2
Vruiy Vwungx Shomc kuy htenc
1 Miq vshiz shiz rueq Yehowa muex vruiy vwungx maq shomc kuq ruiux yuq, tvwanx laz vphaungc nuex rin tvy raung. Piq rueq kvyuq olip puiz nuiyc vhomc vtumc maq shvy vtueq,
2 Arun sahez shomc waz bix kox kvyuq lvmc lvy rax. Yauk shuimc aungx yaq shomc waz rueq wungwanx yaukkhunc shiz, vpuiz nuiyc vhomc phvnx httax yaq lotlaz kuex lvmz vtueq shomrawx htauk nuex jauk ruiux shomc kuy rax, kvkhoc shomc kuy lvmz kuex Yehowa muex vruiy vwungx lotlaz maq shomc kuy muex yaungx yaq. Vkhoc phuiuz vsvy maq shomc kuq shix homc tumc kuex Yehowa rueq raungc raq yaq.
3 Kvjungx yaq vruiy vwungx httax yaq htenc kuex shomc waz bix rawc shex rvtueq; kvruex phuiuz vsvy kuex Yehowa muex shomc kuy yoalx shex ningkhvnc nuex pinhtumc vsawc rvtueq.
4 Wansawx kuex wvr nuex shuz vtueq shomc kuq ruiux yuq wisiz tvlomx mvy muq. Wungwanx nuiyc olip puiz shot vtueq vtvhungx wansawx, rvmuq ngoz ruiux olip puiz vnyvt biskut wanx maq shomc kuy mvy yaq.
5 Tuik jamc nuex vtep wansawx phux maq shomc kuq ruiux yuq, kvruex wansawx kuex olip puiz rulc vshot wansawx ruec rax, yuq muinz wisiz lomx muq ruec rax.
6 Kvruex wansawx kvmaq shomc kuq ruiux yuq, wansawx kuex tv-phuinz phux vtueq kvruex htauk kvyuq vpuiz tix maq shvy rax.
7 Tuik nuex vkoarc wansawx maq shomc kuq ruiux yuq, olip puiz rulc vshot wungwanx maq tvhungx rax.
8 Kvruex shomc kuy juing kuex Yehowa kox nuex lvmz laq vtueq, shomc waz yauk nuex kuq ruiux piq rueq shomrawx nuex lvy juing rvtueq.
9 Shomc waz rueq kvruex wanx lotlaz kuex Yehowa muex shomc kuy laung nuex raungluingx lvmz vtueq, shomrawx htauk nuex jauk ruiux shomc kuy rax. Vkhoc phuiuz vsvy maq shomc kuq shix homc tumc kuex Yehowa rueq raungc raq yaq.
10 Kvjungx yaq wansawx kuex shomc waz bix tvkoc rvtueq; kvruex wansawx kuex Yehowa muex shomc kuy yoalx shex ningkhvnc nuex, kvruex kuex sawc hvlc rvtueq.
11 Yehowa muex nuimshiq rueq shomc kuq shuinx ruiy vwungx vngoz htenc nuex wisiz tvlomx mvy muq; Yehowa muex phuiuz vsvy shomc kuy juing maq muinz wisiz, rvmuq ngoz ruiux nyaq ngurx kuex tvlomx mvy muq.
12 Nuimshiq rueq wawc tek vphaungc tvjomx yut shuinx vthuey vngoz kuex Yehowa muex htawc kuy rax, yuq muinz kvruex kuex shomrawx htauk nuex wvr maq juiuz rac muq.
13 Vruiy vwungx shomc kuq shuinx tek nuex shumz htawc rax, yvmx khoc lac ngoz ruiux lec shumz kuex nuimshiq nuiyc Tishox hvlwvl nuex bomkhvrc muex yaungx yaq. (Nuimshiq rueq shomc kuq shuinx phvnx lotlaz nuex shumz htawc rax.)
14 Nuimshiq rueq vphaungc shauk tvjomx yut shuinx vthuey vngoz shomc kuy juing kuex Yehowa kox nuex lvmz laq ruiux yuq, wungkoarc rvmuq ngoz ruiux wungwanx maq shomc kuy rax.
15 Kvruex yuq olip puiz nuiyc vhomc vtumc phvnx htawc rax.
16 Shomc waz rueq wungx nuiyc vpuiz tix tvtsuingc mvhttarc vshiz ikhoc wungwanx nuiyc vpuiz raungluingx lvmz vtueq vhomc vtumc lotlaz vroc nuex wvr maq jauk shomc muex lvmc lvy rax, kvruex kuex Yehowa muex phuiuz vsvy maq shomc kuy rvtueq.