4
Raungphaungc Ghaqwaungc nuex Seng yaq Yehowa Nomic lvmz
(Esa 2:2-4)
1 Httuiuc wvnc yaq raungnuiyq htenc nuex
Shomc Yuimx jvp yaq kanx kuex
lotlaz htauk nuex joz hvlc rvtuex,
ghaqluimx lotlaz htauk nuex vjoz pinhtumc rvtuex.
Miq phvnx paunghvlc htenc kuex
kvruex baung kvyuq rvtuimx waung vtueq,
2 tsuingshiq miqsaz htenc rueq,
“Naungshiq kuex Yehowa ghaqluimx,Ref 4:2 Taungjix ghaqluimx: Zion Kanx (Zion bomc poz nuex lawc shuinz).
Israel Tishox Shomc Yuimx nuex duiz waung ix.
Vpiq rueq naungshiq muex tvshuimc roc yaq kuex tvluingc rvkuq phuex;
naungshiq kuex vpiq rueq vthvl taq lvmx nuex khuemx wuez tix rvtueq.
Yvmx khoc lac ngoz ruiux lec
Yehowa rueq tvluing yaq kvjaz kuex Yerusalem wawc rvtueq;
vpiq miqsaz muex vpiq rueq jungx yaq kvjaz kuex Zion
wawc rvtueq,” ngoz tueq ngoz wuez shuex.
3 Vpiq kuex miqphvnx htenc hvlwvl
nuex muinz, vnyek vluz wawc luimc vkawc yunghvlc miqphvnx
htenc hvlwvl nuex rvkhawc lvlc yaq htenc kuex htvp htaz kuq shuex.
Tsuingshiq rueq tsuingshiq yaung htenc kuex nax htvyc muex
tsuingshiq paq htenc kuex yanx hex saz muex jek gay shuex.
Miqphvnx htenc kuex ralx lungc
nuex mkaq muinz kaz yek muq shex,
ralx rvlungc tvkoc mkaq muinz tvyoalc yek muq shex.Ref 4:3 Yoel 3:10
4 Miq tek vtueq miqmac svpiq sunc
htenc nuiyc phuiuq muiuq jungx htenc hvlwvl nuex nomic maq httax wuez tuex,
uraq muinz tsuingshiq kuex tvhiz sungx shuex rvmuq.
Tvphaungc Tvsuip Yehowa rueq vruex bomkhvmc taq tueq.Ref 4:4 Zech 3:10
5 Miq phvnx ruip rawx rueq miqmac tishox muex nawk palx vtueq phvnx wuez yaq, yuq muinz naungshiq kuex Yehowa naungshiq Tishox muex pattup nawk palx vtueq phvnx shix.
Israel kuex Vthuq Vruez Laq wawc Yek tuex
6 Yehowa rueq, “Ngaz rueq murx tvgurc tauk miq htenc nuiyc vthuq vruez laq baung nuex kuilc daz rvhumc tueq jix htenc kuex tvjomx tvtuimx vkhing httuiuc wvnc yaq.
7 Tsuingshiq kuex yaz kuix kaz vtueq yuimx maq vluz nuex httuiuc kaz wuez tueq, yuq muinz ngaz rueq kvjungx yaq jix htenc kuex vnyalx tvjvp guirx yek vtueq, tsuingshiq kuex miqphvnx yunghvlc yaungx wvnc tuex. Ngaz rueq tsuingshiq kuex Zion Kanx htauk nuex kvruex vkhing maq phaungc vtueq pattup guimz lawc shaungx,” ngoz tueq jungx tueq.
8 Tishox rueq pvrrawx maq vpiq miqsaz htenc kuex khelbuenx remc jix rueq ikhoc bvmc lawc yaq Yerusalem lex, mnoz kuex kungkhux wawc ikhoc mungtan ghaqnyuiuz jungx muex lauk shiz yaungx yek tuiux.
9 Mnoz kuex yvmx ngoz tueq lac guyc sez ramc laq shuiux? Wuic khic thuiuz yaq nyuiuz ikhoc yvmx ngoz tueq lac kuilc daz rvhumc vtuiux? Mnoz nuex hokhvmx vguez, mnoz muex tharc jungc kuy jix htenc thueyc kaz vtueq haz?
10 Yerusalem miqsaz lex, wuic khic thuiuz yaq nyuiuz ikhoc nox jawc tvkoc kvruip rux phoal kuinz, yvmx khoc lac ngoz ruiux lec mnoz kuex vruex ghaqyungx maq kaz wvnc vtueq ghaqsawc htungx nuex httaz kaz tuiux rvtueq. Mnoz kuex Babelon mungx nuex httuiuc laz kaz wvnc tuiux, yuq muinz Yehowa rueq mnoz kuex kvruex baung mralx hez kox wawc palc wvnc kv-phux.
11 Miq phvnx paunghvlc rueq mnoz khvt tvkoc rvtuimx wuez yaq. Tsuingshiq rueq, “Yerusalem kuex tvbac gay rax! Vruex ghaqyungx bac kay kuex naungshiq rueq khiz wuez shix!” ngoz tueq jungx wuez yaq.
12 Yuq muinz kvruex miqphvnx htenc kvraq Yehowa thuinz vmungx nuex yvmx lac tvmaung yaq nguinx kuex tuiuz wuez muq. Tsvmtul kuex tvjomx nuiuz yaq ikhoc tsuingshiq muex murx tvgurc tvkoc tvjomx tvtuimx yaq lvmz kuex tsuingshiq rueq hangc muq.
13 Yehowa rueq, “Yerusalem miqsaz lex, mralx hez muex murx tvgurc kaz kuiuz! Yanx rungx htenc nuiyc nvyrvyx huk httuinc httax yaq manx pung ikhoc ngaz rueq mnoz kuex tvhung laungx phaungx. Mnoz rueq miqphvnx paunghvlc kuex tvbunx jek gay shuiux, tsuingshiq rueq yauk laungc yalawx maq vlvp tsak vnyvmx kuex mungkawx lotlaz Taungjix rvtauk, ngvy kox nuex kuq kaz wuez ruex,” ngoz tueq jungx tueq.