2
Kup jawrawx Ralx Daungx Httuiuc kay lvmz
Tishox vsawc ghaqluimx, Zion nuex,
bolic tuimz shuinz; honc lvmc tvruingc kuq shuinz.
Yuda miqsaz lex, kvkhuirc hiz wuez kuinz!
Yehowa raungnuiyq kuex mtanc rvmuq httuiuc wvnc yaq.
Kvruex raungnuiyq kuex nyauk
vtueq raungbuirc bawc wvnc ruiux, nyauk duk maq
phuemx rueq buirc yaq raungnuiyq rvtuex.
Kankhux htenc nuex raungx buingc rueq puingc yaq ikhoc
yunghvlc kupjawrawx ralx kung htenc kvtenc waung yaq.
Kvkhoc kuex kungkhux nuex mkaq muinz yaungx muq,
yix maq muinz yaungx tuex rvmuq shex.
 
Tsuingshiq pulx thuey waqthuimx
kemc htenc kuex wvr rueq ikhoc phauk gay tueq.
Tsuingshiq max kox wawc ghaqphux kuex Eden Sunc rulc rv-ngvlc yaq,
yuq muinz tsuingshiq yix kox nuex kuex kumtsvy tvnx ikhoc sawc luk rvtueq.
Tsuingshiq kox wawc dungc wvnc jix yvmx muinz vguez.
Tsuingshiq kuex mvre htenc ikhoc rvtueq;
tsuingshiq kuex ralx lungc mvre htenc ikhoc yuz yaq.Ref 2:4-5 Tvkh 9:7-9
Tsuingshiq kuex kankhux htauk htenc nuex dawk dat vtueq,
nolaungx renc tvruingc ikhoc muinz;
renhttuingx vshanx wvr rueq khamc yaq ikhoc muinz tvruingx wuez yaq.
Tsuingshiq kuex ralx khvt tvkoc vtvyoalc nolaungx daungx yungx ikhoc rvhttec jvp yaq.
Tsuingshiq kvnvp wvnc koq tueq, miq pumz tek vtueq hiyaz wuez yaq;
miq pumz tek vtueq htvlx luiz lep lep yaungx wuez yaq.
Kup jawrawx htenc rueq shvrvyx bix rueq ikhoc khvt yaq;
nolaungx bix ikhoc palx ruk htenc htauk nuex duiz wuez yaq.
Tsuingshiq lotlaz lvmx tvyaq muq
maq tvpvnz juit rvhtux duiz wvnc yaq,
vdvmz dvmz vshiz maq vshiz rvtungc tec wuez muq.
Tsuingshiq kuex nolaungx ghaq shungc maq khuemx ruiux
muinz, yvmx rueq muinz tsuingshiq kuex tvthauk lot muq.
Tsuingshiq kuex ghaqyungx nuex rvtul duiz wvnc vtueq;
palx ruk htenc htauk nuex yuz wuez yaq;
yuimx htenc nuex duiz wvnc
vtueq vguiuq vpawx jix ikhoc katvnc puc htenc maq nyuip wvnc wuez tueq.
 
10 Tsuingshiq kvtenc waung wvnc koq tueq ghaq kvbuilc yaq;
raungx kuex kvkhuirc yaq.
Shalx nuiyc yapix nyauk wvnc vtueq,
ruiysuiyq htenc raungluingx muinz lez muq shex.Ref 2:10 Tvkh 8:12
11 Yehowa rueq vpiq nolaungx
daungx kuex raungmuk ikhoc maq nvr tueq.
Vpiq kvjaz tay jix nolaungx daungx htenc paunghvlc
nuiyc hungc vlaungc httaz hvlc rvtueq.
Yehowa raungnuiyq kuex vtanc khvnc kvhiz juing doc lac!
Ukhaq lac tvraungx lot tvnx?Ref 2:11 Tvkh 6:17
Tharc Humc tvkoc Gvl tueq
12 Yehowa rueq, “Majuiuc yuq muinz rvkhauk laz tharc humc yek
vtueq, phuiuz vsvy mamc ruiux khoarsez
yonzyex wuez vtueq ngvy kox nuex yek waung luit.
13 Nuimshiq thuinbac vtuinx kuex tvkhic laz juing;
nuimshiq thuinz vmungx kuex tvbunx gay shuinz,
khoz vkhvy juirc gay kvdvyx hungx muq,” ngoz tueq.
 
