shauk gay tueq thaungc Yesu rueq tay vtueq Galile mungx nuex kaz wvnc tueq.Ref 4:12 Mat 14:3; Mak 6:17; Luk 3:19-20
13 Vpiq kuex Nazaret nuex httax muq maq, Zebulun nuiyc Naphtali mungx Galile jumx kawx hep wawc Kapernaum ghaq nuex httax kaz tueq.Ref 4:13 Yoh 2:12
14 Vruex kuex shvmmax Esaia rueq vjungx shec kvjaz hungx wvnc tvkoc rvtueq:
15 “Zebulun mungx nuiyc Naphtali mungx,
Yodan ruilx kvkox ral wawc, yuix jumx nuex kay juing lvmx,
lvmx wvlex wawc pungnuk phvnx httaz yaq Galile mungx!
16 Raungnyauk mungx nuex httaz jix miqsaz htenc rueq,
Raungwuic yunghvlc khiz lvp shuex.
Wulumx mungx nuiyc kvruex raungnyauk khung nuex httax wuez yaq jix htenc htauk nuex
raungwuic lez dung wvnc tuex,” ngoz tueq jungx tueq.Ref 4:15-16 Esa 9:1-2
17 Kvruex baunglaung maq phaungc vtueq Yesu rueq bomjungc jungphvnx wvnc tueq kuex: “Raungx Mungtan kuex httuiuc wvnc yaq shex, nuimshiq mvrax wawc thuinz kvlayc wuez vtueq yek waung wuez luit!” ngoz tueq.Ref 4:17 Mat 3:2
(Mak 1:16-20; Luk 5:1-11)
18 Galile jumx kawx nuex Yesu khuemx wvnc tueq kvkaq, saq phuz wanueyc Peter ngoz yaq Simon nuiyc vnox Andru kuex jak maq ngaq vkhup Yesu rueq khiz tueq. Ngaq lvmc yauk shuimc maq kvdungc gvy jix rvtueq.
19 Yesu rueq tsuingnueyc muex, “Ngvy yix nuex phvnx naungx kuit. Ngaq khup vshuinx kvkhoc miq khup jix miq muex tvyaungc phaungx,” ngoz tueq ngoz kuq tueq.
20 Kvkaq dvyx tsuingnueyc jak kuex httvr gay ruiux vpiq yix nuex phvnx wvnc naungx tueq.
21 Vpiq kvruex maq khuemx wvnc yek koq tueq vganc saq phuz wanueyc Yaku nuiyc vnox Yohan hulawx khiz tueq. Tsuingnueyc kuex vwaz Zebede rulc vdvmz limungx nuex jak vphuing kuex khiz tueq. Yesu rueq tsuingnueyc muex vpiq yix nuex phvnc tvkoc gvl tueq.
22 Kvkaq dvyx tsuingnueyc saq phuz rueq vwaz nuiyc lix kuex gay shec ruiux vpiq yix nuex phvnx wvnc naungx tueq.
Yesu rueq Tvluingc, Vjungc Vphvnc, Tvhvlc kuy lvmz
(Luk 6:17-19)
23 Yesu kuex Galile mungx tvroz tumz nuex khuemx vtueq, vjux thoz juing baung htenc kvyuq tvluing kuq ruiux, Raungx Mungtan lvmx Thuix Thaungx Vhvlx lvmx kuex jungphvnx kuq vtueq, mungx miqsaz vthuiuz vsac phvnx ruip saz nuiyc vmac vtsac phvnx ruip saz kuex tvhvlc kuq tueq.Ref 4:23 Mat 9:35; Mak 1:39
24 Kvkhoc rvtueq vpiq muingjungc thaungc kuex Siria mungx htenc lotlaz nuex nyvmc wvnc vtueq, gvnz hvlx muq jix htenc, vmac vtsac phvnx ruip saz thuiuz sac rvhumc jix htenc, htaungc kvpumz jix htenc, vngauk thuiuz jix, huk maungx yauk maungx jix htenc vpiq kox nuex shvlx laq koq tueq, vpiq rueq tsuingshiq muex tvhvlc kuq tueq.
25 Kvkhoc rvtueq Galile mungx nuiyc Dekapoli mungx, Yerusalem nuiyc Yuda mungx, Yodan ruilx kvkox ral wawc miq htenc vkung vdaungx vpiq yix nuex phvnx naungx tueq.