5
1 Israel miqsaz rueq Yodan ruilx yanc wvnc lot nuex httuiuc laz Yehowa rueq Yodan ruilx tvruic gay tueq lvmz, Yodan ruilx maq shalx nyuip kox nuex httax yaq Amori hokhvmx bix lotlaz nuiyc Svmuktvrax Mediteranean kawx nuex httax yaq Kanaan hokhvmx bix lotlaz rueq tay lvp wuez tueq. Israel miqsaz ningkhvnc nuex tsuingshiq kuex hiyaz kawc yawc wvnc wuez vtueq thuinbac thuinz htumx wuez tueq.
2 Kvruex yimaq Yehowa rueq Yoshua muex ngoc, “Payc lung wawc yaung tvhungx vtueq Israel miqsaz muex vhttoar gvnz kuq shuiuz,” ngoz tueq jungx tueq.
3 Kvkhoc rvtueq Yoshua muex Yehowa rueq nvr tueq rulc rv-ngvlc Israel miqsaz htenc muex vhttoar gvnc kanx ngoz tueq muingc yaq baung kvmaq vhttoar gvnz kuq tueq.
4-6 Ejip mungx maq dung kaz wvnc tueq miqwaz rulx lotlaz kuex vhttoar gvnc yoalx shex rvtueq. Yuq muinz Israel miqsaz kuex wawc rok bvlic httvmx tueq kumtsvy tvnx lvmx khuemx tueq nuex miqwaz saz rulx ukhaq muinz vhttoar gvnz muq doc rvtueq. Kvruex vkhing htumx yix Ejip mungx maq dung kaz wvnc tueq ralx khvt lot yaq panc miqwaz rulx lotlaz kuex Yehowa kvjaz phvnx muq ningkhvnc nuex thueyc kaz wuez tueq. Vpiq rueq tsuingshiq jix vwaz tamx muex bomkhvmc kuq tueq ghaq vbur nuiyc vrungx vwanx mungx kuex tsuingshiq rueq khiz lvp shuex rvmuq, ngoz tueq tuemc kuq tueq rulc rv-ngvlc tsuingshiq rueq khiz lvp muq.Ref 5:6 Wkh 14:28-35
7 Tsuingshiq sahez rueq vhttoar gvnc vhtungx lvmc guez ningkhvnc nuex, kvruex vnyalx panc htenc muex Yoshua rueq vhttoar gvnz kuq tueq.
8 Vhttoar gvnc yix maq, vmac tvhvlc laz miq wvyvmc kuex jerak nuex dvyx httax wuez tueq.
9 Kvruex yimaq Yehowa rueq Yoshua muex ngoc, “Ejip mungx nuex nuimshiq miqyvlc vsac dax muex yaungx wvnc tuit wawc, ngaz rueq nuimshiq kuex majuiuc raungnuiyq tvdung wvnc phaungx,” ngoz tueq jungx tueq. Kvkhoc rvtueq kvruex baung kuex GilgalRef 5:9 Gilgal: Vruex muingc vlvmz kuex Hebre maq “tvhttot gay tueq” ngoc rvtueq. ngoz tueq muingc taq tueq.
10 Israel miqsaz kuex Yerikho ghaq hep tvnx wawc Gilgal ngoz yaq hong nuex jerak tec tueq baunglaung, kvruex yapix raungx rokshiz rac raungx bvlic raungyac Tvlvy Wvnc Moalx kuex moalx tueq.Ref 5:10 Dw 12:1-13
11 Nvp kvyix raungnuiyq Kanaan mungx wawc vdung tsvmz pvt maq wisiz lomx muq wanx kuex vphaungc shauk shauk tsuingshiq rueq phauk saq wuez tueq.
12 Manna wanx kuex tvdvy kuq muq shex rvtueq, Israel miqsaz rueq mkaq muinz phauk lvp muq shex. Kvtanc jauz maq phaungc vtueq tsuingshiq rueq Kanaan mungx wawc vdung phuiuz vsvy dvyx shex phauk saq wuez tueq.Ref 5:12 Dw 16:35
13 Yoshua kuex Yerikho ghaq hep nuex httuiuc kaz tueq nuex piq khaungx tvmax nuex yaung shuimc jix washiz jvp yaq kuex huingc rvhek laz maq khiz tueq. Yoshua kuex kvruex waz kox nuex kvnvp kaz vtueq, “Mnoz kuex nuiyhez kox wawc nolaungx shuex, ralx lac rvtonx?” ngoz tueq wiz tueq.
14 Kvruex waz rueq, “Mruex kox jix muinz rvmuq, ngaz kuex Yehowa nolaungx yungx muex yaungx vtueq kaz vraungx,” ngoz tueq tvralc tueq.
Yoshua kuex ghaq nuex bumx vtueq nawk ruiux, “Taungjix lex, ngaz kuex mnvrc waz rvtauk. Mnoz rueq ngaz muex yvmx tvshuimc roc lac?” ngoz tueq tvralc tueq.
15 Yehowa nolaungx yungx waz rueq, “M-yaz paungc kuex put shuiuz; mnoz rueq nuiuz vshuiux baung kuex vsawc rvtueq,” ngoz tueq jungx tueq. Yoshua rueq muinz piq rueq jungx tueq rulc rv-ngvlc shuimx tueq.