15
Yehowa rueq ngaz muex jungx phuex, “Moshe nuiyc Samuel kuex vyuq jvp vtueq ngaz muex kvmenc jenc tvtay ruiux doc muinz, ngaz rueq vruex miq htenc htauk nuex menjenc thuinz tvkhic shaungx rvmuq. Tsuingshiq kuex tvkaz gay shuiuz, tsuingshiq kuex ngvy khaungkac wawc tvdung gay shuiuz. Ref 15:1 Dw 32:11-14; Wkh 14:13-19; 1Sam 7:5-9 Tsuingshiq mnuex lac kaz wvnc vtvnx ngoz tueq tsuingshiq rueq wiz ruiux yuq, ngaz rueq jungx phaungx kuex jungx shuiuz:
Wvyvmc kuex vmac vtsac raz tueq thueyc tvkoc vphoc rvhumc tuex,
kvruex kuex tsuingshiq kay juing lvmx rvtueq!
Vganc kuex ralx rvlungc nuex thueyc tvkoc vphoc rvhumc tuex,
kvruex kuex tsuingshiq kay juing lvmx rvtueq!
Wvyvmc kuex khvmx vrvmc rueq thueyc tvkoc vphoc rvhumc tuex,
kvruex kuex tsuingshiq kay juing lvmx rvtueq!
Vganc kuex khoktep miqsaz ikhoc shvlx lvy muex vphoc rvhumc tuex,
kvruex kuex tsuingshiq kay juing lvmx rvtueq! Ref 15:2 Tvkh 13:10
Ngaz, Yehowa rueq tsuingshiq nuex vhiz juing phvnx bvlic yaungc wvnc tvkoc htvp htaz taq tauk: tsuingshiq kuex ralx rvlungc nuex thvy gay rvhumc tuex; tsuingshiq maungx htenc kuex guyhex rueq het wvnc rvhumc tuex; wushawx htenc rueq saq shuex, ngvmx saz svl vwvl rueq kvjungx yaq htenc kuex phauk gay shuex. Hezekia saz Manase kuex Yuda hokhvmx yaungx yaq nuex, Yerusalem nuex piq rueq shuimx wvnc tueq yauk shuimc ningkhvnc nuex ngaz rueq mungkawx miqsaz lotlaz muex ekvruex hez kuex khiz vtueq tvkawc yawc shaungx,” ngoz tueq. Ref 15:4 2Hokh 21:1-16; 2Tvts 33:1-9
Yehowa rueq,
“Yerusalem miqsaz lex, mnoz muex uraq menjenc vtueq,
mhtauk nuex ukhaq lac yonzyex tvnx?
Vhvlx haz? ngoz tueq uraq lac
lvmx nuex jvp vtueq wiz kv-phux?
Nuimshiq rueq ngaz kuex tvdux gay phuinx;
nuimshiq rueq ngaz muex yix tvnungx shung gay tuit.
Kvkhoc rvtueq ngvy thuinkhvy nanx kuex vjvnc shex ningkhvnc nuex
ngaz rueq yauk tvlanc vtueq nuimshiq kuex rop gay phaungx.
Ngaz rueq mnoz kuex mungtan wawc miqghaq htenc nuex
raungguil nuex pvnc gay yaq wekkhix ikhoc tuip gay phaungx.
Ngvy miqsaz lex, ngaz rueq mnoz tvbac gay phaungx,
mlayx vbac kuex mnoz rueq httvr muq ningkhvnc nuex
msahez kuex ngaz rueq thvt gay tauk.
Mmungtan wawc mvntix nyuiuz
tamx kuex svmuktvrax kox wawc kumtsvy phungc
htauk nuex muinz vpaung.
Ngaz rueq m-yalxrox bix kuex tsuingshiq yalxrox baunglaung thvt gay ruiux
tsuingshiq nyuiuz hez kuex yonzyex tvrvhumc wuez shaungx.
Tsuingshiq kuex huingc rvhek maq tvkawc yawc vtueq
rvwvlc thamx yec tvrvhumc tauk.
Vsaz mvshix tvmoz gay tueq
nyuiuz kuex vmaungc rvkaz tueq, thuiuzthuic rvhtayc wayc yaq.
Piq raungx wuic kuex raungx nyauk yaungx wvnc vtueq;
piq kuex yvlc sac vtueq thuinz vmungx thuiuz yaq.
Nuimhez wawc vtvraungx doc httax yaq hez kuex
nuimz ralx muex tvthvt gay kv-phuinx.
Ngaz, Yehowa rueq jungx vshaungx,” ngoz tueq jungx tueq.