Yehowa nuimshiq Tishox kox nuex yek waung luit.
Vpiq kuex menjenc thuinz nuiyc lungwawc thuinz vmvrx httax yaq;
vpiq kuex thuinz vluz maq vpiq bomkhvmc rulc rv-ngvlc shuimx yaq;
vpiq rueq murx tvgurc muex rvmuq, mvrax dawc kuy tvkoc
mkaq muinz tvyoalc yoalx rvtueq.
14 Yehowa nuimshiq Tishox kuex vpiq thuinz kvlayc vtueq
nuimshiq muex phungc yungx rungc yungx vthuey vngoz htenc ruimrix kuq kv-phuinx.
Kvruex yimaq nuimshiq rueq vpiq muex tuiz vtsvmz nuiyc svpiq tix maq shomc kuq shuinx.
 
15 Zion Kanx nuex bolic tuimz shuinz;
phuiuz svy mamc tvkoc nvr vtueq mungx miqsaz htenc tvtuimx gvl shuiuz!
16 Miq htenc kuex gvl tvtuimx shuiuz;
tsuingshiq tvkoc vsawc rvtuimx juing tvhungx kuq shuiuz;
nyuiuz waz rulx kuex tvtuimx shuiuz;
nosaz rulx kuex tvjomx shuiuz
noshawx sahez kvtauk tvtuimx shuiuz.
Rvlvmc nyalx shauk taungx muinz miqmac khok maq
dung kaz wvnc wuez tuex.
17 Shomrawx nuiyc Shomc Yuimx kaluix hvlwvl nuex
Yehowa muex shuimx kuq yaq shomc waz bix muinz,
vkhoarc raz tueq vkhoc vjux thoz shuex:
“Yehowa lex mmiqsaz htenc muex menjenc shuiuz.
Vganc miqphvnx htenc rueq ‘Nuimshiq Tishox kuex m-yuq lac?’ ngoz vtueq
nuiyshiq kuex tvshumc marc vtueq nauk tvnuey kuic vkueq.”
Tishox rueq Mungtan kuex Tvrungx Wanx Yek shuex
18 Kvruex yimaq Yehowa rueq vpiq mungtan tvkoc rvwvl tvmaung yaq kuex tvkhic tueq;
vpiq rueq vpiq miqsaz htenc muex menjenc yaq.
19 Vpiq rueq tsuingshiq muex vkhoc tvralc tueq:
“Majuiuc kuex ngaz rueq nuimshiq muex tuiz vtsvmz,
svpiq tix nuiyc olip puiz kuex kuq phaungx,
nuimshiq thuinhvlx laz phoay rungx tuinx.
Vganc miqphvnx htenc rueq nuimshiq kuex mkaq muinz shummarc kv-phuinx rvmuq.
20 Ngaz rueq ghaqkhux kox maq
httuiuc kaz tueq kup jawrawx ralx daungx kuex thuq gay
ruiux tsuingshiq wawc wvyvmc kuex kumtsvy tvnx nuex yurc gay shaungx.
Tsuingshiq khaungx tvmax wawc
wvmuingc jungc jix kuex Yuix Maungx Jumx nuex,
tsuingshiq yix kox wawc muingc jungc vhttax jix htenc kuex Mediteranean nuex yurc gay shaungx.
Tsuingshiq maungx htenc nvmc kuex thuingx tuex.
Tsuingshiq lotlaz rueq nuimshiq
muex ruez wvnc tueq ningkhvnc nuex tsuingshiq kuex ngaz rueq tvbac gay shaungx.
 
21 “Wuik vnax htenc lex, nauk hiz kaz, yuq muinz Yehowa
rueq nuimshiq lotlaz tvkoc shuimx tueq ningkhvnc nuex
vkoz vkez muex lenc lauk wuez kuinz.
22 Nyvmx saz htenc lex, nauk hiz kaz.
Ngac remc juing htenc wuiljuit wuiljaungx shex;
pulx thuey jungx htenc vthuey thuey yaq, phuiuq muiuq
thuey nuiyc svpiq thuey htenc vphungc vphawx tvdvy yaq.
 
