18
Tvwanc Tvy vruex shec Rvjuik Rvlaungx lvmx
1 Yehowa rueq Moshe muex
2 vkhoc Israel miqsaz htenc muex jungc tvkoc nvr tueq, “Ngaz kuex Yehowa nuimshiq Tishox rvtauk.
3 Nuimshiq laukshiz httax wvnc tuit Ejip miqsaz htenc nuiyc majuiuc ngaz rueq nuimshiq shvlx wvnc vtueq tvhttax phaungx Kanaan mungx wawc miqsaz htenc honc vyaungc kuex phvnc mvy muq.
4 Ngvy tvrac htenc phvnx vtueq ngaz rueq nvr vphaungx kuex shuimx kaz shuinz. Ngaz kuex Yehowa nuimshiq Tishox rvtauk.
5 Ngaz rueq kuq phaungx tvrac htenc nuiyc honc vyaungc htenc kuex phvnx shuinz; kvkhoc phvnx ruiux yuq nuimshiq thuiuzthuic tvraungx lvp shuinz. Ngaz kuex Yehowa rvtauk,” ngoz tueq jungx tueq.Ref 18:5 Neh 9:29; Ezk 18:9; 20:11-13; Luk 10:28; Rom 10:5; Gal 3:12
6 Yehowa rueq vruex vphvnc juing lvmz htenc kuex kuq tueq. Nuimshiq rueq miqmac taungnyuing sanox shauk rulc nauk rvhtok pawx kaz.
7 Mnyuiuz rulc rvhtok pawx vtueq, m-waz muingc jungc nauk tvbac kaz. Piq kuex mnyuiuz shauk; mnyuiuz muingc jungc tvbac mvy muq.
8 Miqmac waz taungnyuiuz rulc rvshonx ronx vtueq m-waz muingc jungc nauk tvbac kaz.Ref 18:8 Lew 20:11; Tvrac 22:30; 27:20
9 Mshvlx nyuiuz shauk rulc, rvmuq ngoz ruiux m-waz piq saz yalxjuik saz rulc, rvmuq ngoz ruiux mnyuiuz piq saz yalxjuik saz rulc muinz, mnoz rulc yuimx shiz nuex vpeluz wvnc mshvlx nyuiuz rulc nauk rvshonx ronx kaz.Ref 18:9 Lew 20:17; Tvrac 27:22
10 Msuiuz yalxjuik saz rulc muinz nauk rvshonx ronx kaz; kvruex kuex mmuingc bac juing dvyx rvtuex.
11 M-waz piq taungx nyuiuz msuiy hez muex vsaz yalxjuik rulc nauk rvshonx ronx kaz; piq muinz mshvlx nyuiuz rvtueq.
12-13 M-waz shvlx nyuiuz, rvmuq ngoz ruiux mnyuiuz muex vnyaz vnox msuiy, mnguiy hez rulc nauk rvshonx ronx kaz.Ref 18:12-14 Lew 20:19-20
14 M-waungx taungnyuiuz rulc nauk rvshonx ronx kaz; piq kuex msuiy rvtueq.
15 Mnvmx nyuiuz rulc nauk rvshonx ronx kaz,Ref 18:15 Lew 20:12
16 rvmuq ngoz ruiux mphuz mnox taungnyuiuz rulc muinz nauk rvshonx ronx kaz.Ref 18:16 Lew 20:21
17 Mnoz rvshonx ronx vtuiux nyuiuz kvmac vsaz, rvmuq ngoz ruiux vsuiuz rulc muinz mnoz nauk rvshonx ronx kaz; kvruex kuex mtaungx phvnx muex yaq gay rvtueq.Ref 18:17 Lew 20:14; Tvrac 27:23
18 Mtaungx nyuiuz vhttax wawwawx, piq nyaz vnox nyuiuz kuex nauk lvmz kaz.
19 Yalxjuik nyuiuz shiz khvysvmc kaz yaq baunglaung nauk rvshonx ronx kaz, yvmx khoc lac ngoz ruiux lec piq kuex nawk palx htungx maq sawc muq rvtueq.Ref 18:19 Lew 20:18
20 Miq juik nyuiuz rulc nauk rvshonx ronx kaz; kvkhoc ruez ruiux yuq mnoz kuex nawk palx htungx maq sawc muq.Ref 18:20 Lew 20:10
21 Msaz hez muex Molek tishox kuex nauk tvnawk palx kaz, yvmx khoc lac ngoz ruiux lec kvkhoc shuimx vtueq m-Tishox muingc jungc kuex nauk yomnamc kaz, Ngaz kuex Yehowa rvtauk.Ref 18:21 Lew 20:1-5
22 Miqwaz vdvmz dvmz nauk rvshonx ronx kaz; kvkhoc phvnx kuex Tishox rueq suirsac yaq.Ref 18:22 Lew 20:13
23 Miqwaz rvmuq ngoz ruiux yalxjuik kuex nyvmx saz rulc nauk rvshonx ronx kaz; kvkhoc ruez ruiux kuex nawk palx htungx maq mnoz kuex sawc muq rvtoq.Ref 18:23 Dw 22:19; Lew 20:15-16; Tvrac 27:21
24 Nuimshiq max wawc Yehowa rueq yurc gay ruiux nuimshiq httax kaz lvp vtuinx mungx vyuq httax wvnc tueq tvrac pungmungx miqsaz htenc rueq kvkhoc ruez wvnc tueq ningkhvnc nuex tvshuy shac gay tueq ikhoc nuimshiq shauk vgvnz kuex vshuy vshac honc vyaungc maq nauk kvmvlc tsawc kaz.
25 Tsuingshiq honc vyaungc htenc rueq ghaq vraungx kuex tvshuy shac gay tueq ningkhvnc nuex, Yehowa rueq kvruex mungx muex murx tvgurc vtueq kvruex mungx nuex httax yaq miqsaz htenc kuex tvdux gay tueq.
26-27 Tsuingshiq lotlaz rueq kvkhoc miqsuirc vsac kuex shuimx vtueq ghaq vraungx kuex tvshuy shac wuez tueq, yuq muinz nuimshiq rueq kvkhoc nauk ruez kaz. Nuimshiq rulx vdvmz httax yaq Israel miqsaz htenc nuiyc pungnuk miqsaz htenc lotlaz rueq Yehowa tvrac htenc nuiyc vpiq rueq nvr yaq kvjaz htenc kuex phvnc tvhungx wuez rax,
28 kvmaq nuimshiq max nuex httax wvnc tueq miq htenc tvdux gay tueq ikhoc, nuimshiq kuex tvdux gay kv-phuinx rvmuq.
29 Ekvkhoc vshuy vshac shuimc lvmc jix kuex Tishox miqsaz wawc tvdux gay rvhumc tuex kuex nuimshiq rueq tuiuz yaq.
30 Yehowa rueq, “Ngaz rueq nvr phaungx kvjaz htenc kuex phvnx vtueq kungkhux nuex kvruex mungx kvyuq httax wvnc tueq miqsaz htenc honc vyaungc htenc kuex nauk phvnx wuez kaz, vkhoc shuimx kaz vtueq nuimshiq shauk gvnz kuex nauk tvshuy shac kaz. Ngaz kuex Yehowa nuimshiq Tishox rvtauk,” ngoz tueq jungx tueq.