Yeremia kuex Yehowa muex Kvbot Nyvnx tueq
10 Ngaz kuex thuinz nuex piauc muq waz khoc vnauz! Yvmx ngoz tueq lac inyuiuz rueq ngaz kuex mungkawx vyuq jawx phvnx? Ngaz kuex ghaqphux vyuq rvthoz rvthvy nuiyc rvkhawc rvlvlc juing shex yaungx kaz. Ngaz kuex kuimphox mjuc muinz rvmuq kuex tvnvmc mauk, vnvmc muinz nvmc mauk; yuq muinz miq lotlaz laz rueq ngaz muex httonx tvmx wuez yaq. 11 Yehowa lex, ngaz rueq mnoz kuex vhvlx mlvp shueq ngoz tueq palc wvnc phaungx. Vkuilc vdaz nuiyc rvwvlc tvmaung httuiuc yaq nuex mralx htenc rueq ngaz muex tvtay jungx phuex. ( 12 Uraq muinz yanx kuex tv-ngawk lot muq, ghaqkhux kox wawc nvyrvyx vshot yanx kuex tv-ngawk lot muq.)
13 Yehowa rueq ngaz muex jungx phuex, “Ngaz rueq wvmungx tuimx nuex tsuingshiq rueq yaq tueq mvrax ningkhvnc nuex, tsuingshiq muex murx tvgurc tvkoc ngvy miqsaz tsak vnyvmx htenc tvjomx lvmc wvnc muex ralx hez kuex ngaz rueq tvkaz shaungx. 14 Ngvy thuinkhvy kuex wvr ikhoc raz tueq pattup pat-sac tsauz luic tuex ningkhvnc nuex, tsuingshiq rueq tuiuz muq mungtan nuex tsuingshiq ralx hez muex tvshuimx kaz kuq shaungx,” ngoz tueq.
15 Kvruex yimaq ngaz rueq, “Yehowa lex, mnoz rueq tuiuz yaq. Ngaz kuex rvwvl vtueq ngaz muex romc kuq koq. Ngaz muex guirguenc naqsaq jix hez kuex ngaz rueq yarc tvyez tvlvp koq. Tsuingshiq rueq ngaz kuex thvt vtueq taungx gay nuex httuiuc laz nauk nanx lawc kaz. Mnoz ningkhvnc nuex ngaz yomnamc rvhumc vtaungx kuex rvwvl shuiuz. 16 Mnoz rueq ngaz muex jungx vphux bomc poz lotlaz ngaz rueq tay vshaungx. Tvphaungc Tvsuip Yehowa Tishox lex, mnoz rueq ngaz guimz vphux ningkhvnc nuex mbomc htenc kuex ngvy thuinz vmungx nuex vkoz vkez raungc raq vtueq tvmvrc kuq phux. 17 Ngaz kuex vganc jix miq rulc nueyx luemz vtueq vkhing tvhttvmc vshaungx rvmuq. Mnoz rueq nvr shuiux kuex phvnx ruiux ngvy lauk lauk dvyx httax vtueq thuinkhvy mvrc yaq. 18 Ngaz kuex yvmx ngoz tueq lac kuilc daz rvhumc vtaungx? Ngvy mac htenc kuex yvmx ngoz tueq lac vphemc mvy muq? Tsuingshiq rueq yvmx ngoz tueq lac tvhvlc muq? Raungx lawc yac nuex ruic kaz yaq yuix saz ruilx ikhoc ngvy thuinz tvbac tvkoc haz mnoz rueq kvmungx vshuiux?” ngoz tueq jungx tauk.
19 Vruex ningkhvnc nuex Yehowa rueq tvralc tueq, “Mkhoc shoc maq mnoz yek ruiux, ngaz rueq tvyez shvlx wvnc phaungx, mnoz kuex ngvy nvrc waz muex tvyaungc yek phaungx. Mkhoc shoc maq mnoz rueq vjux vguez bomjungc kuex kvjak muq maq, vjux vhttax kvjaz dvyx kvjak ruiux yuq, mnoz kuex ngvy shvmmax muex yaungx yek tuiux. Miq htenc kuex mnoz kox nuex yek tuex, mnoz tsuingshiq kox nuex kay rac muq. 20 Ngaz rueq mnoz kuex tsuingshiq muex seng yaq wawwawx phaungx yaq yanx lung palx ruk ikhoc tvyaungc phaungx. Tsuingshiq rueq mnoz kuex khvt kv-phux, yuq muinz tsuingshiq rueq mnoz kuex taungx muq. Mnoz muex tvguing tvkhup wungx tvkoc ngaz kuex mnoz rulc vdvmz httax taungx. 21 Honc bac jix nuiyc yauk laungc yalawx jix miqsaz luimc vkawc wawc ngaz rueq mnoz kuex palc wvnc phaungx. Ngaz Yehowa rueq jungx vshaungx,” ngoz tueq tvralc tueq.