23 “Zion miqsaz lex, kokez wuez kuinz,
Yehowa nuimshiq Tishox rueq nuimshiq tvkoc shuimx tueq
phvnx kvmac shuenruenz wuez kuinz.
Vpiq rueq nuimshiq muex raunglawc raungyunc kuex hungx laz kuq kv-phuinx;
raunglawc htumx wvnc raung-yunc muinz kungkhux wawc
ikhoc raungyux raungyunc kuex nuimshiq htauk nuex tvshuenc ruenc yunx kuq yaq.
24 Tsvmz nuiuz juing htenc nuex tuiz vtsvmz htenc mvrc tuex;
vthuey surc juing khurx htenc nuex svpiq tix nuiyc olip puiz htenc mvrx vtueq lemc yaq.
25 Nuimshiq tuiz vtsvmz htenc kup
jawrawx rueq phauk gay tueq ningkhvnc nuex
nuimshiq sumx wvnc tuit raungwawc htenc laung nuex ngaz rueq yez kuq phaungx.
Kvruex kuex nuimshiq khawc lvlc tvkoc ngaz rueq vtvkaz ralx daungx rvtueq.
26 Majuiuc kuex nuimshiq rueq
phuiuz svy juing paunghvlc lvp luz vtueq, phoay laz phauk saq wuez shuinx.
Nuimshiq tvkoc vwangc juing shuimx wvnc tueq,
Yehowa nuimshiq Tishox muex tvtsvmc kvmc wuez shuinx.
Ngvy miq htenc kuex mkaq muinz shummarc rvhumc yek muq shex.
27 Kvruex yimaq, Israel lex, ngaz kuex nuimshiq hvlwvl nuex httax vtaungx kvmuinz,
Ngaz kuex Yehowa nuimshiq Tishox rvtauk nuiyc
ngaz maq lvy vtueq vganc vguez kuex nuimshiq rueq tuiuz wvnc wuez shuinx.
Ngvy miq htenc kuex mkaq muinz shummarc rvhumc yek muq shex.
Yehowa Raungnuiyq
28 “Kvruex yimaq ngaz rueq miq ruip rawx htauk nuex ngvy Siyac kuex ruiuc kuq shaungx:
msaz miqwaz yalxjuik sahez rueq ngvy bomjungc kuex jungx kuq shuex;
nuimshiq nyuiuz waz rulx rueq maung maq maung shuinx,
nuimshiq yalxrox bix rueq romzyac tvkhic khiz shuinx.Ref 2:28-32 Kamx 2:17-21
29 Kvruex vkhing nuex ngaz rueq ngvy Siyac kuex
nvrc waz rulx nuiyc nvrc nyuiuz rulx vnueyc wvtaungx htauk nuex ruiuc kuq shaungx.
 
30 “Kvruex raungnuiyq kvkaq raungx
nuex muinz ghaq htauk nuex muinz honc tvsvmz kuq shaungx;
tvguiy yvlx, wvr nuiyc wvr khuiuq htenc ngaz rueq tvkhic shaungx.
31 Yungc loayc hvlc nuiyc miqhiz
vsac Yehowa raungnuiyq max httuiuc shauk nuex,
shalx kuex nyauk wvnc vtueq
yapix kuex tvguiy ikhoc shawx wvnc tuex.Ref 2:31 Mat 24:29; Mak 13:24-25; Luk 21:25; Tvkh 6:12-13
32 Yuq muinz romc kuy tvkoc Yehowa
kox wawc thoz jix lotlaz kuex palc daungc wvnc rvhumc tuex.
Yehowa rueq jungx tueq rulc
rv-ngvlc, ‘Yerusalem wawc wvyvmc luenx wvnc tuex;
kvruex hez kuex ngaz rueq vthvl shex hez ningkhvnc nuex tvraungx lvp tuex.’”Ref 2:32 Rom 10:13